Read MUKANDA WANZAMBI Sinulo 9 Bible Online

Sinulo 9 - MUKANDA WANZAMBI bible

Sinulo 9

¹Kaŋelu wamu chitanu hakwimba, nimona nikatumbwa kanaholoki dehi kwiwulu kanashiki dehi hamaseki; amwinka ninsapi yawina wamwikela.

²Hakwenzulula muwina wamwikela nansapi oyu. Muwinowu himukukakumuka wishi wudi neyi wamuluteriu lweneni. Niitaŋwa niluzwizu hilukwiyila nanowu wishi wamuwinowu.

³Muwishi himukufuma tubola hitukuya hamaseki; hiyakuyinka imuna jidi neyi jatunjimbu twahamaseki.

⁴Hiyakuyila nawu, Bayi mukisaŋana munyenvu wahamaseki hela chuma chitúuta chimu hela mutondu niwumuku, chiŋa wowu antu anabuli chilamiki chaNzambi hamahamawu.

⁵Hiyakuyileja nawu, Bayi mujaha antuku; kuminenu dakuyikatisha nankashi tukweji tutanu. Kukatisha kwawu kudi neyi kukata kwamuntu anasumuwu kudi kanjimbu.

⁶Wena mafuku owu antu akakeŋakeŋa kufwa, hiyakachimonaku.

⁷Mwamwekeneni tubola adiŋi neyi atuwalu aloŋeshelawu dehi njita; hanyitu yawu hadi yuma yidi neyi yibaaba yawuru; nimesu awu adi neyi mesu awantu.

⁸Adi nansuki neyi jawambanda, nimazewu awu neyi anyitupa.

⁹Adi nayijikililu yakusha hantulu, yidi neyi yachikuŋu; lushindu lwampuula jawu ludi neyi lushindu lwamakálu, neyi atuwalu amavulu nawa akulotokela kunjita.

¹⁰Akweti nyikila neyi yawatunjimbu niimuna. Ŋovu yakukatisha antu tukweji tutanu yekala munyikila yawu.

¹¹Akweti mwanta wawu yowu kaŋelu wekela; Ijina dindi muHeberu diyi Abadoni, mwidimi daHeleni wukweti ijina daApoliyoni.

¹²Ihuŋu damuchimu dinahiti; tiyenu, kunashali mahuŋu ayedi.

¹³Kaŋelu wamu chitanu nachimu hakwimba. Hinukutiya izu dimu hidikutiyakena kunseŋu jakameŋa kawuru kekala kumesu aNzambi.

¹⁴Wumu hakumwila kaŋelu wamu chitanu nachimu wudi nampitŋa nindi, Subulaku owu aŋelu awana anakasuwu kukaloŋa keneni Yufurati.

¹⁵Owu aŋelu aloŋesheleluwu dehi mpinji yimu niifuku dimu nikakweji kamu nimwaka wumu, kulonda ajahi chibalu chawantu chamuchisatu, ayisubula nikuyisubula.

¹⁶Kuchinda majita anowu akwatuwalu, makulakaji ayedi amakombakaji amakombakaji.[3] Hinukutiya mwayichindililuwu.

¹⁷Mwenimu dimu namweni atuwalu muchimwenu; akwakwendelahu akweti yijikililu yakesi niyawishi wiyila niyakesi kaNzambi hantulu. Ninyitu yawatuwalu yidi neyi yanyitupa; namutunwa twawu himukwidika kesi niwishi ni kesi kaNzambi.

¹⁸Hiyakujaha chibalu chawantu chamuchisatu nayipupu oyu yisatu, nakesi nawishi ni kesi kaNzambi akufuma namutunwa twawu.

¹⁹Muloŋa Ŋovu jawatuwalu jidi namutunwa twawu nimunyikila yawu; muloŋa nyikila yawu yidi neyi tupela, yikweti ninyitu; diyi yakatishaŋawu nachu.

²⁰Antu asheluhu, abulili kujahawu nayipupu oyu hiyabalumukili munyichima yawu aleki nyidimu yamakasawu, aleki kupesha ademoni, niakishi awuru niasiliva niawuneŋu niamalola nianyitondu, abulaŋa kumona hela kutiya hela kwendaku.

²¹Hiyabalumukili munyichima yawu aleki wubanji wawu hela kupanda kwawu hela wuvumbi wawu hela wukombi wawuku.