Read MUKANDA WANZAMBI Ruti 1 Bible Online

Ruti 1 - MUKANDA WANZAMBI bible

Ruti 1

¹Chelili hanyaka hasompeshelaŋawu ansompeshi, mwituŋa mwaholokeleli nzala. Hadiŋi iyala wumu wakuBetelemi Yuda wayilinakushakama mumpata yaMowabi. Ayili niyena niŋodindi ni anyanindi ayedi amayala.

²Iyala ijina dindi Elimeleki, Iŋodindi ijina dindi Nyawomi, anyanindi ayedi majinawu, iwu Mahaloni, iwu Chiliyoni, adiŋi kwawu aEfwarata akuBetelemi Yuda. Ayili mumpata yaMowabi, ashakama nikushakama.

³Elimeleki, nfumwaNyawomi, wafwili; yena washeli nawanyanindi ayedi.

⁴Asumbwili ambanda akuMowabi, iwu ijina dindi Oripa, iwu ijina dindi Luti. Ashakamini kwenoku kwiji neyi nyaka ikumi.

⁵NiMahaloni niChiliyoni afwili mwayedi wawu. Owu mumbanda washeli kanka windi, anyanindi mwayedi wawu kwosi, nfumwindi kwosi.

⁶Yena yonyamuka nikunyamuka niaku indi kulonda afumi kumpata yaMowabi, afunti chiŋa kumukala wawu. Wachitiya dehi kuna kumpata yaMowabi nawu Yehova natali dehi antu indi aIsarela, nayinki dehi kudya.

⁷Wafumini kwenoku kwadiŋiyi, niaku indi mwayedi wawu, hiyakuya nikuya munjila yakufunta mwituŋa daYuda.

⁸Nyawomi hakuyila aku indi mwayedi wawu, nindi, Yenuŋa, funtenu chiŋa kumatala awamama jenu. Yehova niyena ayili chachiwahi neyi chimwayila chachiwahi akwetu anafwi, neyi chimunaŋili chachiwahi ninami.

⁹Yehova ayanakeni, muwani kwakushakama chachiwahi kumatala awanfumu jenu. Hakuyipwepula nikuyipwepula. Wena hiyakudila chacheni makumbu aweni akudila.

¹⁰Hiyakumwila nawu, Aha! Etu kwetu tukuya naneyi kumukala wenu.

¹¹Nyawomi nindi, Balumukenu chiŋa, anyanami. Indi enu mukuyiladi nanami? Ochu mwivumu dami munashali nawa anyana mwaka mwakasumbuki nawu?

¹²Balumukenu chiŋa, anyanami, Yenuŋa kwenu. Ami nakula dehi, nakamona nawa chiŋa kusumbuka neyala wanyi. Indi neyi nukwila nami kuchidi? Indi neyi nukumona iyala lelu hohu wufuku owu, hinukuvwala ninyana?

¹³Ochu enu mwadi kuyitalila akula? Ochu enu mwadi kudishakamina kubula kusumbuka? Yowu! Anyanami! Ami natiyi chikela nankashi hanyijimba yenu, muloŋa chikasa chaYehova anachiŋolweli nakunkalisha hohu.

¹⁴Adilili chacheni makumbu aweni akudila. Oripa wamupwepwili muku windi, ilaŋa Luti wamukakeleli mbe.

¹⁵Nyawomi nindi, Tala ntahi, iŋodeshaku deyi nafunti dehi nikumukala wawu nikudi akishi indi. Eyi neyi kamulondeli ipodeshaku deyi.

¹⁶Luti nindi, Bayi wunkakeja kukushiya, mwaka nifuntumu nibuli kuya naneyuku. Kwejima kuwukuyeyi kwoku nukuya ninami. Kwejima kuwukushakameyi, kwoku nukushakama ninami. Antu eyi akwila antu ami. Nzambi yeyi wukwila Nzambi yami.

¹⁷Kwonsu kuwakafwileyi, kwoku nakafwila ninami, kwokwakanjiikilawu. Yehova akambabeshi tuhu kwindi neyi hadi chuma chakatwambula, kwiji yowu kufwa hohu bweŋi.

¹⁸Chamweniyi yena nakakeluhu mbe nindi chiŋa yowu kuya nindi hohu, yomwena nikumwena nikuhosha nindi chiŋa nehi.

¹⁹Nochu ayili mwayedi wawu ye-e, nichashikiluwu kuBetelemi. Cheliluwu hiyakushika kuBetelemi, mukala wejima hiwukuhayama nsaŋu yawu, ambanda nawu, Yeniwu diyi Nyawomi?

²⁰Kuchinka yena nindi, Bayi muntenaŋa cheŋi daNyawomuku, muntenaŋa daMara; muloŋa Chinaweji nanmweshi kalula.

²¹Nayili chachiwahi, Yehova nanfuntishi cheŋi kunu makasakasa hohu. Indi enu mukuntenenadi daNyawomi? Yehova wanhilila dehi, Chinaweji wanmwesha dehi chikela, kayedi nawa!

²²Chochina dichi chafuntiliyi Nyawomi, niLuti wakuMowabi, muku windi, wafumini mumpata yaMowabi. Ashikili kuBetelemi chilaaka chakudya bali hichikutachika.