Read MUKANDA WANZAMBI Ruti 2 Bible Online

Ruti 2 - MUKANDA WANZAMBI bible

Ruti 2

¹NfumwaNyawomi wadiŋi nantaŋa yindi, iyala walema wasweja kuheta, wakuchisaka chaElimeleki, ijina dindi Bowazi.

²Luti wakuMowabi wamwilili Nyawomi, nindi, Niyi mwiha nakanonojoli nyitu yatidiku mwakuyayi owu wakantiya kuwaha. Wamwilili nindi, Yaŋa mwanami.

³Wayili, washi kili mumaha, hakunonojola muna mwakuyawu akwakukesa. Komana nashikeni dehi hachibalu cheha chaBowazi, wakuchisaka chaElimeleki.

⁴Bowazi niyena hakufuma kuBetelemi. Hakuyila akwakukesa nindi, Yehova mwikali nindi. Wena hiyakwiteja nawu, Yehova akukiswili nkisu.

⁵Bowazi hakumwila ŋamba yindi wadiŋi kapita kawakwakukesa, nindi, Indi iwu chaŋadima himwana kanyi?

⁶Owu ŋamba wadiŋi kapita kawakwakukesa wamulejeli nindi, Diyi chaŋadima wakuMowabi nenzi naNyawomi chanafuntiyi kwayiliyi kumpata yaMowabi;

⁷yena welili nindi, Ninonojoli mwani tidiku, nakakuŋujoli muna mwakuyawu akwakukesa, muna mwakuyawu mukachi kayita. Dichi chenzayi, nafumishi dehi ntetemena anamutuukishi aha hididi, mwitala walabilamu chantesha hohu.

⁸Bowazi hakumwila Luti, nindi, Hiwunachitiyuku, mwanami? Bayi wuyaŋa nakunonojola mwiha dacheŋuku, bayi wufuma kunuku, chiŋa wushakama kunu nayaŋadima yami.

⁹Mesu eyi atali mwiha dakukesawu wena, wulondelaŋa muna mwakuyawu. Anyikwenzi amayala nayileja dehi nami bayi akakwata chikasa chawu hadeyuku? Chiwukutiya mpwila, wuyaŋa kuna kudi nsaba, hiwukunwa meji anatahuwu anyikwenzi.

¹⁰Yena wadinatili hamesu, wabandamini niihama heseki, wamwilili nindi, Indi ami nawani ŋahi wuselewa chochichi kudeyi, mwaka wuntoŋojokaŋa ami mwenyi hohu?

¹¹Bowazi wamwakwili, wamwilili nindi, Ami ananleji dehi to-o mwejima muwuneli namuku weyi chafwa nfumweyi, nichiwunashiyi nitata yeyi nimama yeyi nikwenu kuwavwalikili, hiwukwinza nakushakama nawantu akadi kwilukahu dehi eyi.

¹²Yehova akufweti namudimu weyi, akwinki niwuloku weyi walala kudi Yehova Nzambi yaIsarela, diyi wukwetimpuula jindi ŋawunenzi nakubatamamu.

¹³Yena mumbanda nindi, Niwa-naŋa tuhu chochina wuselewa kudeyi mwanta. Wankundeja dehi, wanhosha dehi chachiwahi ami kambuŋeyi, kutoŋa ami hinidi neyi chaduwu ambuŋeyuku.

¹⁴Chashakaminuwu nakudya, Bowazi hakumwila nindi, Inzaŋa kunu wudyai yakudya, tantaŋa kweyi mumuzoŋu. Washakamini hamu nawakwakukesa. Wamwinkeli tidiku yakwocha, wadiili, wekutili, washiyiluhu.

¹⁵Chanyamukiliyi nindi ayi nakunonojola, Bowazi hakuleja anyikwenzi jindi nindi, Muleki kwindi anonojoli hela mukachi kayita, bayi mumuhoshaku.

¹⁶Mukokelenumu tukwawu muyita nakumushiyila, anonojoli kwindi, bayi mumuhosholaku.

¹⁷Nochu wanonojoleli mwiha nonojole-e nimelela. Yanonojoleliyi wayihulili, yashi kili neyi kwiji chimpaya chimu chabali.

¹⁸Yonyamuka nikunyamuka, hakuya nikumukala, nimuku windi wamweni yanonojoleliyi. Wedishili niyina yashiyiliyi hekutiliyi, wamwinkeli.

¹⁹Muku windi wamwilili nindi, Indi eyi lelu waya nakunonojola kudihi? Wakalakala kudihi? Nkisu yindi owu wakutoŋojoka. Wamulejeli muku windi kwakalakeleliyi nindi, Nakalakala kweyala ijina dindi Bowazi.

²⁰Nyawomi wamwilili muku windi nindi, Amukiswili nkisu kudi Yehova, Yehova luwi lwindi saŋa atiyilayi niamomi niafu. Nyawomi wamwilili nindi, Yenowu iyala twasemuka nindi, diyi wuteji kwikala nkúuli yetu.

²¹Luti wakuMowabi nindi, Mwalala waŋilaŋa nindi, Wakakakela mbe kudi anyikwenzi jami nichichamba kakumishawu kwaŋula kudya kwami kwejima.

²²Nyawomi wamwilili muku windi Luti nindi, Chachiwahi mwanami chakuya nayaŋadima yindi, bayi akakuwana mwiha dacheŋuku.

²³Nochu wayikakeleli yaŋadima yaBowazi mbe, nichichakumishiluwu kukesa bali nitidiku. Washakamini namuku windi.