Read MUKANDA WANZAMBI Ruti 3 Bible Online

Ruti 3 - MUKANDA WANZAMBI bible

Ruti 3

¹Muku windi Nyawomi wamwilili nindi, Eyi mwanami, ochu nibuli kukukeŋela kwakushakama, ochu neyi nehi, wakashakama chachiwahi ŋahi?

²Yenowu Bowazi wukweti yaŋadima yindi viwadiŋi nawu hintaŋa yetuku? Lelu wufuku owu hakuya nakupepa bali kwitala dakuhulila.

³Wadi kuwela, wuwayi manji, wuvwali mahineyi, wuyi kwitala dakuhulila. Bayi akakumona kudi owu iyalaku, chiŋa nadyi dehi, nanwi dehi.

⁴Chakelayi, nakami dehi, eyi wakashinshiki kwanakamiyi, wakeŋa ilumu, wakanyamuni mahina anabutiyi kunyendu yindi, wukama nikukama. Yena wakakuleja chiwakela.

⁵Wamwilili nindi, Mwejima muwunanleji dimu nukwila.

⁶Wayili kwitala dakuhulila, welili mwejima mwamulejeliyi muku windi.

⁷Cheliliyi Bowazi nadyi dehi, nanwi dehi, natiyi dehi kuwaha kumuchima windi, hakuya nakukama kunsa yamulumba watidiku nabali. Luti hakuya chovu chovu, hakunyamuna mahina anabutiyi kunyendu yindi, yokama nikukama.

⁸Chi kwelili himukachi kawufuku, iyala hakubazumuka, yobalumuka nikubalumuka, nindi atali, mumbanda iwu nakami kunyendu yindi.

⁹Nindi, Yeyinyi? Yena nindi, Yami kambuŋeyi Luti, ambutuhu ami kambuŋeyi ihina deyi, muloŋa eyi yeyi wuteji kunkúula.

¹⁰Nindi, Yehova akukiswili nkisu, mwanami. Hela hakusambila wela chachiwahi, katataka wunasweji dehi, ochu chiwunabuli kukeŋa anyikwenzi hela abula kuheta, hela aheta.

¹¹Ichi dinu, mwanami, bayi wutiya womaku. Nukukwila mwejima muwunahoshi. Muloŋa antu ejima amumukala wetu anakwiluki nawu wumumbanda washinshika.

¹²Chalala yami niteji kukukuula, ilaŋa kudi muntu mukwawu wakukukuula wakumbadikami.

¹³Hembelaku tuhu wufuku owu, habudidi twakatala; neyi yena waketeja kwila mwelaŋa mukwakukuula, chachiwahi; ilaŋa neyi yena wakaleka kwila mwelaŋa mukwakukuula, ami yami nakakwila mwelaŋa mukwakukuula. Yehova wudi kwoku. Kamaku tuhu wutalili chikukucha.

¹⁴Wakamini kunyendu yindi nichikwachili. Wahindukili kuchidi hamesu bwi. Muloŋa Bowazi wahosheli nindi, Bayi chakatiyakana nawu mumbanda wenza mwitala dakuhulilaku.

¹⁵Nindi, Letaku ilesu odu diwunadibuti, kwataku. Wakwatili. Yena wamwesekeleli yikopu yabali yitanu nachimu, yomutwika nikumutwika. Hakuya nikumukala.

¹⁶Chenjiliyi kudi muku windi, nindi, Wunendi chachiwahi mwanami, tahindi? Wamulejeli mwejima mwamwililiyi owu iyala.

¹⁷Nindi, Wanyinka yeniyi yikopu yabali yitanu nachimu. Muloŋa wela nindi, Bayi wuya makasakasa kudi muku weyuku.

¹⁸Kuchinka yena nindi, Shakamaku tuhu mwanami, wutali mukuya nsaŋwiyi. Muloŋa owu iyala hakulekaku chiŋa chumichi chimana.