Read MUKANDA WANZAMBI Ruti 4 Bible Online

Ruti 4 - MUKANDA WANZAMBI bible

Ruti 4

¹Dichi Bowazi hakuya kuchisu chamukala, hakushakama. Kutala ntaŋa yawu atenenivi Bowazi wuteji kukuula hakuhita. Bowazi hakumwila nindi, Eyi mukwetu hitaku kunu, shakamaku. Yena hakuhita kwenoku, hakushakama.

²Watambwili amayala ikumi, awakulumpi jamukala hohu, nindi, Shakamenu kunu. Ashakama nikushakama.

³Wamwilili yenowu ntaŋa yawu wuteji kukuula, nindi, Nyawomi nenzi nafumi dehi kumpata yaMowabi, hakulandisha chibalu champata chadiŋi chamana kwetu Elimeleki.

⁴Dichi nela nami nikulejuku nami, Dilandi kunu kumesu anawa anashakami kunu, ni kumesu awawakulumpi jetu. Neyi wukukeŋa kudikúula, wudikúuli. Neyi hiwunakeŋi kudikúulaku, nlejumu ami kulonda niluki. Muloŋa kwosi wacheŋi wakudikúulaku, chiŋa eyi hohu. Ami yami nakulondela hanyima. Yena mukwawu nindi, Nukudikúula.

⁵Kuchinka Bowazi nindi, Ifuku diwakalanda iha naNyawomi chiŋa wakadilanda naLuti wakuMowabi, iŋodamufu, kulonda kumusaŋwila mufu ijina hawuswana windi.

⁶Yenowu ntaŋa yawu wuteji kukuula, nindi, Ami kutwesha kudikúulila nehi, nakenda katamisha wuswana wamami aweni. Hela ami yami niteji kukuula, kadikúuli eyi tuhu, muloŋa ami hinukutwesha kudikúulaku.

⁷Mumpata yaIsarela hanyaka, hakukuula hela hakuhimpa kulonda kuketula nachu nsaŋu jejima, elilaŋa muntu hakusubula nkwabilu yindi, hakumwinka mukwawu. Dimu mwaketwishilaŋawu nsaŋu mumpata yaIsarela.

⁸Nochu ntaŋa yawu wuteji kukuula hakumwila Bowazi nindi, Kadilandili eyi aweni. Hakusubula ninkwabilu yindi.

⁹Bowazi wayilili awakulumpi niantu ejima, nindi, Enu lelu muyayinsahu, munamoni chinalandi naNyawomi yuma yejima yadiŋi yaElimeleki, niyadiŋi yaChiliyoni niyaMahaloni.

¹⁰NiLuti wakuMowabi, iŋodaMahaloni, namulandi eli iŋodami, kulonda nimusaŋwili mufu ijina hawuswana windi, kulonda ijina damufu dibuli kujiya hadi ana kwindi nikuchisu chamukala wawu. Enu lelu muyayinsahu.

¹¹Antu ejima adiŋi muchisu, niakulumpi, nawu, Tuyayinsahu. Owu mumbanda nenzi mwitala deyi Yehova amwili neyi chadiŋuwu aRacheli naLeya, wenawa ayedi diwu atuŋishili mutaŋa waIsarela. Ikalaku walema muEfwarata, tiyakanaku muBetelemi.

¹²Mukala weyi wakeli neyi chiwelili mutaŋa waPerezi, avweleleluwu Yuda kudi Tamari, nanowu anyana akakwinkayi Yehova nanowu mukwenzi wamumbanda.

¹³Bowazi wamutambwili Luti, wamusumbwili hiŋodindi. Wepilili mudi yena. Yehova wamwinkeli ivumu, wavweli mwana weyala.

¹⁴Ambanda amwilili Nyawomi, nawu, Kisu kisu Yehova, nabuli kukushiya kanka weyi chakadi mukwakukuula. Ijina dindi ditiyakani munu muIsarela.

¹⁵Yena diyi wakekala mukwakusaŋula wumi weyi, diyi wakakulela hawupala weyi. Muku weyi wakukeŋa, wabadika anyana amayala atanu nayedi, diyi namuvwali.

¹⁶Nyawomi watambwili mwana, wamushili hantulu yindi, hakwikala nleli yindi.

¹⁷Ambanda atuŋiliyi nawu anamutumbili ijina, elili nawu. Nyawomi navwali mwanindi weyala! Anamutumba niijina dindi nawu Obedi. Diyi tata yajesi, tata yaDavidi.

¹⁸Tiyenu mwavwalikiluwu anyana kaPerezi. Perezi wavweli Hezeroni,

¹⁹Hezeroni wavweli Rami, Rami wavweli Aminadabi,

²⁰Aminadabi wavweli Nahashoni, Nahashoni wavweli Salamoni,

²¹Salamoni wavweli Bowazi, Bowazi wavweli Obedi,

²²Obedi wavweli Jesi. Jesi wavweli Davidi.