Read MUKANDA WANZAMBI 1 Samuele 1 Bible Online

1 Samuele 1 - MUKANDA WANZAMBI bible

1 Samuele 1

¹Kwituŋa daEfweremi damapidi kwadiŋi iyala wumu wakuRamatayi Zofwimi, ijina dindi Elekana, mwana kaYehorama, Yehorama mwana kaElihu, Elihu mwana kaTohu, Tohu mwana kaZufwi, kaEfweremi.

²Wadiŋi nawaŋodi jindi ayedi; wumu ijina dindi Hana, mukwawu ijina dindi Penina. Penina wadiŋi nawanyanindi, ilaŋa Hana hadiŋi nawanyanaku.

³Yenowu iyala wafuminaŋa hamukala wawu hamwaka hamwaka, wayilaŋana kudi fukula kudi Yehova wamazaza hakumuketwila yimuna kuShilo. Anyana kaEli ayedi, aHofwini naFwinehasi, atupristu twaYehova, adiŋi kwenoku.

⁴Ifuku daketwilaŋayi Elekana yimuna wenkelaŋa iŋodindi Penina iseka dindi dayuma, wenkelaŋa ni anyanindi ejima, amayala nawambanda, masekawu.

⁵Hakwila Hana wamwinkelaŋa maseka ayedi, muloŋa wamukeŋeli Hana. Ilaŋa Hana ivumu dindi adijikili kudi Yehova.

⁶Mukwankunyi nindi wamuvulokelaŋa nankashi kulonda kumutiyi shanakutama nanochu chamujikiluwu ivumu dindi kudi Yehova.

⁷Chelila ŋayi Elekana mwenomu hamwaka hamwaka, chayilaŋayi mumbanda kwitala daYehova, mukwawu hakumuvulokaŋa. Dichi yena hakudilaŋa hohu, nikudyaŋa nawa nehi.

⁸Nfumwindi Elekana hakumwila nindi, Eyi Hanawudi nakudiladi? Wunalekelidi kudya? Wunatiyilidi kutama kumuchimaweyi? Ami hinabadiki anyana amayala ikumuku?

⁹Cheliluwu anadyi dehi, ananwi dehi kuShilo, yena Hana hakunyamuka. Henohu kapristu Eli wadiŋi washakama hetanda dindi kuchipamba chakuchisucha tembeli yaYehova.

¹⁰Hana watiyili kumuchima bwi chikupu, walombeli kudi Yehova, hakudila nankashi.

¹¹Wadishiililumu nindi, Eyi Yehova wamazaza, neyi wukuntoŋahu ami kambuŋeyi nehuŋu damiidi, neyi wukuŋanukahu, neyi wukubula kunvulamena ami kambuŋeyi, wunyinka ami kambuŋeyi mwana weyala, chalala nakamwinkayi Yehova akekali windi hohu mafuku indi ejima amba kahandayi, hosi muntu wakahitishampoku yachayi kunamutu winduku.

¹²Cheliliyi kumesu aYehova lombe-e, Eli hakushinshika kukanwa kindi.

¹³Hana wadiŋi nakuhoshela kwindi mumuchima windi, wanyinkeshelikwanyivumbu hohu, izu dindi kutiyakana nehi. Dichi Eli watoŋojokelinindi nasheti.

¹⁴Eli wamwilili nindi, Ifukwinyi wamba kaleka kusheta? Lekaku vinyu yeyi.

¹⁵Hana wa akwili nindi, Nehi mwanta wami, ami nimumbanda wamona kukala mumuchima. Hinanwi hela vinyu, helawalwa walulaku. Nakumini dakumumwekeshela Yehova muchima wamiwejima.

¹⁶Bayi wunfuukwila ami kambuŋeyi neyi nimumbanda wabajamaku, muloŋa chinahoshi ichi nahosheli yitoŋojoka yinanvulili, nichikelachinamoni.

¹⁷Eli wamwilili nindi, Yaŋa kweyi chachiwahi, Nzambi yaIsarela akwinki chuma chiwunamulombi.

¹⁸Mumbanda nindi, Ami kambuŋeyi antoŋuhu mwani. Dichi mumbanda hakudiyila kwindi, hakudya, nikuneŋa nawa cheŋi kumesu indi nehi.

¹⁹Anyamukili ntetemena yayeni, adifukwili kudi Yehova; afuntili, hiyakuya nikwitala dawu kuRama. Elekana wadimweni naŋodindi Hana, Yehova hakumwanuka.

²⁰Chimwahitili mafuku Hana wabaabili ivumu, wavweli mwana weyala. Wanamutumbili ijina dindi nindi Samweli, welilinindi, Muloŋa namulombeli wakulomba kudi Yehova.

²¹Yenowu iyala Elekana niakwetala dindi ejima ayili nakumuketwila Yehova chimuna chahamwaka hamwaka, akeli nimwadishiililiyi.

²²Ilaŋa Hana hayili kwokuku, muloŋa wamwilili nfumwindi nindi, Chiŋa mwanaasambila kusumuka kulonda nakamutwali akamwekani kumesu aYehova, akashakamuku mafuku ejima.

²³Nfumwindi Elekana wamwilili nindi, Ilaku muwunamoni kuwaha, shakamaku nichakasumukayi, chiŋa Yehova akoleshi izu dindi. Mumbanda washakamini, wamwamwishili mwanindinichasumukiliyi.

²⁴Chasumukiliyi wamutweli kwitala daYehova kuShilo, wasendeli ŋombi wanyaka yisatu nichimpaya chawuŋa, ninswaha yavinyu. Mwana wachidipi munyanya.

²⁵Ajahili ŋombi, amushikŋili mwana kudi Eli.

²⁶Wamwilili nindi, Eyi mwanta wami, chalala hohu kutwamba nehi, mwanta wami, yami mumbanda nemeni kunu nakulomba kudi Yehova.

²⁷Mwana nalombeli diyeniwu, Yehova nanyinki dehi chinamulombi,

²⁸ninami namwinkiyi Yehova. Nyaka yakahandayi yejima wambala waYehova hohu. Samweli wadifukwili kudi Yehova kwenoku.