Read MUKANDA WANZAMBI 1 Samuele 13 Bible Online

1 Samuele 13 - MUKANDA WANZAMBI bible

1 Samuele 13

¹Sawulu wayulili mwaka wumu; cheliliyi nayuli dehi aIsarela nyaka yiyedi,

²Sawulu hakutonda muIsarela antu indi makombakaji asatu. Makombakaji ayedi hiyakushakama naSawulu kuMikimashi kumpidiya kuBeteli, ikombakaji dimu dadiŋi najonatani kuGibeya wamuBenjamini. Antu asheluku hakuyifuntisha kunyikala yawu wejima wawu.

³Jonatani hakutapa mashidika aFwilistinu ashiluwu kuGeba, aFwilistinu achitiya nikuchitiya. Sawulu hakwimba mpùŋa mwahita ituŋa dejima, nindi, AHeberu atiyi.

⁴AIsarela ejima atiyili nawu, Sawulu natapi dehi mashidika awaFwilistinu ashiluwu mwituŋa, nawu, AIsarela ananunki dehi ivumba datama kudi aFwilistinu. Antu apompa nikupompa kuGiligali kwadiŋiyi Sawulu.

⁵AFwilistinu adipompesha nikudipompesha nawu alwi nawaIsarela, makálu makombakaji makumi asatu, akwatuwalu makombakaji atanunadimu, niantu avula neyi wusekulula wekala kuchi kumu chakaluŋalwiji. Enjili nakutuŋa chilombu kuMikimashi, kumusela waBetaveni.

⁶AIsarela chamwenuwu chinakali dehi, muloŋa antu hiyakumona ihuŋu, antu hiyakuyana kubatajala nimumayeŋu, nimuyiputa, nimumalola, nimujimpwembu, nimumena.

⁷Henohu aHeberu amakwawu azambuka dehi Yodana, aya dehi mwituŋa daGadi naGileyadi. Sawulu saŋa adiyi kwindi muGiligali, antu ejima hiyakumulondela nakuzaala hohu.

⁸Wachiŋijililili mafuku atanu nayedi, mwomwamukaniniyi Samweli. Samweli kwinza kuGiligali nehi, antu hiyakumumwaŋala nikumumwaŋala.

⁹Sawulu nindi, Nletelenu kunu himulambu wakushita, niyimuna yakuwunda. Hakushita himulambu wakushita.

¹⁰Cheliliyi nindi akumishi kushita himulambu wakushita, kutala Samweli enza nikwinza. Sawulu hakuya nakumukinkilila nindi amwimwishi.

¹¹Samweli nindi, Wuneli chumanyi? Sawulu nindi, Namona antu hiyakuni mwaŋala, nineyi kwinza hitwadikanini nehi, niaFwilistinu hiyakudipompesha kuMikimashi;

¹²dichi nelili nami, AFwilistinu keŋa anlotokeli kuGiligali, ninami nichidi kanda nimulembeleli Yehova; nidikanjikŋa nikudikanjikŋa, hinukulambula nihimulambu wakushita.

¹³Samweli hakumwila Sawulu, nindi, Wuneli chuma chawusupi; hiwunahembi mwakulejeliyi Yehova Nzambi yeyuku. Yehova katataka wakeŋa a kukukoleshela wanta weyi wamuIsarela chahaya nyaka.

¹⁴Ichidinu wanta weyi hiwakakola nawaku. Yehova naditondeli dehi muntu wakumuchima windi. Yehova namukunjiki dehi kwikala nlomboli yawantu indi, nanochu chiwunabuli kuhemba mwakulejeliyi Yehova.

¹⁵Samweli hakunyamuka, hakufuma kuGiligali, hakuya kuGibeya wakuBenjamini. Sawulu hakuchinda antu adiŋiyi nawu, adiŋi kwiji neyi amayala makulakaji atanu nadimu.

¹⁶Sawulu namwanindi Jonatani, niantu adiŋuwu nawu hiyakushakama kuGeba wakuBenjamini; hakwila aFwilistinu hiyakushakama muchilombu chawu muMikimashi.

¹⁷Akwakupupa nyikala hiyakufuma muchilombu chawaFwilistinu yendu yisatu. Chendu chimu hichikuyamunjila yaya kuOfwara mwituŋa daShuwali.

¹⁸Chendu chikwawu hichikuya njila yakuBetihoroni. Chendu chikwawu hichikuya njila yakuŋinza yatala muchinekineki chaZebowimi yaya mwisaŋa.

¹⁹Mwahita ituŋa dawaIsarela dejima himwadiŋi muchiuku, muloŋa Fwilistinu elili nawu, AHeberu akenza kadichilila mpoku jatubali namayoŋa.

²⁰AIsarela ejima akunkumukilaŋa kudi aFwilistinu nakulola yikwakwayawu, nimatemwawu, niyizembi yawu, ninyipanŋa yawu.

²¹Helachochu, adiŋi nekwaŋa dawu dakuhotola nachu ninyipanŋa, nimatemwa, niyikupu yanyisomu, niyizembi, dakuhotola nachu ninyumba.

²²Dichi ifuku dakwasa njita hikwamwekeni hela mpoku yakabali hela iyoŋa kumakasa awantu adiŋi naSawulu najonatanuku, yamwekeni chiŋa kudi Sawuluna mwanindi Jonatani hohu.

²³Mashidika awaFwilistinu hiyakufuma mwayishiluwu hiyakuya kuchibukubuku chakuMikimashi.