Read MUKANDA WANZAMBI 1 Samuele 15 Bible Online

1 Samuele 15 - MUKANDA WANZAMBI bible

1 Samuele 15

¹Samweli wamwilili Sawulu, nindi, Yehova diyi wantemesheli nakukuwayisha manji wikali mwanta wawantu indi aIsarela walukanu. Ichi dinu tiyililaku mazu akukulejayi Yehova.

²Yehova wamazaza nahoshi nindi, Natali mwakoŋeluwu aIsarela kudi aAmaleki, chamujikilililiyi munjila, hafuminaŋayi muEjipitu.

³Dichi dinu yaku wakatapi aAmaleki, wakajilumuni chikupu yuma yawu yejima, kuyanakena nehi. Chiŋa wakajaha niiyala, nimumbanda, ni mwana, niwukwamwa, niŋombi, nimukoku, ninŋameli, nichimbulu.

⁴Sawulu hakutambika antu hakuyichindila kuTelayimi, akwakwendaha maseki makombakaji makulakaji ayedi, aYuda makombakaji ikumi.

⁵Sawulu hakuya kuŋanda yawaAmaleki, hakuyijikilila muchinekineki.

⁶Sawulu hakuyila aKeni nindi, Yenuŋa, ambukenu, kunkumukenu mufumi mudi aAmaleki, nakenza kayijilumwina kumu nawu. Muloŋa enu mwayilili anyana kaIsarela ejima chachiwahi hafuminaŋawu muEjipitu. Dichi aKeni afumini mukachi kawaAmaleki.

⁷Sawulu hakutapa aAmaleki kufumisha kuHavila kwakwila neyi wukuya kuShuri kwatalaŋana naEjipitu.

⁸Mwanta wawaAmaleki Agagi wamukwatili wamumi, antu ejima wayijilu mwini chikupu nawumwemu wampoku yakabali.

⁹Ilaŋa Sawulu nawantu aanakeneni niAgagi, ninyikoku, niŋombi, ninyama jatoha, ninyanakanyikoku, asweja kuwaha, niyuma yayiwahi yejima, kwonti kwawu kuyijilumuna chikupu; hakwila yuma yejima yadiŋi yaseka yawuswadi, diyiyajilu mwinuwu chikupu.

¹⁰Izu daYehova hidikwinza kudi Samweli,

¹¹nindi, Chinamudiishili Sawulu wanta chinanfutuli dehi kumuchima; muloŋa yena nafuntumu dehi, kunlondela nawa nehi, kwila munamuleji nehi. Samweli yotiya niku muchima bwi, hakumudilila Yehova wufuku wejima.

¹²Samweli haku menekesha budidi, hakuya nakumukinkilila Sawulu. Hiya kumuleja Samweli, nawu, Sawulu wenza kuKarameli, natuŋi dehi kaposhi, nakotoli cheŋi, naŋandakani nakunkumuki kuGiligali.

¹³Samweli hakwinza kudiSawulu. Sawulu hakumwila nindi, Akukiswili nkisu kudi Yehova. Ami nela dehi mwanlejayi Yehova.

¹⁴Samweli nindi, Indi oyu nyikoku nidinakutiya yidi nakukaloka, ninowu anombi nidi nakutiya adi nakwaŋula, anafumihi?

¹⁵Sawulu nindi, Anayifumishi kudi aAmaleki muloŋa antua anakeneni nyikoku nanombi asweja kuwaha nawu amuketwili Yehova Nzambi yeyi, anashali tunajilumuni chikupu.

¹⁶Samweli hakumwila Sawulu, nindi, Mwenaku, nikuleji mwanaŋiliyi Yehova wufuku owu. Hakumwila nindi, Hoshapa.

¹⁷Samweli nindi, Hiwadimweni eyi aweni kukeha hiyakwilishili mwantawanyi chidi yaIsarela ku? Netu Yehova wakuwayishili manji wikali mwantawa waIsarela;

¹⁸Yehova wakutemesheli njila, nindi, Yaku wakayijilumuni chikupu aAmaleki akwanshidi, wakalwi nawu nichakanoŋawu to-o.

¹⁹Ndochu walekelelidi kwovwahila izu daYehova mwaka wulotokeli yumayakupuŋa, wili nichatama kumesu aYehova?

²⁰Sawulu hakumwi laSamweli, nindi, Eŋa, novwahili kwami izu daYehova, nendi njila yantemesheliyi Yehova, naleti mwanta wawaAmaleki Agagi, niaAmaleki nayi jilumuni chikupu.

²¹Hakwila antu kwawu diwu anonenumu yumayakupuŋa, ninyikoku, niŋombi niyuma yayiwahi yadiŋi yakujilumuna, nawu amuketwili Yehova Nzambi yeyi kuGiligali.

²²Samweli nindi, Komana Yehova watiyaŋa kuwaha nanyilambu yakushita, niyimuna yakuketula chakweseka nakwovwahila izu daYehova, tahindi? Tiya, kwovwahila kwabadika kuketula yimuna, kutiyilila kwabadikamanji ayizamba yanyikoku.

²³Winyi wudi neyi nshidi yakuhopa, kudikaŋa kudi neyi kupesha nakupanda. Ochu chiwunaleki izu daYehova, niyena nawa nakuleki dehi kwikala mwanta.

²⁴Sawulu hakumwila Samweli nindi, Navulumuni, namotoki mwanlejeliyi Yehova nimazu eyi nawa, natiyihi woma wawantu hinukwovwahila izudawu.

²⁵Ichi dinu apanakeni mwani nshidi yami, abalumuki cheŋi tudibombihamu kulonda nidifukuli kudi Yehova.

²⁶Samweli hakumwila Sawulu, nindi, Ami hinukufunta neyuku; muloŋa wunaleki dehi kweyi izu daYehova, Yehova niyena nakuleki dehi kwikala mwanta wawaIsarela.

²⁷Cheliliyi Samweli nindi abalumuki ayaŋa, Sawulu hakukwata kwishinada kanji yindi, yitabuka nikutabuka.

²⁸Samweli hakumwila nindi, Yehova nakutabuli dehi wanta waIsarela lelu, bwe-chi! Nawinki dehi mukwenu wakubadikeyi.

²⁹Cheŋi nawa Ŋovu yaIsarela hakutwambaku, hakubalu mukamu muchimaku; ochu himuntu mwaka abalumuki?

³⁰Nindi, Navulumuni; anlemeshuhu mwani kumesu awawakulumpi awantu ami, ni kumesu awaIsarela, tubalumuki neyi, kulonda tudifukuli kudi Yehova Nzambi yeyi.

³¹Samweli hakubalumuka cheŋi, hakuya naSawulu. Sawulu hakudifukula kudi Yehova.

³²Samweli hakwila nindi, Nletelenu mwanta wawaAmaleki Agagi kunu. Agagi hakwinza kudi yena nakuzapajala. Agagi nindi, Chalala kululakwakufwa kunahiti dehi.

³³Samweli nindi, Mpoku yeyi chiyi nabondi ambanda hiyákubula anyana, nimama yeyi lelu tukumubonda abuli mwanahadi akwawu ambanda. Samweli hakuketola Agagi kumesu aYehova kuGiligali, yikunku, yikunku.

³⁴Samweli hakuya nikuRama, Sawulu niyena hakuya kwitala dindi kuGibeya waSawulu.

³⁵Samweli hayili nawa cheŋi nakumutala Sawuluku nikwifuku dindi dakufwa. Hela chochu, Samweli wamudilililaŋa Sawulu. Chamudiishiliyi Sawulu wanta waIsarela chamufutwili Yehova kumuchima.