Read MUKANDA WANZAMBI 1 Samuele 20 Bible Online

1 Samuele 20 - MUKANDA WANZAMBI bible

1 Samuele 20

¹Davidi hakutemuka kuNayoti muRama, hakuya nakuhosha kumesu ajonatani, nindi, Neli ŋahi? Naluwidi? Tata yeyi namuvulumuni muloŋa wanka, mwaka afwili kunjaha?

²Hakumwila nindi, Ochu chinjila, eyi hiwukufwaku, tiya, tata yami helaŋa hela chuma cheneni, hela kachuma kanyanya chakadi kunlejamuku, indi tata wukunjindila dichumichi? Hidimuku.

³Davidi hakusanyika, hakwila nindi, Tata yeyi neluki chachiwahi chinawanami wuselewa kudeyi, dihu hanafumi kwilanindi Jonatani bayi achilukaku, wakenda katiya chikela, chalala chahandayi Yehova kwaamu, nichahanda wumi weyi kwaamu, ami hanashali hanti hohunakufwa.

⁴Jonatani hakumwila Davidi nindi, Nukukwilila mwejima munakeŋi muchima weyi.

⁵Davidi hakumwila Jonatani, nindi, Tala, kumadiki kakweji kakaaluka, kinelaŋa chiŋa nishakama namwanta nakudya. Nlekiniyi nakabatami mumpata batame-e nikumelela amwifuku damu chisatu.

⁶Neyi tata yeyi wakantonda, wakelaŋa neyi, Davidi wanlombeli nankashinindi, Ŋitŋi niyi lufuchi kumukala wetu kuBetelemi, nindi, Muloŋa hanudihu haketulaŋawu chimuna chahamwaka chachisaka chetu chejima.

⁷Neyi wakahosha nindi, Chachiwahi, komana ami kambuŋeyi nakamonakuwunda, Ilaŋa neyi wakazuwa wakeluka neyi nafuukuli dehi mwatama.

⁸Dichi wuŋilaŋa ami kambuŋeyi chachiwahi, muloŋa wunakwati dehi chitiyaŋenu chaYehova nanami kambuŋeyi. Kwinza neyi mudami mudikuluwa kumina dakumŋaha tuhu kweyi eyi aweni, indi wukabi tuhu nakuntwalakudi tata yeyi?

⁹Jonatani nindi, Kwakulehi ntahi! Ami niiluki mwakukufuukwilawu kudi tata yami kulonda wumoni yatama, nibulikukulejamu?

¹⁰Davidi hakumwila Jonatani nindi, Neyi tata yeyi wukukutalumokela akunlejamu kudinyi?

¹¹Jonatani hakumwila Davidi nindi, Twatuyi mumpata. Hiyakuya nimumpata wejima wawu ayedi.

¹²Jonatani hakumwila Davidi nindi, Yehova Nzambi yaIsarela ekalichinsahu chetu, chinakamutompa tata yami neyi hanu hanashiki itaŋwa helakumadiki hela kwifuku di kwawu, hinitali neyi chinamuwahili Davidi nibulikukutemeshela nakukulejamu?

¹³Neyi tata yami wakakeŋa kukwila mwatamaami nibula kukulejamu kulonda kukutemesha kwacheŋi, wakayichachiwahi chamwena zo-o, Yehova akamwili Jonatani mwomumu nichakubadikamu, Yehova akekali naneyi neyi chadiŋilaŋayi natata yami.

¹⁴Bayi wukumina dakuŋila luwi lwaYehova hinichidi wamumi neyi nibuli kufwakunehi,

¹⁵luwi lweyi chiŋa wakalutiyilaŋa nimutaŋa wami haya nyaka kulukumishanehi, eŋa hela hamba kanoŋeshayi Yehova ayilumbu jaDavidi ejima hanu heseki.

¹⁶Dimu mwatiyaŋeniyi Jonatani namutaŋa waDavidi, ela nikwila nindi, Yehova akatendi Davidi hadi ayilumbu jindi.

¹⁷Jonatani hakumusanyikisha cheŋi Davidi nanochu chamukeŋeliyi, muloŋa wamukeŋelineyi chakeŋeliyi wumi windi yomweni.

¹⁸Jonatani hakumwila nindi, Kumadiki kakweji kacheŋi kakaaluka, akakutonda, muloŋa muchididi cheyi mwakekala mwamukunkulwayi.

¹⁹Chiwakajiŋa mafuku asatu wakakunkumukaŋa swayi, wakashiki kuna kuwabatamini ifuku ditwahosheli nsaŋu, wakashakama kwakwihi nelola daEzeli.

²⁰Ami nakaasa nyivu yisatu kumbadi yadu, neyi nidi nakusowa chuma.

²¹Nakatemesha kansi, nakamwila nami, Yaku, kanoni nyivu. Neyi nakamwilakansi nami, Tala nyivu wunayishi dehi kunu, yinoni winzi; hiwutiya ochu komana kweyi kwamwena, hikwaswalaku, chahandayi Yehova kwaamu.

²²Hinimwili mukwenzi nami, Tala, nyivu yidi kumbidi, hiwakaya kweyi, Yehova diyi nakutemeshi dehi kwacheŋi.

²³Hakwila nsaŋu yitunateni dehi nineyi ninami, tiya, Yehova wudi mukachi ketu nineyi ninami hayanyaka.

²⁴Dichi Davidi wabatamini mumpata. Chaalukili kakweji kacheŋi mwanta hakushakama nakudya.

²⁵Mwanta washakamini muchididi chindineyi chelilaŋayi dikalu, chochididi chakuma kumbaŋu. Jonatani onyamukani kunyamuka, Abineri hakushakama kumbadi yaSawulu, mwaDavidi mwadiŋi mwamukunkulwayi.

²⁶Denodu ifuku Sawulu hahosheli chumaku, welili nindi, Kudi chuma chinamuwani, hanadiŋilikuku, chalala hanadiŋiliku ku.

²⁷Chikunachi hefukuda muchiyedi dakakweji kakaha mwaDavidi saŋa mudi mwamukunkulwayi. Sawulu hakumwila mwanindi Jonatani, nindi, Mwana kajesi nalekelidikwinza nakudya hela haloshi hela lelu?

²⁸Jonatani hakumwakula Sawulu, nindi, Davidi walombeli nankashi nindi nimwitŋi ayi kuBetelemi.

²⁹Welilinindi, Nleki niyi mwani, muloŋa chisaka chetu chinaketuli dehi chimunakumukala, nimana kwami nantambiki dehi, neyi wunantoŋuhu, nleki mwani, niyi nakatali ana kwami. Dichi chanabuliliyi kwinza kumesa yamwanta.

³⁰Sawulu hakuzuwa najonatani, hakumwila nindi, Eyi mwana kamumbanda watama wadikaŋa, ochu ami nabuli kwiluka chiwunamutondi dehi mwana kajesi, kulonda akutiyishi eyi aweni nsonyi, atiyishili nawa kumuninsonyi yeheŋu damama yeyi?

³¹Mwejima mwakahandilaŋayi mwana kaJesi hanu heseki, eyi hiwakakolaku, hela wanta weyi hiwakakolaku. Dichi dinu temeshaku wumuleti kudami, afwi hohu.

³²Jonatani hakumwakulatata yindi Sawulu, hakumwila nindi, Akumujahiladi? Neli ŋahi?

³³Sawulu hakumwasa iyoŋa nindi amutapi. Jonatani eluka nikwiluka nindi komana tata nakeŋi dehi kumujaha Davidi.

³⁴Jonatani hakunyamuka kumesa chakuzuwa nankashi, denodu ifuku dakakweji damuchiyedi odu hadiili yakudyaku, muloŋa natiyi dehi chikela nansaŋu yaDavidi, nanochu chanamutiyishuwu dehi nsonyi kudi tata yindi.

³⁵Chikunachi budidi Jonatani hakuya mumpata nikansi kindi hohadikaniniyi naDavidi.

³⁶Hakumwila owu kansi nindi, Yaku lufuchi, wunoninyivu yinukwasa. Chelili kansi hakuya lufuchi, aasa nimuvu wakumumotwesha.

³⁷Chaneliyi kansi nindi ayaŋa nakushika kudi muvu waasiliyi Jonatani, Jonatani hakumubidika kansi, nindi, Muvu hiwudi kumbiduku?

³⁸Jonatani hakumubidika cheŋi kansi nindi, Temukaku lufuchi, nyakalaŋaa, bayi wulabajalaku. Kansi kajonatani kapompesha ninyivu, kenza nikudimwanta windi.

³⁹Kansi kwiluka chuma nehi, hinsanu yakwiluka ajonatani naDavidi hohu.

⁴⁰Jonatani hakumwinka kansi yitwa yindi, hakumwila nindi, Yaku, yitwali kumukala.

⁴¹Chaneliyi kansi nayi dehi, Davidi hakunyamuka kukabeta kakuchidiilu kwadiŋiyi, hakudimbukila chamesu indi hamaseki, hakubandama mapampa kasatu, hiyakudipwepujola, hiyakudililahamu, dile-e, Davidi yosweja nikusweja.

⁴²Jonatani hakumwila Davidi, nindi, Yaŋa kweyi chachiwahi, muloŋa tunasanyiki dehi ijina daYehova wejima wetu, netu Yehova ekali mukachi ketu nanami naneyi, nimukachi kawanyanetu niamami nieyeyi haya nyaka. Hakunyamuka, hakuya, Jonatani niyena nawa hakwijila mumukala.