Read MUKANDA WANZAMBI 1 Samuele 28 Bible Online

1 Samuele 28 - MUKANDA WANZAMBI bible

1 Samuele 28

¹Hamafuku owu aFwilistinu elili hiyakupompesha njita jawu, nawuayi kunjita yakuya nakulwa nawaIsarela. Akisha hakumwila Davidi, nindi, Tiyaku, chalala wakaya nanami kunjita, nineyi, niantu eyi.

²Davidi hakumwila Akisha nindi, Wakamona chinekali ami kambuŋeyi. Akisha hakumwila Davidi nindi, Nukukukunjika kwikala kalama kakulamaŋanamutu wami haya nyaka.

³Henohu Samweli wafwa dehi, amudila dehi kudi aIsarela ejima, amujiika dehi muRama mumukala windi yemweni. Henohu Sawulu wafumishafumisha dehi mwituŋa akwakuzakuka akishi, niatutepa ejima.

⁴AFwilistinu adipompesha nihamu, hiyakwinza nakushila chilombu chawu kuShunemi, Sawulu niyena nawa hakupompesha aIsarela ejima, hiyakushachilombu chawu kuGilibowa.

⁵Sawulu chanamoniyi luntu lwawaFwilistinu, atiya niwoma, muchima windi mwivumu hiwudi kwandu-ndu.

⁶Sawulu nindi ehuli kudi Yehova, Yehova kumwakula nehi, hela nakulota, hela naUrimi, hela nawatuprofwetu, nehi.

⁷Sawulu hakuyila ambuŋindi nindi, Nkeŋelenu mumbanda wazakuka mukishi kulonda niyi kudiyena nakehwiluku. Ambuŋindi hiyakumwila nawu, Tiya, kuEndori kudi mumbanda wazakuka mukishi.

⁸Sawulu hakudibalumuna neyi muntu wacheŋi, hakuvwala nimahinaacheŋi, hakuya nawantu indi ayedi, hiyakushika kudi mumbanda nawufuku, hakumwila nindi, Nhoŋeli mwani, namukishi weyi, wunkandwishili owuinukukutenena.

⁹Mumbanda hakumwila nindi, Tiya, eyi weluka dehi chaneliyi Sawulu, chanafumishiyi dehi mwituŋa antu azakuka akishi, niatutepa, indi wumi wami mukuwutiladi muhetu? Munalondi munjahishituhu.

¹⁰Sawulu hakumusanyikila Yehova, nindi, Chahandayi Yehova kwaamu, hiwakamona muŋa wansaŋu iyuku.

¹¹Mumbanda hakumwila nindi, Nikukandwishilinyi? Yena nindi, Nkandwishili Samweli.

¹²Mumbanda chanamoniyi Samweli, hakukaluka nankashi, mumbandahakumwila Sawulu nindi, Wunandimbilidi? Komana yeyi Sawulu!

¹³Mwanta hakumwila nindi, Bayi wutiya womaku, ochu wunamonidi? Mumbanda hakumwila Sawulu, nindi, Namoni mukishi wudi nakwidika hamaseki.

¹⁴Yena hakumwila nindi, Wudi ŋahi? Mumbanda nindi, Kudi nakwidika kashinakaji keyala, wavwala kanji. Sawulu eluka nikwilukanindi, Diyi Samweli, yobandama nichamesu heseki, hakudifukula.

¹⁵Samweli hakumwila Sawulu, nindi, Wunankabishilidi nakunkandwisha? Sawulu hakwakula nindi, Namoni kukala nankashi, aFwilistinu anambutuli dehi njita, Nzambi nanfumi dehi kwindi, haŋakulaŋa nawacheŋi hela nawatuprofwetu, hela nakulotaku, hohanafumi dinu kukutambikanami wunleji munukwila.

¹⁶Samweli hakumwila nindi, Neyi Yehova nakufumi dehi, nekali dehi nawa chilumbu cheyi, ami nawa wukupihwiladi?

¹⁷Yehova hakudikoŋela yemweni mwahosheliyi dehi mudami, Yehova nakutabuli dehi wanta, bwe-chi! Nawinki dehi mukwenu, yowu Davidi.

¹⁸Chinafumi hohiwabulili kwovwahila izu daYehova, hiwabulili kukopa Amaleki mwashikila kuzuwa kwazuwiliyi nankashi, hohanafumi dinu Yehova kukwila chumichi lelu.

¹⁹Kunuŋaku nawa, Yehova wakayihana aIsarela kudi aFwilistinu nineyi aweni hamu, kumadiki himwakanwana kunu kunidi nineyi nianyaneyi. Yehova wakahana njita yawaIsarela kudi aFwilistinu nawa.

²⁰Hohenohu Sawulu yodimbuka nihamaseki swandala, watiyili womanankashi namazu aSamweli. Chabuliliyi kudya yakudya mwaana wejima niwufuku wejima dichi chabuliliyi Ŋovu.

²¹Mumbanda hakwinza kudi Sawulu, hakumumona natiyi chikela nankashi, hakumwila nindi, Tiya, amikambuŋeyi natiyi mwizu deyi, wumi wami nawishi muchikasa chami, natiyi mumazu eyi wahosha nanami.

²²Dichi dinu mwani, eyi nawa tiyamwizu damami kambuŋeyi, nikutulili kachibalu kadinkendi wudyai, kulonda wumoni Ŋovu yakuya nayu munjila yeyi.

²³Yena hakuleka nindi, Kwontu kwami kudya. Ambuŋindi hiyakudibomba hamu namumbanda, hiyakumukanjikija, yotiya nimwizu dawu, hakunyamuka hamaseki, hakushakama hakadidi.

²⁴Mumbanda wadiŋi namwana kaŋombi mwitala wakudiisha chachiwahi, hakunyakala kumujaha, hakunona wuŋa, hakuwukanda, hakwocha mankendi akadi iluŋi;

²⁵hakunamutulila Sawulu hamu nawambuŋindi, hiyakudya, hiyakunyamuka nikunyamuka, hiyakuya wowena wufukowu.