Read MUKANDA WANZAMBI 1 Samuele 31 Bible Online

1 Samuele 31 - MUKANDA WANZAMBI bible

1 Samuele 31

¹AFwilistinu hiyakulwa nawaIsarela, aIsarela hiyakutemuka aFwilistinu, atapoleluwu hiyakudimbokela kumpidi yaGilibowa.

²AFwilistinu hiyakuyihapa aSawulu nawanyanindi nankashi, aFwilistinu hiyakujaha ngonatani niAbinadabi niMalikishuwa, wowu anyana kaSawulu.

³Njita hiyikumwila Sawulu mwatama, hiyakumuwana nikudi akwamata anyikumji, hiyakumumwesha kukala nankashi kudi akwamata anyikunji.

⁴Sawulu hakumwila mukwakusenda yitwa yindi, nindi, Holaku mpokuyeyi yakabali wuyimpwiki hamujimba wami zwa-a, kuchina kwinza nakumpwika kudi awa ayidima hiyakunkabisha, ilaŋa mukwakusenda yitwayindi wakolamini, muŋa watiyili woma nankashi. Dichi Sawulu hakukwatampoku yindi yakabali hakudimbukilaku.

⁵Mukwakusenda yitwayindi, chamweniyi Sawulu nafwi dehi, niyena nawa hakudimbukila kumpokuyindi, hiyakufwila hamu.

⁶Dichi afwili niSawulu ni anyanindi asatu, nimukwakusenda yitwa yindi, niantu indi ejima ifuku dawu dimu.

⁷AIsarela adiŋi ishinadi dachinekineki di kwawu niadipi mwishinadi daYodana chamwenuwu aIsarela hiyakutemoka, niSawulu ni anyanindi anafwi dehi, hiyakufuma munyikala yawu hiyakutemuka, aFwilistinu hiyakwinza nakushakamamu.

⁸Chikunachi, aFwilistinu hiyakwinza nakuvúulavúula afu, hiyakuwana Sawulu nawanyanindi muyasatu anadimbukili kumpidi yaGilibowa.

⁹Hiyakumuketula namutu, hiyakumuvúula yuma yanjita yavweliyi, hiyakutemesha mwituŋa dawaFwilistinu dejima niniku niniku nakutwala nsaŋu nikumatala awakishi awu akutupa, nikudi antu.

¹⁰Yuma yanjita yavweliyi hiyakuyisha mwitala daAshitoreti, chivuvuma chindi hiyaleuchipopela kumpwembu yakuBetishani.

¹¹EniYabeshi Gileyadi chanatiyuwu mwanamwilu wuSawulu kudi aFwilistinu,

¹²ayilobu ejima hiyakunyamoka, hiyakwenda wufuku wejima, atambula nichivuvuma chaSawulu niyivuvumaya wanyanindi yadiŋi kumpwembu yaBetishani, hiyakwinza nayu kuYabeshi, hiyakuyishita kwenoku.

¹³Hiyakunona mafwaha awu, hiyakuyiji ikakwishina damutondu muYabeshi, hiyakujiŋa nanzala mafuku atanu nayedi.