Read MUKANDA WANZAMBI 1 Samuele 7 Bible Online

1 Samuele 7 - MUKANDA WANZAMBI bible

1 Samuele 7

¹Amayala akuKiriyati Yeyarimi hiyakwinza hiyakukandwisha chimbaŋu chaYehova, hiyakuchitwala mwitala daAbinadabi dahampidi, hiyakujilika mwanindi weyala Eleyazari nawu ahembaŋa chimbaŋu chaYehova.

²Chimbaŋu chashakamini kuKiriyati Yeyarimi haleheli, chadiŋuku nyaka makumi ayedi, mutaŋa wawaIsarela wejima hiwukumudilila Yehova.

³Samweli hakuhosha namutaŋa wawaIsarela wejima, nindi, Neyi mudinakufunta kudi Yehova nanyichima yenu yejima, fumishenu mukachi kenuakishi akwacheŋi niAshitoreti, mutalishi nyichima yenu kudi Yehova, mumukalakeli yena hohu kanka windi; niyena wakayipulwisha kudi aFwilistinu.

⁴Dichi anyana kaIsarela hiyakunata aBayali nawaAshitoreti, hiyakumukalakela Yehova hohu kanka windi.

⁵Samweli hakwila nindi, Pompeshenu aIsarela ejima kuMizipa, kulondaniyilombeli kudi Yehova.

⁶Hiyakupompa kuMizipa, hiyakutaha meji, hiyakuyimwaŋila kumesu aYehova, dena ifuku odu hiyakujiŋa nanzala, hiyakuhosha kwenoku, nawu, Tunamuvulumuni dehi Yehova. Samweli wasompesheli anyana kaIsarela kuMizipa.

⁷AFwilistinu chatiyiluwu nawu anyana kaIsarela anapompi dehi kuMizipa, tulamba twawaFwilistinu hiyakuyaku nawu alwi nawaIsarela. Chachitiyiluwu anyana kaIsarela atiyili woma wawaFwilistinu.

⁸Anyana kaIsarela hiyakumwila Samweli nawu, Tudilili kudi Nzambi yetu Yehova chakadi kumwenesha kulonda atuhandishi kudi aFwilistinu.

⁹Samweli hakukwata kana kamukoku kachidi kwamwa, hakukashita himulambu wakumushitila Yehova. Samweli hakuyidilila aIsarela kudi Yehova. Yehova wamutiyili.

¹⁰Cheliliyi Samweli wuchidi kushita himulambu wakushita, aFwilistinu hiyakukundama kwakwihi, nawu adasi njita nawaIsarela. Yehova odidima nikudidima nankashi hadiŋuwu aFwilistinu dena ifuku odu, oyifwisha nimutentu; hiyakuyitapa kudi aIsarela.

¹¹AIsarela amayala hiyakwidika muMizipa, hiyakuyihaŋa aFwilistinu, hiyakuyitapa, tape-e, nichashikiluwu mwishina daBetikari.

¹²Samweli hakunona ilola hakudisha kwela Mizipa iku, Sheni iku, hakuditumba niijina nindi, Ebenezeri, nindi, Yehova natukwashuku ndonikulelu.

¹³AFwilistinu afwomoka nikufwomoka, hiyamotokeli cheŋi muŋinza yawaIsarelaku. Chikasa chaYehova chayikalishili aFwilistinu nyaka yejima yadiŋiyi Samweli.

¹⁴Nyikala yatambwiluwu aFwilistinu kudi aIsarela, ayifuntishili cheŋi kudi aIsarela kufumisha kuEkeroni ndo nikuGati; aIsarela atambwili niŋinza yawu kudi aFwilistinu. AIsarela nawaAmori ashakama nizo-o, kudasa nawa nehi.

¹⁵Samweli wasompeshelaŋa aIsarela nyaka yindi yejima.

¹⁶Wayilaŋaha mwaka hamwaka nakunyeŋumuka nikuBeteli, nikuGiligali, nikuMizipa; wasompeshelaŋa aIsarela munyikaloyu yejima.

¹⁷Hakufuntaŋa cheŋi kuRama, muloŋa kwoku kwadiŋi itala dindi, diku kwasompeshelelaŋayi aIsarela; kwoku kwanamutuŋililiyi Yehova kameŋa.