Read Luther 1545 (Letzte Hand) Klagelieder 5 Bible Online

Klagelieder 5 - Luther 1545 (Letzte Hand) bible

Klagelieder 5

¹GEdenck HERR / wie es vns gehet / Schaw vnd sihe an vnser schmach.

²Vnser Erbe ist den Frembden zu teil worden / vnd vnser Heuser den Auslendern.

³Wir sind Waisen / vnd haben keinen Vater / vnser Mütter sind wie Widwen.

⁴Vnser eigen wasser müssen wir vmb Gelt trincken / vnser Holtz mus man bezalet bringen lassen.

⁵Man treibt vns vber hals / vnd wenn wir schon müde sind / lesst man vns doch keine ruge.

⁶Wir haben vns müssen Egypten vnd Assur ergeben / auff das wir doch Brot sat zu essen haben.

⁷Vnser Veter haben gesündigt / vnd sind nicht mehr furhanden / vnd wir müssen jrer missethat entgelten.

⁸Knechte herrschen vber vns / vnd ist niemand / der vns von jrer hand errette.

⁹Wir müssen vnser brot mit fahr vnsers lebens holen / fur dem Schwert in der Wüsten.

¹⁰Vnser Haut ist verbrant / wie in eim ofen / fur dem grewlichen Hunger.

¹¹Sie haben die Weiber zu Zion geschwecht / vnd die Jungfrawen in den stedten Juda.

¹²Die Fürsten sind von jnen gehenckt / vnd die person der Alten hat man nicht geehret.

¹³Die Jünglinge haben Mülstein müssen tragen / vnd die Knaben vber dem Holtz tragen straucheln.

¹⁴Es sitzen die Alten nicht mehr vnter dem Thor / vnd die Jünglinge treiben kein Seitenspiel mehr.

¹⁵Vnsers hertzen freude hat ein ende / Vnser reigen ist in Wehklagen verkeret.

¹⁶Die Kron vnsers Heubts / ist abgefallen / O weh / das wir so gesündigt haben.

¹⁷Darumb ist auch vnser hertz betrübt / vnd vnser Augen sind finsterDas Gesicht vergehet vns / vnd ist alles schwartz fur den augen / fur grossem jamer vnd leid. worden.

¹⁸Vmb des berges Zion willen / das er so wüst ligt / das die Füchse drüber lauffen.

¹⁹ABer du HERR / der du ewiglich bleibest / vnd dein Thron fur vnd fur /

²⁰Warumb wiltu vnser so gar vergessen / vnd vns die lenge so gar verlassen?

²¹Bringe vns HERR wider zu dir / das wir wider heim komen / Vernewe vnser tage / wie vor alters.

²²Denn du hast vns verworffen / vnd bis allzu seer vber vns erzürnet. - Ende der Klagelieder Jeremia.