Read Luther Bibel, Wittenberg 1545, Letzte Hand mit Apokryphen Das Vierde Buch Mose. 10 Bible Online

Das Vierde Buch Mose. 10 - Luther Bibel, Wittenberg 1545, Letzte Hand mit Apokryphen bible

Das Vierde Buch Mose. 10

¹VND der HERR redet mit Mose / vnd sprach /

²Mache dir zwo Drometen von tichtem silber / das du jr brauchest / die Gemeine zu beruffen / vnd wenn das Heer auffbrechen sol.

³Wenn man mit beiden schlecht bleset / sol sich zu dir versamlen die gantze Gemeine fur die thür der Hütten des Stiffts.

⁴Wenn man nur mit einer schlecht bleset / so sollen sich zu dir versamlen die Fürsten vnd die Obersten vber die tausent in Jsrael.

⁵Wenn jr aber drometet / so sollen die Lager auffbrechen die gegen Morgen ligen.

⁶Vnd wenn jr zum andermal drometet / so sollen die Lager auffbrechen die gegen mittag ligen / Denn wenn sie reisen sollen / so solt jr drometen.

⁷Wenn aber die Gemeine zu versamlen ist / solt jr schlecht blasen vnd nicht drometen.

⁸Es sollen aber solch blasen mit den Drometen die söne Aarons die Priester thun / Vnd sol ewr Recht sein ewiglich bey ewrn Nachkomen.

⁹WENN jr in einen Streit ziehet in ewrem Lande wider ewre Feinde die euch beleidigen / so solt jr drometen mit den Drometen / das ewr gedacht werde fur dem HERRN ewrem Gott / vnd erlöst werdet von ewren Feinden.

¹⁰Desselbigen gleichen / wenn jr frölich seid / an ewren Festen vnd in ewren Newmonden / solt jr mit den Drometen blasen vber ewr Brandopffer vnd Danckopffer / das es sey euch zum gedechtnis fur ewrem Gott / Jch bin der HERR ewr Gott.

¹¹AM zwenzigsten tage im andern monden des andern jars / erhub sich die Wolcke von der Wonung des Zeugnis.

¹²Vnd die kinder Jsrael brachen auff vnd zogen aus der wüsten Sinai / vnd die Wolcke bleib in der wüsten Paran.

¹³Es brachen aber auff die ersten / nach dem wort des HERRN durch Mosen /

¹⁴nemlich das panir des Lagers der kinder Juda zoch am ersten mit jrem Heer / vnd vber jr heer war Nahesson der son Amminadab.

¹⁵Vnd vber das Heer des stams der kinder Jsaschar war Nethaneel der son Zuar.

¹⁶Vnd vber das Heer des stams der kinder Sebulon war Eliab der son Helon.

¹⁷Da zu legt man die Wonung / vnd zogen die kinder Gerson vnd Merari / vnd trugen die Wonung.

¹⁸DARnach zoch das panir des Lagers Ruben mit jrem Heer / vnd vber jr Heer war Elizur der son Sedeur.

¹⁹Vnd vber das Heer des stams der kinder Simeon war Selumiel der son ZuriSadai.

²⁰Vnd Eliasaph der son Deguel vber das Heer des stams der kinder Gad.

²¹Da zogen auch die Kahathiten vnd trugen das Heiligthum / Vnd jene richteten die Wonung auff [26] / bis diese hernach kamen.

²²DArnach zoch das panir des Lagers der kinder Ephraim mit jrem Heer vnd vber jr heer war Elisama der son Ammihud.

²³Vnd Gamliel der son PedaZur vber das Heer des stams der kinder Manasse.

²⁴Vnd Abidan der son Gideoni vber das Heer des stams der kinder BenJamin.

²⁵DArnach zoch das panir des Lagers der kinder Dan / mit jrem Heer vnd so waren die Lager alle auff / vnd AhiEser der son AmmiSadai war vber jr heer.

²⁶Vnd Pagiel der son Ochran vber das Heer des stams der kinder Asser.

²⁷Vnd Ahira der son Enan vber das Heer des stams der kinder Naphthali.

²⁸So zogen die kinder Jsrael mit jrem Heer.

²⁹VND Mose sprach zu seinem schwager Hobab dem son Reguel aus Midian / Wir ziehen da hin an die Stet / dauon der HERR gesagt hat / Jch wil sie euch geben / So kom nu mit vns / so wollen wir das beste bey dir thun / Denn der HERR hat Jsrael guts zugesagt.

³⁰Er aber antwortet / Jch wil nicht mit euch / sondern in mein Land zu meiner Freundschafft ziehen.

³¹Er sprach / Lieber verlas vns nicht / denn du weissest wo wir in die wüsten vns lagern sollen / vnd solt vnser Auge sein.

³²Vnd wenn du mit vns zeuchst / was der HERR guts an vns thut / das wollen wir an dir thun.

³³ALso zogen sie von dem Berge des HERRN drey Tagreise / vnd die Lade des Bunds des HERRN zoch fur jnen her die drey Tagreise / jnen zu weisen wo sie rugen solten.

³⁴Vnd die Wolcke des HERRN war des tages vber jnen / wenn sie aus dem Lager zogen.

³⁵VND wenn die Lade zoch / so sprach Mose / HERR / Stehe auff / Las deine Feinde zurstrewet / Vnd die dich hassen / flüchtig werden fur dir /

³⁶Vnd wenn sie ruget / so sprach er / Kom wider HERR zu der menge der tausent Jsrael. [27]