Read Luther Bibel, Wittenberg 1545, Letzte Hand mit Apokryphen Das Vierde Buch Mose. 33 Bible Online

Das Vierde Buch Mose. 33 - Luther Bibel, Wittenberg 1545, Letzte Hand mit Apokryphen bible

Das Vierde Buch Mose. 33

¹DAS sind die Reisen der kinder Jsrael / die aus Egyptenland gezogen sind nach jrem Heer / durch Mose vnd Aaron.

²Vnd Mose beschrieb jren Auszug / wie sie zogen / nach dem befelh des HERRN / vnd sind nemlich dis die Reisen jres zugs.

³Sie zogen aus von Raemses am funffzehenden tag des ersten monden / des andern tages der Ostern / durch eine hohe Hand / das alle Egypter sahen /

⁴Vnd begruben eben die Erstegeburt die der HERR vnter jnen geschlagen hatte / Denn der HERR hatte auch an jren Göttern gerichte geübt. [122]

⁵ALS sie von Raemses auszogen / lagerten sie sich in Suchoth.

⁶Vnd zogen aus von Suchoth / vnd lagerten sich in Etham / welchs ligt an dem ende der wüsten.

⁷Von Etham zogen sie aus / vnd blieben im grund Hahiroth / welchs ligt gegen Baal Zephon / vnd lagerten sich gegen Migdol.

⁸Von Hahiroth zogen sie aus / vnd giengen mitten durchs Meer in die wüsten / vnd reiseten drey Tagreise in der wüsten Etham / vnd lagerten sich in Marah.

⁹Von Marah zogen sie aus vnd kamen gen Elim / Darin waren zwelff Wasserbrunnen / vnd siebenzig Palmen / vnd lagerten sich daselbs. [123]

¹⁰VOn Elim zogen sie aus vnd lagerten sich an das Schilffmeer.

¹¹Von dem Schilffmeer zogen sie aus vnd lagerten sich in der wüsten Sin.

¹²Von der wüsten Sin zogen sie aus / vnd lagerten sich in Daphka.

¹³Von Daphka zogen sie aus / vnd lagerten sich in Alus.

¹⁴Von Alus zogen sie aus / vnd lagerten sich in Raphidim / Daselbs hatte das volck kein Wasser zu trincken.

¹⁵Von Raphidim zogen sie aus / vnd lagerten sich in der wüsten Sinai. [124]

¹⁶VOn Sinai zogen sie aus / vnd lagerten sich in die Lustgreber.

¹⁷Von den Lustgrebern zogen sie aus / vnd lagerten sich in Hazeroth.

¹⁸Von Hazeroth zogen sie aus / vnd lagerten sich in Rithma.

¹⁹Von Rithma zogen sie aus / vnd lagerten sich in Rimon Parez.

²⁰Von Rimon Parez zogen sie aus / vnd lagerten sich in Libna.

²¹Von Libna zogen sie aus / vnd lagerten sich in Rissa.

²²Von Rissa zogen sie aus / vnd lagerten sich in Kehelatha.

²³Von Kehelatha zogen sie aus / vnd lagerten sich im gebirge Sapher.

²⁴Vom gebirge Sapher zogen sie aus / vnd lagerten sich in Harada.

²⁵Von Harada zogen sie aus / vnd lagerten sich in Makeheloth. [125]

²⁶VOn Makeheloth zogen sie aus / vnd lagerten sich in Tahath.

²⁷Von Tahath zogen sie aus / vnd lagerten sich in Tharah.

²⁸Von Tharah zogen sie aus / vnd lagerten sich in Mithka.

²⁹Von Mithka zogen sie aus / vnd lagerten sich in Hasmona.

³⁰Von Hasmona zogen sie aus / vnd lagerten sich in Moseroth.

³¹Von Moseroth zogen sie aus / vnd lagerten sich in BneJaekon.

³²Von BneJaekon zogen sie aus / vnd lagerten sich in Horgidgad.

³³Von Horgidgad zogen sie aus / vnd lagerten sich in Jathbatha.

³⁴Von Jathbatha zogen sie aus / vnd lagerten sich in Abrona.

³⁵Von Abrona zogen sie aus / vnd lagerten sich in Ezeongaber.

³⁶Von Ezeongaber zogen aus vnd lagerten sich in der wüsten Zin / das ist Kades. [126]

³⁷VOn Kades zogen sie aus / vnd lagerten sich an dem berge Hor / an der grentze des lands Edom.

³⁸Da gieng der Priester Aaron auff den berg Hor / nach dem befelh des HERRN / vnd starb daselbs im vierzigsten jar des auszugs der kinder Jsrael aus Egyptenland im ersten tag des fünfften monden /

³⁹Da er hundert vnd drey vnd zwenzig jar alt war.

⁴⁰Vnd Arad der könig der Cananiter / der da wonet gegen Mittag des lands Canaan / hörete das die kinder Jsrael kamen. [127]

⁴¹VNd von dem berge Hor zogen sie aus / vnd lagerten sich in Zalmona.

⁴²Von Zalmona zogen sie aus / vnd lagerten sich in Phunon.

⁴³Von Phunon zogen sie aus / vnd lagerten sich in Oboth.

⁴⁴Von Oboth zogen sie aus / vnd lagerten sich in Jgim / am gebirge Abarim in der Moabiter grentze.

⁴⁵Von Jgim zogen sie aus / vnd lagerten sich in DibonGad.

⁴⁶Von DibonGad zogen sie aus / vnd lagerten sich in AlmonDiblathaim.

⁴⁷Von AlmonDiblathaim zogen sie aus / vnd lagerten sich in dem gebirge Abarim gegen Nebo.

⁴⁸Von dem gebirge Abarim zogen sie aus / vnd lagerten sich in das gefilde der Moabiter an dem Jordan gegen Jeriho.

⁴⁹Sie lagerten sich aber von Beth Jesimoth / bis an die breite Sittim des gefildes der Moabiter. [128]

⁵⁰VND der HERR redet mit Mose in dem gefilde der Moabiter an dem Jordan gegen Jeriho / vnd sprach /

⁵¹Rede mit den kindern Jsrael / vnd sprich zu jnen. Wenn jr vber den Jordan gegangen seid in das land Canaan /

⁵²So solt jr alle Einwoner vertreiben fur ewrem angesicht / vnd alle jre Seulen vnd alle jre gegossene Bilder vmbbringen / vnd alle jre Höhe vertilgen /

⁵³Das jr also das Land einnemet vnd drinnen wonet / Denn euch hab ich das Land gegeben / das jrs einnemet.

⁵⁴Vnd solt das Land austeilen durchs los vnter ewre Geschlechte / Denen der viel ist / solt jr deste mehr zuteilen / vnd denen der wenig ist / solt jr deste weniger zuteilen / Wie das Los einem jglichen daselbs felt / so sol ers haben / nach den stemmen jrer Veter. [129]

⁵⁵WErdet jr aber die Einwoner des Lands nicht vertreiben fur ewrem angesicht / So werden euch die / so jr vberbleiben lasst / zu dornen werden in ewren augen / vnd zu stachel in ewrn seiten / vnd werden euch drengen auff dem Lande / da jr innen wonet.

⁵⁶So wirds denn gehen / das ich euch gleich thun werde / was ich gedacht jnen zu thun.