Read MAASAI REVISED PROTESTANT Enkiterunoto 11 Bible Online

Enkiterunoto 11 - MAASAI REVISED PROTESTANT bible

Enkiterunoto 11

¹Ore apa enkop pooki naa enkutuk nabo eeta o rorei obo.

²Neaku ore peyie eidurru iltung'ana aaing'uaa oloosaen netum enkop naisiasha te nkop e Shinar, neitaa ine emanyisho enye.

³Nejokino ninche maate, “Wootu emaitayu Ilmatofali le sarng'ab nikipej te nkima oleng.” Neshetishore ilmatofali[3] te rishata oo soito o lami te rishata osinyai oshula o enturoto.

⁴Ina pee ejo: “Wootu emateshetaki ate enkanasa naata oltalet olo abaiki keper, nikintaiki ate enkarna peyie mikindapashakino ineelakua ti oriong enkop pooki.”

⁵Nedou Olaitoriani aing'or ina anasa o ilo talet otesheta inkera oo ltung'ana.

⁶Nejo Olaitoriani, “Ng'ura ajo olorere obo ninche, neiro pooki enkutuk nabo, naa ena enkiterunoto oo siaaitin naas. Naa ore pooki nayieu neas metii engoloto te ninche.

⁷Wootu, emaape aadoyio aitarruoo enkutuk enye, peyie meitoki aaning'uno maate te nkiroroto.”

⁸Metaa eidapashaka Olaitoriani ninche oriong enkop pooki teine, nepal enchetata e nkanasa.

⁹Te nkaraki eina peyie etejoki enkarna enye Babel, amu teine apa etomilo Olaitoriani enkutuk e nkop pooki, naa teine eidapashaka Olaitoriani ninche oriong enkop pooki.

¹⁰Kulo ile ishoi e Shem. Ore peyie eaku Shem oloo larin iip nabo, netaa ninye menye le Arpakashad ilarin aare anaa neishunye oloirrag le nkare.

¹¹Enyaaka Shem abik ilarin iip imiet eidipaki aatoiu Arpakashad, neeta apa kulikae ayiok o ntoyie.

¹²Ore peyie eeishu Arpakashad ilarin tomoni uni o miet, neaku menye le Shela.

¹³Enyaaka Arpakashad abik ilarin iip ong'uan o okuni eidipaki aatoiu Shela, neeta apa kulikae ayiok o ntoyie.

¹⁴Ore peyie eishu Shela ilarin tomoni uni, etaa ninye menye le Eber.

¹⁵Enyaaka Shela abik ilarin iip ong'uan o okuni eidipaki aatoiu Eber, neeta apa kulikae ayiok o ntoyie.

¹⁶Ore peyie eeishu Eber ilarin tomoni uni oong'uan, netaa ninye menye le Peleg.

¹⁷Enyaaka Eber abik ilarin iip ong'uan o tomoni uni eidipaki aatoiu Peleg, neeta apa kulikae ayiok o ntoyie.

¹⁸Ore peyie eeishu Peleg ilarin tomoni uni, etaa ninye menye le Reu.

¹⁹Enyaaka Peleg abik ilarin iip are o naaudo eidipaki aatoiu Reu, neeta apa kulikae ayiok o ntoyie.

²⁰Ore peyie eeishu Reu ilarin tomoni uni o aare, etaa ninye menye le Serug.

²¹Enyaaka Reu abik ilarin iip are o opishana eidipaki aatoiu Serug, neeta apa kulikae ayiok o ntoyie.

²²Ore peyie eeishu Serug ilarin tomoni uni, etaa menye le Nahor.

²³Enyaaka Serug abik ilarin iip are eidipaki aatoiu Nahor, neeta apa kulikae ayiok o ntoyie.

²⁴Ore peyie eishu Nahor ilarin tikitam ooudo, etaa ninye menye le Terah.

²⁵Enyaaka Nahor abik ilarin iip o tomon o ooudo eidipaki aatoiu Terah, neeta apa kulikae ayiok o ntoyie.

²⁶Ore peyie eishu Tera ilarin ntomoni naapishana etaa ninye menye le Abram, o Nahor o Haran.

²⁷Naa kulo ile ishoi e Tera. Ore apa Tera naa menye le Abram o Nahor o Haran. Ore apa Haran naa menye le Lot.

²⁸Nesiooyo Haran aye te dukuya Papaai lenye Tera teinakop natoinyeki ninye e Uri oo Ilkaldayo.

²⁹Neyam Abram Sarai, neyam Nahor Milka, entito e Haran aa menye Milka o Iska.

³⁰Ore apa Sarai naa koolupi amu meeta apa enkerai.

³¹Nerik Tera Abram olayioni lenye, o Lot olayioni le Haran olayioni lo layioni lenye, o Sarai, enkitok olayioni lenye Abram, nepuku aaing'uaa pooki Uri oo Lkaldayo aapuo enkop e Kanaan. Ore peyie ebau Haran, neitaa ine emanyisho.

³²Ore inkolong'i e Tera naa ilarin iip are o miet neye ninye te Haran.