Read MAASAI REVISED PROTESTANT Enkiterunoto 16 Bible Online

Enkiterunoto 16 - MAASAI REVISED PROTESTANT bible

Enkiterunoto 16

¹Ore Sarai enkitok e Abram eitu eiki Abram inkera. Neeta apa enkaisiaayiani e Misiri naji enkarna enye Hagar.

²Nejoki Sarai Abram, “Ng'ura sii ake, aaikeno Olaitoriani enguset pee maisho, shomo taboitare enkaisiaayiani ai, amu ebaiki natum inkera te ninye.” Neiruk Abram oltoilo le Sarai.

³Metaa ore eishua Abram ilarin tomon te nkop e Kanaan, ore Sarai enkitok e Abram, neya Hagar ina aisiaayiani enye oo Lmisiri, neisho Abram olpayian lenye meitaa enkitok enye.

⁴Neboitare Abram Hagar, neiroshiu. Ore peyie edol enkaisiaayiani ajo eiroshiwuo, nemenu Sarai.

⁵Nejoki Sarai Abram, “Inchoo ntorrok naaitaasitae meetu shumata iyie. Aaishoo iyie enkaisiaayiani ai ntamuata nkaik ore peyie edol ajo eiroshiwuo naamenu nanu. Inchoo Olaitoriani eiguanare erishata ai o enino!”

⁶Kake etiaaka Abram Sarai, “Ng'ura, etii enkaisiaayiani ino inkaik inono, intaasa anaa enidol eishiaakino te iyie.” Neisomit Sarai Hagar aisilisil o meisikie aitung'uaa kewan.

⁷Neinepu olmalaika lo Laitoriani ninye te mbata enchorro enkare ti ong'ata. Etii ina shorro e nkoitoi nalo Shur.

⁸Nejoki ninye, “Hagar enkaisiaayiani e Sarai, kaji iyie ing'uaa naa kaji iloito?” Nejo Hagar, “Kaisikita ailany ina naaitore ai naji Sarai.”

⁹Nejoki olmalaika lo Laitoriani ninye, “Torrinyokinoyu Sarai nilo ayanyit ninye.”

¹⁰Neitoki olmalaika lo Laitoriani ajoki ninye, “Ekaponaa oleng eishoi ino metaa meikenayu te nkumoi.”

¹¹Nejoki olmalaika ninye, “Ng'ura ajo inuta, naa iiu enkayioni, nimpot enkarna enye ajo Ishmael[5], amu etoning'o Olaitoriani osina lino.”

¹²Naa keaku ninye osikiria le ntim tiatua iltung'ana, keaku ore enkaina enye kear pooki tung'ani, ore inkaik e pooki tung'ani keaku kearr ninye. Naa keibayu ninye ilalashera lenyena.

¹³Metaa neipot Hagar enkarna Olaitoriani oirorie ninye ajo, “Ira iyie Enkai nadol,” amu etejo, “Kesipa doi katoduaa Enkai neton aishu aidipa atoduaa ninye?.”

¹⁴Ore te nkaraki ina eishooki ina shorro enkarna aajo Beer-lahai-roi[6], netii ninye erishata e Kadesh o Bered.

¹⁵Neiki Hagar Abram enkayioni, neipot Abram enkarna enkayioni enye natoikio Hagar ajo Ishmael.

¹⁶Ore apa Abram naa oloo larin ntomoni isiet o ile pee eiki Haga ninye Ishmael.