Read MAASAI REVISED PROTESTANT Enkiterunoto 19 Bible Online

Enkiterunoto 19 - MAASAI REVISED PROTESTANT bible

Enkiterunoto 19

¹Nepuonu ilmalaika oaare Sodom teipa, ore egira apa Lot aton te kishomi e Sodom. Ore peyie edol Lot ninche, neinyototo alo anang'are, neirrugo aitabaiki enkomom enye enkop,

²nejo, “Ilkituaak laainei embelekenyunye atasayia intae entijing enkaji osinka linyi, erraga, nintukuku inkejek inyi, nidumunyenye tadekenya aayok aapuo.” Nejo ninche, “A'a, aikiirrag enkoitoi nalala.”

³Kake etasayia Lot ninche oleng, o meibelekenyakinoto enkaji enye, neitaiki ninche osirua, nepejoki ninche imukateni neitu eisuishieki nenya ninche.

⁴Ore eton eitu eirura ninche nepuonu iltung'ana le nkanasa e Sodom ilooti o lbotoro olorere pooki o metabaiki olobayie aaman enkaji,

⁵neipot ninche Lot aajoki, “Koree iltung'ana ooetuo enitii ena kewarie? Intupuku ninche enikitii peyie kitum aataboitare ninche.”

⁶Neipang'aki Lot ninche te boo, nerrinyoki enkikenet enkaji.

⁷Nejoki ninye ninche, “Atasayia intae ilalashera laainei emiaas entorroni naba inji.

⁸Eng'ura, aata intoyie are neitu aikata eboitare olee, entasho matorikoki intae peyie ipuopuo aitaas eniyieuu, ore kulo tung'ana emintaas ae amu eetuo aajing oloip le nkaji ai.”

⁹Kake etiakita ninche lot, “Wuang'a iyie,” nejo maate “Eewuo ele tung'ani aa olomoni naa ninye olotu aiguanare iyiook! Etaa kintaas iyie entorroni nalang enikintaas ninche.” Nerrumokino pooki aairony Lot, nenyikaki enkaji peyie egil kutuk aji.

¹⁰Kake eitaituo lelo tung'ana aare inkaik neyietaki Lot atua enkaji natii neiken kutuk aji.

¹¹Neosh te modoki lelo tung'ana otii boo e kutuk aji e ina aji ilooti o lbotoro metaa etanyamala eirrapurrapu enetii kutuk aji.

¹²Nejoki lelo tung'ana Lot, “Teniata kulikae tung'ana tene?” Aa ilaputak linono, o ntoyie, anaa likae tung'ani ake ninye liata te nkanasa, intupuku ninche tiatua ene wueji.

¹³Amu etinyikua peyie kindaikie ene wueji, amu etasapuka olkiyioi lenye te dukuya Enkai, neirriwua iyiook Olaitoriani maidaikie.

¹⁴Neipang Lot alo airorie ilaputak ooyam intoyie enyena, nejoki “Enyoito entupuku tene wueji, amu etinyikua peyie eidakie Olaitoriani enkanasa.” Kake etotiwuo ninye too laputak anaa oltung'ani oiguranie ninche.

¹⁵Ore enasirie neisiosionie ilmalaika Lot ejoki, “Inyo toriko enkitok ino o ntoyie inono pokira are naatii ene, pee mindaaya te nkitamioto ena anasa.”

¹⁶Kake etotona ailitilito, ometaba anaa neibung lelo tung'ana enkaina enye o enkitok enye, o ntoyie enyena pokira are. Ore te nkaraki olng'ur lo Laitoriani te ninye, eyautua ninye auluo enkanasa.

¹⁷Ore peyie eitupuku ninche ninye, nejoki, “Isikie enkishui ino, niminang ake silig, nimintashe ake te dikae to yarata, isikaki indoinyo pee mindaaya.”

¹⁸Nejo Lot, “Oi mme neijia Olaitoriani lai.

¹⁹Ing'ura ajo enoto osinka lino omom too nkonyek inono, nitoponayie olng'ur lino te nanu anaa pee intajeu enkishon ai, kake maidim aisikaki indoinyo eitu aainepu enkidaaroto naye nanu.

²⁰Ing'ura enda anasa nataana naa kiti sii, nchooki makuetiki ine aime kiti ninye? Naa keitajeuni enkishui ai.”

²¹Nejoki Olaitoriani ninye, “Ing'ura ajo aatonyorrikia sii ina bae, metaa maidaikie ina anasa nitejo.

²²Tasioi isikaki ine, amu maas ae o tabai ine.” Te nkaraki ina peyie etejoki enkarna eina anasa Soar.[8]

²³Eilepua enkolong ina kata nabau Lot Soar,

²⁴neitashaiki Olaitoriani Sodom o Gomorra isoito ooyupuyup o looishu o enkima, eing'uaa Olaitoriani eimu keper.

²⁵Nemut ninye nena anas o oerata pooki o pooki omanya inkanas, o pooki toki nabulu e nkop.

²⁶Kake etanang'a enkitok e Lot silig esujita ninye, neaku ninye eng'ape e Munyan.

²⁷Neinyototo Abraham tadekenya alo ewueji neitasheyie te dukuya Olaitoriani.

²⁸Neing'or ninye enkalo e Sodom o Gomorra o enkalo enkop pooki o yerata, naa nedol eilepita empuruo eina kop anaa empuruo olkokuet.

²⁹Metaa ina apa emutata oo nkanas natii oerata. Etadamua Enkai Abraham neirriwaa Lot aitung'uaa atua ineemuti, anaa peyie emut inkanas naamanya Lot.

³⁰Nepuku Lot aing'uaa Soar, amany ildoinyo tenebo ntoyie enyena pokira are amu ekeure apa atotona te Soar, metaa etamanya enkapune tenebo ntoyie enyena pokira are.

³¹Nejoki entito botor enkanashe “Etamorua papa, nemetii oltung'ani te nkop oboitare iyiook to rrekie le nkiyama.

³²Wou, maitemera papa te naisho oo sabibu peyie kisiap ninye nikintudupaki ninye eishoi.”

³³Neitemer menye te naisho oo sabibu ina kewarie, nejing entito botor aisiap menye, neitu eyiolou Lot enkata naisiapa ninye o enkata natupukuo aing'uaa.

³⁴Ore peyie eaku enkolong e are, nejoki entito botor enkiti, “Ing'ura ajo aisiapa ng'ole papa; manyaaki aisho ninye enaisho ena kewarie, nilo sii iyie aisiap peyie kitum aaitudupai eishoi e papa lang.”

³⁵Neitemer menye te naisho oo sabibu ina kewarie nasuju, nedumunye entito kiti aisiap menye, neitu eyiolou Lot enkata naisiapa ninye o enkata natudumunye.

³⁶Metaa nenutayu intoyie pokira are e Lot te menye.

³⁷Ore entito botor etoiwuo enkayioni neipot enkarna enye ajo Moab, naa ninye menye lo Lmoabu ometabaiki ena olong.

³⁸Neiu sii ninye enkiti enkayioni, neipot enkarna enye ajo Ben-ammi, naa ninye menye loo Lamoni o metabaiki ena olong.