Read MAASAI REVISED PROTESTANT Enkiterunoto 21 Bible Online

Enkiterunoto 21 - MAASAI REVISED PROTESTANT bible

Enkiterunoto 21

¹Nedamu Olaitoriani Sara anaa apa enatejo, neitaas ninye anaa enaisiligie.

²Nenutayu Sara neiki Abraham enkayioni te nkata e moruao enye, te nkata erishata natiaka ninye Enkai.

³Neipot Abraham enkarna e nkayioni enye natoikio ninye Sara ajo Isaak.

⁴Nemurat Abraham enkayioni enye Isaak etaa oloo nkolong'i isiet, te inoto, anaa enaitanapa Enkai ninye.

⁵Etaa Abraham oloo larin iip peyie eikini ninye enkayioni enye Isaak.

⁶Nejo Sara, “Aaitobiraka nanu Enkai enkuenia; ore pooki ng'ae oning nekweni tenebo o nanu.”

⁷Nejo ninye, “Aing'ae aikata oidima atiaaki Abraham inchere keitanak Sara inkera? Ore ake eyia, natoikio ninye enkayioni te nkata emoruao enye.”

⁸Nebulu ina kerai, neoruni ilki, neitobir Abraham osirua sapuk ina olong naoruni Isaak ilki.

⁹Nedol Sara enkayioni e Hagar enapa Misiri natoikio ninye Abraham eiguran o enkayioni enye Isaak.

¹⁰Nejoki ninye Abraham, “Taarai impang'ie ena kitok rrindik tenebo o enkayioni enye, amu meaku enkayioni ena kitok rrindik olajung'oni tenebo o layioni lai Isaak.”

¹¹Neitanyamal ina bae Abraham oleng te nkaraki enkayioni enye sii ninye Ishmael.

¹²Kake etiaaka Enkai Abraham, “Mincho kintagor ororei le nkerai o te nkaraki enkitok ino rrindik, ore pooki nikijoki Sara, taasa ina. Amu Isaak eipotieki eishoi ino.

¹³Naa kaitayu sii olosho tiatua enkayioni enkitok rrindik, amu ole ishoi ino sii ninye.”

¹⁴Neinyototo Abraham tadekenya enasirie, neya endaa o lbene lo lchoni le nkare; neisho Haga meiteleiki oloililai lenye tenebo ina kerai neisho ninche meshomo. Nedumunye alo nelimana ti ong'ata e Beer-sheba.

¹⁵Ore peyie emita enkare natii olbene lo lchoni neing'uaa enkerai te ntonata osanag.

¹⁶Nelo aing'uaa aton tenelamita te wueji neba anaa eng'ororoto e mbae. Amu etejo, “Mincho aduaaki keeya enkerai ai.” Ore eton tenelamita ninye, neilepie enkerai oltoilo aishir.

¹⁷Nening Enkai oltoilo leina ayioni, neipot olmalaika le Nkai Haga eing'uaa keper nejoki ninye, “Kainyoo nikigira aitanyamal iyie Haga? Miureishoyu, amu etoning'o Enkai oltoilo le nkishirata leina ayioni teine netii.

¹⁸Inyo tudumu enkerai imbung'a tukurraki inkaik inono, amu kaitaa ninye olosho kitok.”

¹⁹Nebol Enkai inkonyek e Hagar nedol enchorro enkare, nelo aiput ilo bene lenye lo lchoni enkare neisho ina ayioni metooko.

²⁰Netii Enkai tenebo enkayioni nebulu ninye nebik tiong'ota, neaku olang'oroni padan[9] le nkawuo.

²¹Nebik tiong'ata e Paran, neyamaki ng'otonye enkitok naitung'uaa enkop e Misiri.

²²Ore apa ina kata, etiaakita Abimelek tenebo Fiko aa olkitok le njore, Abraham, “Etii Enkai tenebo iyie too siaaitin pooki nias,

²³ore naa taata, kayieu ninya olmumai te nanu ajo ore te Nkai mikintaas emonkoi, anaa intaas enkerai ai, anaa intaas eishoi ai. Kake ore anaa ina supatisho naaitaasa, ninye sii nanu intaasaki teina kop nitaayie omoni.”

²⁴Nejo Abraham, “Kanya olmumai.”

²⁵Neing'unyung'unyaki Abraham Abimelek te nkaraki enchorro natoorutuo isinkan le Abimelek.

²⁶Nejo Abimelek, “Mayiolo ajo aing'ae otaasa ena bae, eitu sii kiliki, neitu aekata aning ometabaiki ena olong.”

²⁷Neyau Abraham inkerra o lmong'i neisho ninche Abimelek, neitayu pokira olning'o.

²⁸Negelu Abraham isupeni naapishana e kerra too ntare meitasho oopeny.

²⁹Nejoki Abimeleki Abraham, “Kainyoo eitodolu kuna supeni naapishana e kerra nitegelua meitasho oopeny.”

³⁰Nejo, “Ore kuna supeni naapishana e kerra ining'amaa too nkaik aainei metaa iyaku iyie olchakeni lai inchere atuturo ena shorro.”

³¹Ore te nkaraki ina, neji ine Beer-sheba[10], amu teine einosa pokira oaare olmumai.

³²Metaa eitaituo ninche olning'o te Beer-sheba. Nerrinyo Abimelek tenebo Fiko olkitok lenye le njore enkop oo Filistia.

³³Neun Abraham enchani nanyaanyukie oloilei te Beer-sheba, neipot ninye teine enkarna o Laitoriani, Enkai oo ntarasi.

³⁴Nebik Abraham te nkop oo Filistia inkolong'i kumok.