Read MAASAI REVISED PROTESTANT Enkiterunoto 22 Bible Online

Enkiterunoto 22 - MAASAI REVISED PROTESTANT bible

Enkiterunoto 22

¹Ore etulusoitie kuna baa netem Enkai Abraham nejoki ninye, “Abraham” nejo ninye, “Nele nanu.”

²Nejoki, “Toriko olayioni lino Isaak ilo laa ninye ake iata, ilo linyor, nipuopuo enkop e Moria, nintayu ninye teine metaa olasar opejori te nchumata o ldoinyo obo laaliki.”

³Neinyototo Abraham tadekenya enasirie neirot osikiria lenye, nerik ilbarnot lenyena oaare tenebo enkayioni enye Isaak. Nedung'u ilkeek ooinokie olasar opejori, nedumunye alo ewueji netiaka ninye Enkai.

⁴Ore te nkolong e uni, neshumu Abraham inkonyek nedol ewueji nelakua.

⁵Nejoki Abraham ilbarnot lenyena, “Entotoni tene tenebo ele sikiria pee alo nanu o enkayioni idie aaserem Enkai peyie kintoki aashukunye.”

⁶Neya Abraham ilkeek ooinokieki olasar opejori, neiteleiki oloililai le Isaak enkayioni enye. Nenap te nkaina enye enkima o enkalem. Nepuo pokira aare aairiamari.

⁷Nejoki Isaak papaai lenye Abraham, “Papaai!” Nejo Abraham “Nele nanu enkayioni ai.” Nejo Isaak, “Ing'ura ajo kiata enkima o lkeek kake koree doi olkuoo le ker likintainye olasar opejori?”

⁸Nejo Abraham, “Ekeisho Enkai kewan olkuoo le ker lo lasar opejori, enkayioni ai.” Kaae nepuo pokira are aairiamari.

⁹Ore peyie ebau ewueji netuutaka Enkai Abraham, neshetu Abraham olperere lo lasar teine neirragie ilkeek aitobiraki, neen Isaak enkayioni enye, neirragie ninye te wueji o lasar te nchumata oo lkeek.

¹⁰Neitorioo Abraham enkaina enye nedumu enkalem nayieng'ie enkayioni enye.

¹¹Kake eipoto ninye olmalaika lo Laitoriani eing'uaa keper nejoki, “Abraham! Abraham!” Nejo ninye, “Nele nanu.”

¹²Nejo, olmalaika, “Minteleiki enkaina ino enkayioni anaa intaas ninye ae, amu atayiolo taata ajo iure Enkai amu atoduaa ajo eitu kimitiki enkayioni ino ina naa ninye ake iata.”

¹³Neshumu Abraham inkonyek enyena aing'orisho nedol te siadi ninye olmeregesh oibung'a entim imowuarak enyena, nelo Abraham aibung ilo meregesh, neitayu ninye aitaa olasar opejori te rishata e nkayioni enye.

¹⁴Neipot Abraham ine wueji ajo, “Eneishoorie Olaitoriani.” Naa ina arna eeta ine o taata, ore to ldoinyo lo Laitoriani keishoori.

¹⁵Neitoki olmalaika lo Laitoriani aipot Abraham enkata e are eing'uaa keper.

¹⁶Nejo, “Ainosa nanu olmumai te nkewan ai, ejo Olaitoriani, ore amu itaasa ena neitu imit enkayioni ino aa ninye ake iata,

¹⁷ekaamayian iyie oleng, naa kaponaa eishoi ino metotiwuo anaa ilakir le keper netiu sii anaa osinyai le nkiyopata enaiposha. Ore eishoi ino neaku e nenye kishomi oo lmang'ati lenye.

¹⁸Naa tiatua eishoi ino emayian iloshon le nkop pooki ate, amu itoning'o oltoilo lai.”

¹⁹Nerrinyokino Abraham ilbarnot lenyena, nedumunye pooki aapuo Beer-sheba. Nebik Abraham te Beer-sheba.

²⁰Neaku ore pee eishunye kuna baa, nejokini Abraham, “Ing'ura sii ajo, etoikio Milka olalashe lino Nahor inkera.

²¹Usi ilo kikau lenye o Obus olalashe lenye o Kemuel menye le Aram.

²²Keseed o Haso o Pildash o Yidlaf o Betuel.”

²³Neaku Betuel menye le Rebeka. Lelo pokira isiet etoikio Milka olalashe le Abraham Nahor.

²⁴Ore ake sii, ore ina apiani enye naji enkarna enye Reuma, etoiwuo Teba o Gaham o Tahash o Maaka.