Read MAASAI REVISED PROTESTANT Enkiterunoto 3 Bible Online

Enkiterunoto 3 - MAASAI REVISED PROTESTANT bible

Enkiterunoto 3

¹Ore apa olasurai naa aing'en oleng alang ing'uesi pooki naaitobira Olaitoriani Enkai. Neikilikuan ninye enkitok ajoki, “Eji ketejo doi Enkai, ‘Eminya pooki ng'anayioi lo lchani otii ena kurma?’ ”

²Nejoki enkitok olasurai, “Aikiindim iyiook aainosa ilng'anayio pooki loo lkeek le nkurma,

³kake etejo Enkai, ‘Eminya ilo ng'anayioi leilo shani otii empolos e nkurma, nimishoroo hoo ninye aashu iyeye.’ ”

⁴Kake etiaaka olasurai enkitok, “Miyeye ntae;

⁵amu keyiolo Enkai ajo ore tininyanya ilo ng'anayioi nebolo inkonyek inyi, nitiuu anaa Enkai, niyiolouu isupati o ntorrok.”

⁶Ore peyie edol enkitok ilo shani ajo aisidai te ndaa, naa olchani sii oitiship inkonyek, naa olchani sii ong'uarrayu oiteng'en oltung'ani, neitayu olng'anayioi lenye nenya, neisho sii olpayian lenye embata, nenya sii ninye.

⁷Ore inkonyek e pokira nebolo, neyiolou ina kata aajo meishopo. Nerip mbenek o lng'aboli aitaa nkilani.

⁸Nening ninche oltoilo lo Laitoriani Enkai eloito te nkurma eiropija enkolong. Ore olpayian o enkitok enye neisudori peyie medol Enkai tiatua ilkeek le nkurma.

⁹Kake eipoto Olaitoriani Enkai ilo tung'ani nejoki ninye: “Kaji itii iyie?”

¹⁰Neng'amaa ajoki, “Atoning'o oltoilo lino te nkurma, naureishoyu amu atoduaa ajo maishopo naipirri aisudori.”

¹¹Nejoki Enkai, “Aing'ae likitiaaka minchopo? Inosa olng'anayioi lo lchani laitanapa apa intae ajoki eminya?”

¹²Nejo ilo tung'ani, “Ore ina kitok apa nikinchoo metaa tenebo nanu, ninye naaishoo olng'anayioi lo lchani, mainosa.”

¹³Ina pee ejoki Olaitoriani Enkai enkitok, “Kaa bae ena nitaasa?” Nejo enkitok, “Olasurai laateleja nanya.”

¹⁴Nejoki Olaitoriani Enkai olasurai, “Ore amu itaasa ena, kitediaaki iyie aaitulus too nkishu pooki o too ng'uesi pooki entim, keaku iserpepiari te nkop, naa enterit ninye endaa ino, too nkolong'i pooki e nkishui ino.

¹⁵Ekapik mang'atisho erishata ino o enkitok. Neijia sii etiu erishata e ishoi ino o eishoi enye. Ekepurd ninye elukunya ino, ore iyie niony entutunyo enye.”

¹⁶Nejoki Enkai enkitok, “Kaaponiki nanu emion iisho, te mion sapuk iiu inkera. Ore iyieunot inono pooki keaku ino lpayian lino, neaku sii ninye likintore iyie.”

¹⁷Nejoki ninye Adam, “Ore amu itoning'o ororei le nkitok ino, ninosa ilo ng'anayioi lo lchani laaitanapa ajoki ‘Minya,’ etediaaki enkop te nkaraki iyie, ekeaku enenkinyinyiret ake inya te nkishui ino pooki.

¹⁸Kebulu ilkiku o ntulele te nkurma, neaku inya nena aitubulu oo nkurman.

¹⁹Te nkinyinyiret inya endaa, ometaba anaa nirrinyokino enterit, amu teine apa kintobiruaki. Ira enterit naa enterit irrinyokino.”

²⁰Neisho ilo tung'ani enkitok enye enkarna ajo Hawa amu ninye ng'otonye oo looishu pooki.

²¹Neitobiraki Olaitoriani Enkai Adam o enkitok enye nkilani oo ndapan, neishopoki ninche.

²²Nejo Olaitoriani Enkai, “Ore amu etotiwuo oltung'ani anaa obo lang, etayiolo isidain o ntorrok; ore tena kata, keidim ninye aitorioki enkaina enye olchani le nkishui ainosa, neaku keishu ninye intarasi.”

²³Metaa eitayio Olaitoriani Enkai Adam te nkurma e Eden peyie epuo aatur enkop apa naitobirunyeki ninche.

²⁴Nearaa ninye ilo tung'ani. Ore te nkalo oloosaen le Eden, etipika ninye olmalaika o lalem oyupuyup oman pooki alo peyie errip enkoitoi o lchani le nkishui.