Read MAASAI REVISED PROTESTANT Enkiterunoto 30 Bible Online

Enkiterunoto 30 - MAASAI REVISED PROTESTANT bible

Enkiterunoto 30

¹Ore peyie edol Raheli ajo eitu eiki Yakobo inkera, netum olom te nkanashe enye oleng, nejoki ninye Yakobo, “Nchooki nanu inkera ashu aye!”

²Negorokino Yakobo Raheli nejoki ninye, “Katii nanu ewueji Enkai nikitomitikio eishoi e nguset ino?”

³Ina peyie ejo Raheli, “Neina enkaisiaayiani ai Bilha; shomo enetii peyie aaiki nanu nkera.”

⁴Metaa eishoo ninye Yakobo enkaisiaayiani enye Bilha meitaa enkitok. Nelo Yakobo ayiolou ninye.

⁵Neiroshiu Bilhah neiki Yakobo olayioni.

⁶Ina peyie ejo Raheli, “Aatudung'oko Enkai enkiguana, netoning'o sii oltoilo lai naaisho nanu enkayioni.” Neaku eipoto enkarna enye ajo Dan.

⁷Neitoki errindik e Raheli anutayu neiki Yakobo olayioni li are.

⁸Ina peyie ejo Raheli, “Te nkesha nagol atigilunore enkanashe ai natimirishe;” neipot enkarna enye ajo Naftali.

⁹Ore peyie edol Lea ajo etudunge meekure eisho, neisho sii ninye enkaisiaayiani enye Silpa Yakobo meitaa enkitok.

¹⁰Neiki ina rrindik e Lea naji Silpa Yakobo olayioni.

¹¹Nejo Lea, “Atumunyana!” Metaa eishoo enkarna enye ajo Gad[15].

¹²Neigil ake errindik e Lea naji Silpa aiki Yakobo ae ayioni e are.

¹³Ina pee ejo Lea, “Kashipa nanu! Amu kaaipot nanu inkituaak aajo nashipa.” Ina pee eipot enkarna enye ajo Asheri[16].

¹⁴Ore too nkolong'i e nkikesare e nkano eshomo Ruben olokeri neinepu nkaitubulu naaji tunkuja tiong'ota, neyaki ng'otonye Lea. Ina peyie ejoki Raheli Lea “Inchooki aatasayia embata oo nkaitubulu e tunkuja[17] e nkayioni ino.”

¹⁵Kake etiaaka Lea ninye, “Ijo doi kembae kiti tinikioru olpayian lai? Iyieu sii nintoki aya tunkuja o layioni lai?” Nejo Raheli, “Inchoo naa meirraga enitii ena kewarie te nkaraki tunkuja olayioni lino.”

¹⁶Ore peyie eshukunye Yakobo tiong'ata teipa, eshomo Lea anang'are ninye nejoki ninye, “Meeta nchere peyie mikilotu taata ayiolou, amu aainyiang'ua iyie te tunkuja o layioni lai.” Metaa etaboitare Yakobo Lea ina kewarie.

¹⁷Nening Enkai Lea, nenutayu neiki Yakobo olayioni le imiet.

¹⁸Nejo Lea, “Aishoo Enkai elaakinoto ai amu aishooyie errindik ai aisho olpayian lai;” neipot enkarna ajo Isachar.

¹⁹Neitoki Lea anutayu, neiki Yakobo enkayioni e ile,

²⁰ina peyie ejo Lea, “Aaishoo Enkai enkishooroto sapuk; ekaayanyitu taata olpayian lai, amu atoikio ninye ilayiok ile;” neipot enkarna enye ajo Sebulon.

²¹Neitoki ake te siadi aiu entito neipot enkarna enye ajo Dina.

²²Neitoki Enkai adamu Raheli, nening Enkai ninye nebol enguset.

²³Nenutayu neiu enkayioni nejo, “Eiwuangie Enkai esulare ai,”

²⁴neipot enkarna enye ajo Yosef ejo, “Maatoponiki Olaitoriani ae ayioni.”

²⁵Ore peyie eiki Raheli Yakobo Yosef, nejoki ninye Laban, “Inchooki nanu mashomo, pee atum ashomo enkang ai o enkop ai.

²⁶Inchooki inkituaak aainei tenebo nkera aainei nena naisiaayua te iyie nikincho mashomo amu iyiolo esiaai naataasaka.”

²⁷Kake etiaaka Laban ninye, “Tenaa aikincho matejo ena, atayiolo te limunoto o laitumusumusoni inchere aatamayiana Olaitoriani te nkaraki iyie.

²⁸Tolimu elaakinoto ino naa kaishoru.”

²⁹Nejoki Yakobo ninye, “Iyiolo iyie openy enaikuna tenaaisiaai, niyiolo sii eneikuna inkishu inono peyie eponari te nanu.

³⁰Amu aikuti apa imasaa inono enalotunye, netoponari aaku kumok, nikitamayiana iyie Olaitoriani te pooki wueji naibelekenyakine. Paa amaa kanu kenya nanu agolie olmarei lai makewan?”

³¹Nejo Laban, “Kainyoo iyieu naaisho?” Nejo Yakobo, “Meeta entoki nikincho tinikintaas ena, ekaitoki ake aaku oloirrita naramat aing'or intare inono.

³²“Nchooki matijing'a atua intare inono ena olong aitayu tiatua pooki ker naata oltipoto anaa nairimo o pooki kuoo le ker orok, tenebo pooki kine oirimo tiatua inkineji; neaku nena elaakinoto ai.

³³Metaa esipata ai ninye naawalaki te siadi, tinilotu aing'or elaakinoto ai te iyie. Ore pooki nemeeta oltipoto nemeirimo sii tiatua inkineji, nerok sii tiatua lkuoo le kerra metaa tenelo netumi te nanu, neikenari aajo kepurruno.”

³⁴Nejo Laban, “Aisidai! Inchoo etiu anaa enitejo.”

³⁵Kake ore ina olong, eitayio Laban iloroi pooki ootipo neirrimo tenebo inkineji pooki naaitipo neirimo, pooki ake ninye naata eneibor o pooki sitima lo lker orok, neisho ilayiok lenyena metaramata.

³⁶Nelo Laban alamari elakuani oo nkolong'i uni elototo te rishata enye o Yakobo; neirrita Yakobo kulie tare pooki e Laban.

³⁷Neitayu Yakobo ing'usidin naashal too lkeek oonyaanyukie olporokuai o seki o siteti nekinyu nkopit e oriong te nena keek metaa kelio ing'udisin eibor.

³⁸Nepik nena ng'usidin naatikinya te dukuya ntare too mpeuti aa taa, ine neokishoreki, ine nepuonu ntare aaokie enkare. Amu kesesh etonie ilmeregeshi anaa iloroi intare teine.

³⁹Neraposhoyu intare te dukuya nena ng'usidin metaa etoiutuo ilkuoo oo rasha, o loo tipo, o loo nkererin.

⁴⁰Negelaa Yakobo isitiman, neing'orie inkomomi oo ntare enkalo natii inaarasha tenebo inaarook pooki naatii tiatua intare e Laban; neitalamaa inenyena, neitu eitushulaki ine Laban.

⁴¹Ore enkata pooki natonie ilmeregeshi anaa iloroi intare biot, neirragie Yakobo ing'usidin too mpeuti te dukuya ninche peyie etum aatotonie intare te nena ng'usidin,

⁴²kake ore nena sasin too ntare, eitu eirragie ing'usidin teine; metaa ore nena sasin neaku ine Laban ore inaapir neaku ine Yakobo.

⁴³Metaa etaa Yakobo karsis oleng, netum intare luaat kumok o nkaisiaayiak o ilaisiaayiak o intamesin o sirkon.