Read MAASAI REVISED PROTESTANT Enkiterunoto 31 Bible Online

Enkiterunoto 31 - MAASAI REVISED PROTESTANT bible

Enkiterunoto 31

¹Etoning'o apa Yakobo ilayiok le Laban ejo, “Ewa Yakobo pooki apa naara ine papa lang; ore sii te nena pooki apa naara ine papa lang, nenoto ninye ena karsisisho.”

²Nedol Yakobo ajo meekure enyor Laban ninye anaa apa te dukuya.

³Ina peyie ejoki Olaitoriani Yakobo, “Torrinyoyu enkop oo loo papaai lino, tushukokinoyu iltung'ana linono naa kaaku nanu tenebo iyie.”

⁴Neirriwaa Yakobo olkilikuai aipotu Raheli tenebo Lea meetu ina ong'ata natii ntare enyena.

⁵Nejoki ninche, “Kadolita taata ajo meekure aanyor papaai linyi anaa apa. Kake etii Enkai e papaai lai tenebo nanu.

⁶Iyiololo aajo aisiaaiyia papaai linyi te ngolon ai pooki;

⁷ore ake eyia, aateleja papaai linyi aibelekeny olekoisiaayio lai katitin tomon, kake eitu eisho Enkai ninye maaitamio.

⁸Ore pee ejo, ‘Ore pooki tare naaitipo naa keaku olekoisiaayio lino,’ ina pee eiu intare pooki inaata iltipot; naa tenejo, ninye, ‘Naata nkererin naaku olekoisiaayio lino,’ neiu intare pooki naata nkererin.

⁹Metaa neijia eikuna Enkai aya inkishu e papaai linyi naaisho ninche nanu.

¹⁰Ore te nkata nadumu iloroi anaa ilmaregeshi intare, atejo adumu inkonyek aainei nadol te nkidetidet inchere ore iloroi pooki oodumu intare naa ilooata nkererin o iltipot nerasha neirrimo.

¹¹Ina peyie aajoki olmalaika le Nkai te nkidetidet, ‘Yakobo,’ nang'amaa ajo, ‘Nele nanu!’

¹²Nejo ninye, ‘Tushumu inkonyek inono ing'orisho, ore inkineji pooki naaitigiran tiaatua intare naa keeta nkererin, neeta iltipot nerasha; amu atoduaa nena pooki nikintaasa Laban iyie.

¹³Kara nanu Enkai e Betel, ine wueji apa nintisinyie osoit abukoki eilata nikinosie sii olmumai. Ore tena kata inyo shomo tung'uai ena kop nirrinyo alo enkop apa nikitoinyieki.’ ”

¹⁴Ina pee ewalaki Raheli o Lea aajoki ninye, “Ketii ae rubata aashu enjung'ore natung'ueikiaki iyiook te nkaji e papa lang?

¹⁵Amaa taata iyiook emeitaa iyiook ilomon? Amu etimira iyiook, netaasishore impisai naaishoruaki te nkaraki iyiook.

¹⁶Ore nena masaa pooki naawa Enkai aitung'uaa papaai lang eishoo metaa inkunaang o nkera ang, ore tena kata, ore pooki nikijoki Enkai iyie, taasa.”

¹⁷Neinyototo Yakobo neitaked ilayiok lenyena o nkituaak enyena intamesin,

¹⁸nereu ninye aidurrie inkishu enyena pooki, tenebo imasaa enyena pooki naanoto, inkishu enyena naanoto te Padan Aram, pee epuo enkop e Kanaan enetii papaai lenye Isaak.

¹⁹Ore pee elo Laban adung ilpapit loo nkerra enyena, ore Raheli nepurroo inkaitin enkaji e papaai lenye.

²⁰Neluaya Yakobo eitu eliki Laban le Aram, ajoki ekeisikita alo.

²¹Neisik ninye o nena masaa pooki naata, neinyototo alang olkeju le Frati, neitoriokino oldoinyo le Gilead.

²²Ore peyie elikini Laban te enkolong e uni inchere eisika Yakobo,

²³nerik iltung'ana lenyena le sotua, nepuo aasuj ninye inkolong'i naapishana esuj aigutaki ninye oleng to ldoinyio le Gilead.

²⁴Kake eewuo Enkai enetii Laban le Aram te nkidetidet kewarie nejoki ninye, “Toduaa ake kewan mijoki Yakobo ororei hoo obo sidai aashu torrono.”

²⁵Neinepu Laban Yakobo. Ore ina kata eidipa Yakobo atuuno olng'obor lenye te nkop oo ldoinyio, ore Laban o ltung'ana lenyena le sotua neun ilng'oborri too ldoinyo le Gilead.

²⁶Nejoki Laban Yakobo, “Kaa ena nikintaasa peyie kilotu alej aiko nji, niya intoyie aainei anaa iyarunot o lalem?

²⁷Kainyoo peyie isika apurrorri, nikilej nanu, neitu kiliki nanu, metaa anaata aaishoo iyie shomo te nchipai o too sinkolioitin o te ntampuri o too lwululi loo usin?

²⁸Naa kainyoo peyie eitu kincho matung'ututa ilayiok laainei o ntoyie aainei aisho olesere? Itaasa tukul ene modai.

²⁹Ekaata engolon naaitameyie kake aairorie Enkai e papaai lino ena kewarie naajoki, ‘Toduaa ake kewan mijoki Yakobo ororei hoo obo sidai aashu torrono.’

³⁰Ishomo naa taata aidur te nkaraki niyieu oleng to ltau enkaji e papaai lino, kake kainyoo peyie itupurroyie inkaitin aainei?”

³¹Newaliki Yakobo Laban ajoki, “Amu atureishe, atadamua ajo aikindim atooru intoyie inono te ngolon.

³²Ore ake ninye oltung'ani litum eeta inkaitin inono nemeitoki abik eishu. Ore te dukuya iltung'ana lang le sotua imbalunye entoki ino pooki naata pee iya.” Eitu eyiolou Yakobo ajo Raheli natupurroyie nena aitin.

³³Metaa etijing'a Laban olng'obor le Yakobo, neitoki alo olng'obor le Lea neitoki alo oloo nkaisiaayiak enyena pokira, neitu etum ninche katukul. Nepuku aing'uaa olng'obor le Lea, nejing olng'obor le Raheli.

³⁴Ore ina kata earr Laban ilng'oborri naa Raheli apa naawa inkaitin enkaji e Papaai lenye nepik abori olorika otonieki te ntames, netonie ninche. Near Laban olng'obor pooki, kake eitu etum ninche.

³⁵Nejoki Raheli Papaai, lenye, “Mincho olkitok lai egoro amu maaidim aitasho te dukuya iyie, amu kaata empukunoto oo nkituaak.” Metaa etuturuo aing'oru oleng neitu etum inkaitin enkaji enye tukul.

³⁶Neaku etagore Yakobo oleng oleng metaa keitarriki Laban, nejoki Yakobo Laban, “Kainyoo doi enkitarruorroto ai? Kainyoo eng'oki ai pee kitusujua te ngoro sapuk?

³⁷Ore hoo nitijing'a aidapash intokitin aainei, kainyoo inoto tiatua naara imasaa enkaji ino? Iyau irragie tene te dukuya iltung'ana laainei le sotua o te dukuya iltung'ana linono le sotua pee etum aatirrish iyiook pokira.

³⁸Kitaboitate tenebo o iyie kulo arin tikitam; neitu aikata eibiru isupeni e kerra inono anaa inkineji inono, neitu anya ilmeregeshi loo ntare inono.

³⁹Ore nena naainosa ing'uesi e ntim eitu aayaki, nanu otalaa, kintalaa pooki enatupurroyioki dama anaa kewarie.

⁴⁰Metaa neijia apa atiu aanya enkolong naa neijia etiu enkewarie, nemeekure apa atumoki aimula nkonyek airurayu.

⁴¹Ore te kulo arin tikitam latotona te nkaji ino; naataasaka esiaai ilarin tomon oong'uan te nkaraki intoyie inono pokira are, naataasaka esiaai ilarin ile too ntare inono, nimbelekenya olekoisiaayio lai katitin tomon.

⁴²Tenaa aime Enkai duoo e papaai lai Enkai e Abraham tenebo o lturiaki le Isaak ootii enkalo ai, kesipa katukul inchere anaata kinchoo mashomo too nkaik naarook. Etoduaa Enkai osina lai tenebo o esiaai oo nkaik aainei, nikisikong ng'ole kewarie.”

⁴³Ina peyie ewalu Laban ajoki Yakobo, “Ore kuna toyie naa inaainei, ore kuna kera naa inaainei, ore kuna tare naa inaainei, naa ore pooki nidolita naa inaainei. Kake kaa naa aitaas kuna toyie aainei ena olong aashu inkera enye naatoiutuo ninche? Wou taata maitayu olning'o te rishata ai o iyie.

⁴⁴Ore iyie o nanu naa inchoo metijing'a shakeni erishata ang.”

⁴⁵Ina peyie eyau Yakobo osoit, neitasheyie aitaa eng'ape.

⁴⁶Nejoki Yakobo iltung'ana lenyena le sotua, “Entasotu isoito,” neyau pooki isoito neitayu osototi; nenya endaa te mbata e ilo sototi loo soito.

⁴⁷Neipot Laban ine ajo Yegarsahaduta[18], neipot ninye Yakobo ajo Gilead.

⁴⁸Nejo Laban, “Ore ele sototi loo soito naa shakeni te rishata ino o nanu tena olong.”

⁴⁹Metaa eipoto ine ajo Gilead, ore eng'ape nejo Mispa, nejo, “Inchoo meing'ura Olaitoriani erishata ai o enino, tinikipuo aalama,

⁵⁰Tinintanyamal intoyie aainei, anaa tiniyam kulie kituaak neme intoyie aainei, ore hoo nemetii likae lee ine oyiolo, tadamu ajo, Enkai ninye shakeni te rishata ai o iyie.”

⁵¹Ina peyie ejoki Laban Yakobo, “Ing'ura ele sototi loo soito tenebo o eng'ape naitasheyie ena olong te dukuya iyie o nanu.

⁵²Ore ele sototi naa shakeni naa neijia etiu eng'ape, inchere migiru ele sototi loo soito, nimilang'u sii iyie ele sototi loo soito kilang'aki, neijia etiu eng'ape kilotu aitame nanu.

⁵³Ore Enkai e Abraham o Nkai e Nahor o Nkai oo papaai lenye inchoo metirisha iyiook.” Ina peyie enya Yakobo olmumai te uriata e papaai lenye, Isaak.

⁵⁴Neitayu Yakobo olasar to ldoinyo neipoti iltung'ana lenyena le sotua meinosa endaa, nenya endaa netoni enkewarie pooki te ilo doinyio.

⁵⁵Ore tadekenya enasirie, neinyototo Laban ayooki ang'utut inoo nkakuyiaa enyena tenebo o intoyie enyena nemayian ninche; nerrinyo alo enkang enye.