Read MAASAI REVISED PROTESTANT Enkiterunoto 38 Bible Online

Enkiterunoto 38 - MAASAI REVISED PROTESTANT bible

Enkiterunoto 38

¹Ore te nena olong'i, etadoyie Yuda alo aing'uaa ilalashera lenyena nelo aitaa elatia oltung'ani obo le Adullam oji enkarna enye Hira.

²Ore etii ine nedol Yuda entito e likae tung'ani loo Lkanaan neji enkarna enye Shua; neyam ninye nelo aboitare.

³Neiroshiu neiu enkayioni, nedung'oki ninye enkarna ajo Eri.

⁴Neitoki ake anutayu neiu enkayioni, nedung'oki ninye enkarna enye ajo Onan.

⁵Neitoki ake aigil aiu enkayioni, neisho ng'otonye enkarna enye ajo Shela. Naa Kesib apa etii peyie eiu Shela.

⁶Neyamaki Yuda olayioni lenye kikau Eri enkitok, naji enkarna enye Tamar.

⁷Kake ore apa ilo kikau lenye oji Eri, naa oltung'ani apa arruoni oleng te dukuya Olaitoriani; near Olaitoriani ninye metua.

⁸Ina peyie ejoki Yuda Onan, “Shomo tijing'aki ina kitok oliai o lalashe lino tayiolo ninye, pee etum olalashe lino nkera te iyie.”

⁹Kake keyiolo apa Onan ajo ore inkera naaiu nemeaku inenyena, neaku ore ake peyie elo ayiolou enkitok olalashe lenye, nebukoki enkare e lewaisho enkop pee meisho ake inkera olalashe lenye.

¹⁰Ore ina nataasa, eitu katukul eitiship Olaitoriani, near sii ninye metua.

¹¹Ina peyie ejoki Yuda Tamar ina kitok o layioni lenye. “Totona ira enkoliai te nkaji e papaai lino, o metaba anaa nebulu olayioni lai Shela.” Amu etureishe ajo keidim sii ninye atua anaa ilalashera lenyena. Metaa eshomo Tamar enkaji e menye.

¹²Ore etulusoyie enkiti rishata neye enkitok e Yuda, entito e Shua. Ore peyie eitagoli Yuda, nelo ninye tenebo o lchore lenye Hira le Adulam ewueji neji Timna, ewueji nebarnieki intare enyena.

¹³Ore peyie elikini Tamar aajoki, “Ekeloito olaputani lino Timna abarn intare enyena.”

¹⁴Neitayu to sesen lenye inkilani enyena e nkoliai, nepika enkarasha aitoipie elukunya enye peyie medoli enkomom, nelotu aton te kishomi e Enaim, natii enkoitoi nalala nalo Timna; amu etodua ajo etubulua Shela, neitu eishori ninye meyama.

¹⁵Ore peyie edol Yuda ninye, nedamu ninye ajo inoshi kituaak naibor onyek, amu eitoipo ninye enkomom enye.

¹⁶Nelo ninye enetii te mbata enkoitoi nalala nejoki ninye, “Wou inchooki maatayiolo,” amu eitu eyiolou ninye ajo entito o layioni lenye. Nejo ninye, “Kainyoo naa kincho peyie kitum atayiolo?”

¹⁷Newaliki ajoki, “Ekaairriwaki olkuoo too ntare aainei.” Nejo Tamar, “Amaa aikincho entoki ino naibung naarreshunye o terewakaki ilo kuo?”

¹⁸Nejoki Yuda, “Kainyoo iyieu naaisho?” Newaliki ajoki, “Inchooki olgisoi lino o enkeene ino o ina ng'udi ino nimbung'ita te nkaina ino.” Neaku eishooyie ninye ninche nelo ayiolou ninye neiroshiu ninye.

¹⁹Neinyototo Tamar alo; neitayu enkarasha te nkomom neishop inkilani enyena oo nkolia.

²⁰Ore peyie eirriu Yuda olkuoo meyau olchore lenye le Adullam, peyie etum enaduoo kitok aishoru intokitin naata e Yuda, nelotu alau ninye te naduoo wueji.

²¹Neikilikuan ninye iltung'ana ootii ine ajoki, “Koree ake enkitok mulayoi natii naaji embata enkoitoi nalala e Naim aton?” Nejo ninche, “Meetae emulayoi natii ene.”

²²Neaku etushukokine Yuda nejoki, “Eitu alo atum, netejo sii iltung'ana le ine, ‘Metii emulayoi natii ine.’ ”

²³Newaliki Yuda ajoki, “Inchoo ninye eya nena tokitin aitaa inenyena, peyie mekueniyieki ake iyiook, idol ajo airriwaka ele kuo, neitu ilo ainepu ninye.”

²⁴Ore peyie eishunye ilapaitin okuni, nelikini Yuda aajoki, “Ore Tamar enkitok o layioni lino, etaa emulayoi, ore ake sii keiroishi te nkerai e mulayaisho.” Nejo Yuda, “Entoriku entupuku boo peyie kipuo aapejoo ninye.”

²⁵Ore eitupukuni boo, neirriwaa olkilikuai airriwaki olaputani lenye nejoki, “Olopeny kuna tokitin anotie enkerai.” Nejo, “Ing'ura tujurru, aatasayia, ainkuneng'ae kuna tokitin o lgisoi o enkeene o eng'udi.”

²⁶Nenyorraa Yuda ninche nejo, “Aisinyati ninye peyie aalang, anaa keitu apa aitabaya ororei lai aisho ninye olayioni lai Shela meyama.” Neitu eitoki aikata ayiolou ninye.

²⁷Ore peyie ebau enkata najing Tamar aji neiu ilmao te ishoi.

²⁸Ore earita enkop, neitayu obo enkaina aitupuku neng'amaa enkaitoiyioni neeniki ina aina enkopito pile, ejoito, “Ele otang'asunye.”

²⁹Kake ore erriny enkaina enye, nepuku olalashe, nejo enkaitoiyioni, “Metaa inji doi inkununye tinipuku!” Nedung'okini ninye enkarna enye aajo Peres[23].

³⁰Ore te siadi nepuku olalashe lenye eeta enaduoo opito pile eenikino enkaina enye; neipoti enkarna enye aajo Serah[24].