Read MAASAI REVISED PROTESTANT Enkiterunoto 41 Bible Online

Enkiterunoto 41 - MAASAI REVISED PROTESTANT bible

Enkiterunoto 41

¹Ore peyie eishunye ilarin oaare oolulung'a, neidetidet Farao enkidetidet natoduaa kewan eitashe te mbata o lkeju le Nail.

²Nedol etupukutuo aailepu to lkeju le Nail inkishu naapishana sidain naapir, nenya ilo kujita otii embata olkeju.

³Nedol eetuo kulie kishu naapishana sasin, naaikinyoot aailepu to lkeju le Nail aasuju ninche, neitashe te mbata oo nkulie te nkiyopata olkeju le Nail.

⁴Ore nena kishu sasin naaikinyoot, nenya nena kishu sidain naapir. Neputunye Farao te nkidetidet.

⁵Neitoki airura neitoki aidetidet eniare, nedol ilukuny naapishana loo lpaek oopir naa sidain ebulu to lpaeki obo.

⁶Nemaniki peyie eitalioo ilukuny pokira naapishana, neitoki kulie kiyiaa naapishana aaliooyu naa sasin naaitoyio enkijape naing'uaa enkalo oloosaen.

⁷Ore nena lukuny sasin e ntapa neijoo ilkiyiaa oopishana sidain oopir. Neputunye Farao nedol ajo enkidetidet duoo ake ina.

⁸Metaa ore peyie ekenyu etanyamala oleng Farao to oltau lenye, neirriwaa olkilikuai meipoti ilasakutok o ltung'ana le Misiri o olang'eni pooki, neliki Farao ninche ina kidetidet enye pooki, neitu etumi obo te ninche ooidim aibelekenya ina kidetidet aliki Farao.

⁹Nejoki olaitasheikinoni kitok le naisho oo sabibu Farao, “Atadamua taata inkitarruorrot aainei.

¹⁰Ore apa peyie egorokino Farao ilaisiaayiak lenyena, naapik nanu tenebo o lapejoni kitok loo mukateni enkaji narripieki iltung'ana arruok natii enkaji olkitok le rripore,

¹¹nikindetidet pokira ina kewarie, ore iyiook pokira meeta oleitu eidetidet enkidetidet enye naata eutunoto enye.

¹²Netii apa oloti barnoti loo Lbrania oboitare iyiook teine, olaisiaayiani lo lkitok le rripore, ore peyie kiliki ninye nena kidetidetat neibelekenyaki ninye yiook, aisho ake enkipirta e nkidetidet pooki ng'ae anaa enatiu enkidetidet enye.”

¹³Naa ore peyie eliki iyiook, nelotu aaku ina natolimuo, naashukokini esiaai ai, ore olapejoni kitok loo mukateni nepuoi aailili.

¹⁴Neirriwaa Farao olkilikuai meipoti Yosef, neyauni ninye aaitasieku aaitung'uaa jila, ore peyie eidip atabarnoyu neibelekeny sii inkilani enyena nelotu atua aitashe te dukuya Farao.

¹⁵Nejoki Farao Yosef, “Anoto det enkidetidet, nemeetae likae tung'ani laaidim aibalakinye ninye, natoning'o eji ore peyie ining enkidetidet naa indim aibelekenya.”

¹⁶Newaliki Yosef ajoki, “Mme nanu etii ewalata, keisho Enkai Farao ewalata sidai naitiship.”

¹⁷Ina peyie ejoki Farao Yosef, “Atoduaa te nkidetdet ai, aitashe apa te nkiyopata olkeju le Nail,

¹⁸nepuonu inkishu naapishana naapir naa sidain aailepu to lkeju le Nail, neiteru aadaa tiatua Olng'arua,

¹⁹nepuonu kulie kishu naapishana enetii, naa ore ninche naa sasin neikinyoot ineitu aikata adol te nkop e Misiri.

²⁰Ore nena kishu sasin naaikinyoot, nenya nena kishu e dukuya naapishana

²¹kake ore peyie eidip aainosa ninche, meetae hoo obo otayiolo ajo einosa ninche, inkulie amu eton ake emuoyiaa naa sasin anaa enatiu te nkiterunoto. Ina peyie aputunye.

²²Anyaaka ake sii te nkidetidet ai adol ilkiyiaa oopishana oobulu to lpaeki obo oobore naa sidain.

²³Ore kulie kiyiaa naapishana, netoito, naa sasin, neitoi olkutati lo loosaen.

²⁴Etubulakita ninche, Ore lelo kiyiaa sasin lo lpaek neijoo lelo kiyiaa oopishana sidan. Natolikio nanu nena kidetidetat ilasakutok kake metii hoo obo laaidima atoliki ina kidetidet.”

²⁵Ina peyie ejoki Yosef Farao, “Ore enkidetidet e Farao naa nabo; eitoduaa Enkai Farao enataa kejo pee eas.

²⁶Ore inkishu naapishana sidain naapir, naa ilarin oopishana, ore ilkiyaa oopishana sidain naa ilarin oopishana; ore enkidetidet naa nabo.

²⁷Ore inkishu sasin naaikinyoot naapishana, naaetuo aasuju ninche naa ilarin oopishana, ore ilkiyiaa lemeeta toki oopishana ooitoyio olkutati lo loosaen naa ilarin lo lameyu oopishana.

²⁸Eketiu anaa enatiaaka Farao, eitoduaa Enkai Farao enataa kejo pee eas.

²⁹Kepuonu ilarin oopishana ootumieki endaa sapuk te nkop pooki e Misiri,

³⁰kake ore ake peyie eishunye lelo arin, nepuonu ilarin oopishana lo lameyu sapuk, ore lelo arin pooki le ndaa sapuk nerikinisho te nkop pooki e Misiri, nemut olameyu ena kop.

³¹Neaku meitokini ninye aadamu enapa naatae sapuk te nkaraki ilo ameyu osuju, amu ekeaku torrono oleng.

³²Ore enkigilata enkidetidet e Farao, neitodolu inchere ore ina siaai naa Enkai natipika, naa keyau Enkai aitaa te nkata nemelakua.

³³Inchoo naa tena kata Farao egelu oltung'ani oisiligayu neeta sii eng'eno neisho ninye meitasheiki enkop e Misiri.

³⁴Shomo dukuya tegelu ilaitashekinok tena kop niya ematua e imiet e pooki daa naiu enkop e Misiri te kulo arin oopishana le ndaa sapuk.

³⁵Nincho ninche metasoto endaa pooki e kulo arin sidain oopuonu, neiteng'eli ilpaek tiabori enkitoria e Farao pee eaku endaa too nkanas, nincho ninche meiteng'ela.

³⁶Ekeaku ina daa enashumi te nkaraki enkop te lelo arin oopishana lo lameyu oopuonu ena kop e Misiri, pee meidaaya enkop teina rishata o lameyu.”

³⁷Ore ina bae naa aisidai apa oleng te Farao o too laisiaayiak lenyena pooki.

³⁸Nejoki Farao ilaisiaayiak lenyena, “Aikindim aanoto oltung'ani laaijo ele, otii Enkiyang'et e Nkai atua ninye?”

³⁹Ina peyie ejoki Farao Yosef, “Ore amu kintoduaa Enkai kuna pooki, meetae likae arriyia naa ng'en laaijo iyie;

⁴⁰iyaku olaitasheiki enkaji ai, ore iltung'ana laainei pooki ekeaku ilooning ina nintanap; meteleku to lorika le nkitoo ake aaku nanu kitok te iyie.”

⁴¹Nejoki Farao Yosef, “Ng'ura ajo Aategelua iyie ntasheiki enkop pooki e Misiri.”

⁴²Neitayu Farao olgisoi lenye lo lmishire te nkaina enye, nepik enkaina e Yosef; neishopoki ninye ilkilani le kitani oopuyiapui, nepik olpisiai le saabu emurt enye.

⁴³Neisho ninye Farao meshomo ekedito engarri enye e are oo mbartan, neishir olarriponi lenye te dukuya ninye ajo, “Entigil kung!” Neaku etipikaki Yosef meitasheiki ina kop pooki e Misiri.

⁴⁴Ore ake sii, etiaaka Farao Yosef, “Ekara Farao, naa ore teneme to rorei lino, meetae oltung'ani odumu enkaina anaa enkeju te nkop pooki e Misiri.”

⁴⁵Neisho Farao Yosef enkarna oo Lmisiri ajo Safenatapanea; neisho ninye meyama Asenat, ina tito e Potifera olapolosani le Oni. Metaa eshomo Yosef enkop e Misiri.

⁴⁶Oloo larin tomoni uni apa Yosef peyie ejing enkisiaayiare e Farao olaiguanani le Misiri. Nelo Yosef aing'uaa Farao, nelo aman enkop pooki e Misiri.

⁴⁷Ore te lelo arin oopishana lo lari sapuk, enoto enkop eishoi sapuk,

⁴⁸neiturrurru indaiki pooki oo larin oopishana eton eetae endaa sapuk te nkop e Misiri, neshum endaa pooki too nkanas, etushuma te pooki anasa ina daa naing'uaa nkurman naamanita.

⁴⁹Neshum Yosef entapa te nkumoi naba anaa osinyai le naiposha o metaa meekure eyiolo eneba ndaiki te nkumoi amu aimeekure etemayu.

⁵⁰Ore eton eitu elotu olari lo lameyu, eeta Yosef ina rishata ilayiok aare, ootoikio Asenata entito e Potifera olapolosani le Oni.

⁵¹Nedung'oki Yosef ilo kikau lenye enkarna ajo Manase[26], amu etejo, “Aishoo Enkai maatorikinoto ingolikinot aainei pooki, o enkaji e papaai lai pooki.”

⁵²Neipot enkarna oliare ajo Efraim[27], “Amu aitaa Enkai olotubula tena kop enyamali ai.”

⁵³Nebau enkiting'oto oo larin oopishana le sapuko e ndaa.

⁵⁴Neiteru ilarin oopishana lo lameyu aabau, anaa enatejo apa Yosef. Neaku olameyu sapuk too nkuapi pooki; kake ore te nkop pooki e Misiri, netii endaa ina rishata.

⁵⁵Ore peyie eishunye indaiki te nkop e Misiri to lorere, neishiraki olorere Farao meishoo endaa; nejoki Farao iltung'ana pooki le Misiri, “Enchom enetii Yosef, ore pooki najoki intae, entaas.”

⁵⁶Metaa ore peyie eibulu olameyu ina kop pooki, nebol Yosef inkajijik naashumishoreki, nemiraki ninye Ilmisiri ilpaek, amu etaa torrono olameyu oleng te nkop e Misiri.

⁵⁷Ore ake sii, eetuo iloreren pooki le nkop Misiri enetii Yosef aainyiang'u ilpaek, amu aitorrono apa olameyu te nkop pooki nalulung'a.