Read MAASAI REVISED PROTESTANT Enkiterunoto 43 Bible Online

Enkiterunoto 43 - MAASAI REVISED PROTESTANT bible

Enkiterunoto 43

¹Etaa apa olameyu sapuk oleng te nkop e Kanaan.

²Ore pee emut ina tapa nayautua te Misiri, nejoki papaai lenye ninche, “Enyaaki enchom, enyiang'aki iyiook enkiti daa.”

³Kake etiaaka Yuda ninye, “Eitanapa apa iyiook ilo tung'ani ajoki iyiook, ‘Midolidolo enkomom ai, aashu ake tenaa ketii olalashe linyi tenebo intae.’

⁴Tinirriwaa olalashe lang tenebo iyiook, naa aikipuo ainyiang'aki iyie endaa teine,

⁵kake tinimirriwaa ninye nimikipuo ine, amu etiaaka apa iyiook, ilo tung'ani, ‘Midolidolo enkomom ai tukul, aashu tinirikitoto ake olalashe linyi.’ ”

⁶Nejo Israel, “Kainyoo doi pee kinkuna inji aitamuoi aaliki ilo tung'ani aajoki iatata likae alashe?”

⁷Newaliki aajo, “Ore ilo tung'ani, eikilikuanishore iyiook te nkarriyiano aikilikuanu imbaa naaipirta iyiook o lmarei lang nejoki iyiook, ‘Keton eishu papaai linyi? Iyatata likae alashe?’ Ore nena nikitiakita naa iwalat e nena kikilikuanat; ijo duoo aikinteiki aajo kejoki iyiook, ‘Eyau olalashe linyi ene?’ ”

⁸Nejoki Yuda Israel, Papaai lenye, “Inchoo enkayioni elo tenebo nanu, nikidumunye aapuo pee mikiiye iyiook o iyie o tenebo inkera ang.

⁹Aitayio enkishui ai te nkaraki ninye metaa te nanu ing'oru ninye. Teneitu ashuku ninye enitii naitasheyie ninye te dukuya iyie, neaku entorroni ai intarasi.

¹⁰Amu teneitu taa doi apa kimutie anaata taata kindipa aashom ine katitin are nikishukunye.”

¹¹Nejoki papaai lenye Israel ninche, “Tenaa neijia etiu, entaas ena, ewaita embata oo lng'anayio gelunot lena kop too lbenia linyi, niyakiki ilo tung'ani enkishooroto, enkiti ilata narropil o enkiti aisho o emanoo o enkorropil o lng'anayio lo lchani onyaanyukie oseki.

¹²Niyaya impisai kat are ipuopuo, nirrinyirrinyi inapa pisai naatushukokoki intae too nkutukie oo lbenia linyi; amu ebaiki apa naa keitu edoli.

¹³Entorik sii ninye olalashe linyi nidumunyenye aapuo, nishukokinono enetii ilo tung'ani,

¹⁴meishoo intae Enkai Magilani olng'ur te dukuya ilo tung'ani, pee etum aishoo intae entushuku olikae alashe linyi o Benchamen. Tenaa apa kaiturraa inkera aainei, inchoo aiturraa.”

¹⁵Neaku ewaita iltung'ana inkishoorot, neya irridat maare oo mpisai tenebo ninche o tenebo Benchamen; nedumunye aadoyio aapuo enkop e Misiri neitashe te dukuya Yosef.

¹⁶Ore pee edol Yosef Benchamen tenebo ninche, nejoki ilo aitasheikinoni le nkaji enye, “Toriku lelo tung'ana atua aji niyiang'aki, amu kenya ninche taata endaa tenebo nanu teneipir enkolong.”

¹⁷Neas ilo sinka anaa enaitanapa Yosef ninye, nerik lelo tung'ana enkaji e Yosef.

¹⁸Neureishoyu iltung'ana amu eyawuaki ninche enkaji e Yosef, nejo, “Te nkaraki taa inapa pisai naatipikaki ilbenia lang te nkata e dukuya, ina pee etum anoto enaitaas iyiook nebaiki aitaa iyiook irrindiki neibung isirkon lang.”

¹⁹Metaa eshomo ninche enetii olaitasheikinoni le nkaji e Yosef, neirorie ninye te kutuk aji nejoki.

²⁰“Oi olkitok lang, kietuo apa enkata e dukuya ainyiang'u endaa;

²¹ore kipuoito te nkoitoi, ore ewueji nikirraga nikibol ilbenia lang, nemeeta olbene hoo obo lemetii irridat loo mpisai enkutuk olbene lenye, eba ake impisai anaa apake; neaku kitorrinyutuo pooki,

²²nikiyautua sii too nkaik ang kulie pisai nikinosie endaa. Mikiyiolo aajo aing'ae otorrinyoko impisai ang ilbenia lang.”

²³Nejoki olaitasheikinoni ninche, “Entotoni miatata enkuretisho; ore Enkai inyi o Enkai oo loo papaai linyi ninye natipika ilo shumati atua ilbenia linyi apikaki intae; atang'amayie impisai inyi.” Neriku ninye Simon enetii ninche.

²⁴Ore pee eriku ilo tung'ani lelo tung'ana atua enkaji e Yosef, neisho ninche enkare, neisuj inkejek enye, neisho sii isirkon lenye olkujita onya.

²⁵Nerretena aanyu elotunoto e Yosef enaipirie enkolong, amu etoning'o aajo kenya endaa tenebo teine.

²⁶Ore pee elotu Yosef ang, neyau atua enkaji enye inkishoorot naata, neirrugokino ninche ninye aabaiki enkop.

²⁷Neikilikuan Yosef ninche ilomon le seriani ajo, “Aisupat papaai linyi, ilo apa payian kitok liimakiita? Keton eishu?”

²⁸Nejo ninche, “Ore osinka lino, papaai lang naa aisupat neton eishu.” Neirrug ilukuny enye te dukuya ninye te nkanyit sapuk.

²⁹Nedumu Yosef inkonyek enyena nedol olalashe lenye Benchamen, olayioni le ng'otonye nejo, “Kele doi olalashe linyi oti ilo apa likitolikitio? Miking'urrie iyie Enkai enkayioni ai!”

³⁰Neisarrisar Yosef amu etayiewua oltau lenye olalashe lenye te nkirimo sapuk, nelo aing'oru ewueji nelo aishirie. Nejing atua olgilata, nelo aishir teine.

³¹Ore pee eidip aishira, neituku enkomom enye nepuku; neitagol kewan nejo, “Enchoo endaa eyauni.”

³²Neng'asi aaisho Yosef eton openy, neitokini aisho ninche etoni oopeny, ore Ilmisiri ootoni oopeny neishori sii ninche aa ninche ake, amu ebaiki nemeng'ar Ilmisiri endaa tenebo Ilbrania, amu entoki ina naa enturuj too Lmisiri.

³³Netoni pooki te dukuya Yosef anaa enaikunari te mbotoro eiteru to lbotor te inoto ometabaiki oloti te inoto anaa kitisho enye; neing'or iltung'ana ate te nking'asia sapuk.

³⁴Neyakini pooki endaa naing'uaa emisa e Yosef, kake ore ene Benchamen naa katitin imiet te sapuko elusoo too nkulie. Metaa etookishote ninche neshipa tenebo Yosef.