Read MAASAI REVISED PROTESTANT Enkiterunoto 5 Bible Online

Enkiterunoto 5 - MAASAI REVISED PROTESTANT bible

Enkiterunoto 5

¹Ore ena buku naa ene ishoi e Adam. Ore peyie eitayu Enkai oltung'ani, eitayio ninye te nkitanyaanyukoto enye makewan.

²Eitayio ninye olee o nkitok nemayian ninche neipot ninche ajo, “tung'ani” peyie eidip eitobiru.

³Ore peyie eeishu Adam ilarin iip nabo o tomoni uni, neaku ninye menye lo layioni laa ninye kewan enyaanyukie, neipot ninye ajo Seti.

⁴Ore inkolong'i e Adam anaa peyie eaku menye le Seti naa ilarin iip isiet. Neeta apa kulikae ayiok o ntoyie.

⁵Metaa ore inkolong'i pooki e Adam naa ilarin iip naaudo o tomoni uni, neye ninye.

⁶Eishua Seti ilarin iip nabo o imiet, neaku menye le Enosh.

⁷Nebik seti anaa peyie eini Enosh ilarin iip isiet o naapishana, neeta apa kulikae ayiok o ntoyie.

⁸Metaa ore inkolong'i pooki e Seti naa ilarin iip naaudo o tomon aare, neye ninye.

⁹Ore peyie ebik Enosh ilarin intomoni naaudo, neaku menye le Kenan.

¹⁰Nebik Enosh eidipaki aatoiu Kenan ilarin iip isiet o tomon o miet, neeta apa kulikae ayiok o ntoyie.

¹¹Metaa ore inkolong'i pooki e Enosh naa ilarin iip naaudo o imiet, neye ninye.

¹²Ore peyie ebik Kenan ilarin intomoni naapishana, neaku menye le Mahalel,

¹³nebik Kenan etoiwuoki Mahalel ilarin iip isiet o artam, neeta apa kulikae ayiok o ntoyie.

¹⁴Neaku inkolong'i pooki e Kenan ilarin iip naaudo o tomon, neye ninye.

¹⁵Ore peyie eeishu Mahalel ilarin ntomoni ile o miet, neaku menye le Yared.

¹⁶Nebik Mahalel etoiwuoki Yared ilarin iip isiet o tomoni uni, neeta apa kulikae ayiok o ntoyie.

¹⁷Metaa ore inkolong'i pooki e Mahalel naa ilarin iip isiet o ntomoni naaudo o miet, neye ninye.

¹⁸Ore peyie eeishu Yared ilarin iip o ntomoni ile oaare, neaku menye Enok.

¹⁹Nebik Yared etoiwuoki Enok ilarin iip isiet, neeta apa kulikae ayiok o ntoyie.

²⁰Metaa ore inkolong'i pooki e Yared naa ilarin iip naaudo o ntomoni ile oaare, neye ninye.

²¹Ore peyie eeishu Enok ilarin ntomoni ile o imiet, neaku menye le Metusela.

²²Eiriamariyie Enok Enkai eidipaki aatoiu Metusela ilarin iip uni, neeta apa kulikae ayiok o ntoyie.

²³Metaa ore inkolong'i e Enok naa ilarin iip uni o ntomoni ile o imiet.

²⁴Nelo Enok tenebo Enkai, nelai ninye amu ewa Enkai ninye.

²⁵Ore peyie eeishu Metusela ilarin iip o ntomoni isiet o naapishana, neaku menye le Lamek.

²⁶Nebik Metusela etoiwuoki Lamek ilarin iip naapishana o ntomoni isiet oaare, neeta apa kulikae ayiok o ntoyie.

²⁷Metaa ore inkolong'i pooki e Metusela naa ilarin iip naaudo o ntomoni ile o naaudo neye ninye.

²⁸Ore peyie eishu Lamek ilarin iip o ntomoni isiet oaare, neiu olayioni,

²⁹neipot enkarna enye ajo Noa. Nejo: “Ore tiatua enkop natediaa Olaitoriani, ele ninye oyooki ayaki iyiook enkilejilej too siaaitin ang o too nyamalaritin oo nkaik ang.”

³⁰Nebik Lamek etoiwuoki Noa ilarin iip imiet o ntomoni naaudo o imiet, neeta apa kulikae ayiok o ntoyie.

³¹Metaa ore inkolong'i pooki e Lamek naa ilarin iip naapishana o ntomoni naapishana o naapishana, neye ninye.

³²Ore etaa Noa oloo larin iip imiet, neaku menye le Shem o Ham o Shafet.