Read MAASAI REVISED PROTESTANT Enkiterunoto 50 Bible Online

Enkiterunoto 50 - MAASAI REVISED PROTESTANT bible

Enkiterunoto 50

¹Ina pee ebatatakino Yosef enkomom e menye neishiraki ninye, neng'utut ninye.

²Neitanap Yosef isinkan lenyena lelo kitarrini meitobira osesen le papaai lenye pee meng'uoyu. Metaa eitobira ilkitarrini osesen le Israel pee meng'uoyu.

³Ewa enkielata inoshi ake olong'i artam naasieki ina siaai e nkitobirata o sesen. Neishiraki Ilmisiri ninye too nkolong'i ntomoni naapishana.

⁴Ore pee eishunye inkolong'i naaishirakinyeki ninye, neirorie Yosef olmarei pooki le Farao nejoki, “Ore taata tenanoto omom too nkonyek inyi eroro, atasayia intae entiaki Farao,

⁵aainosie apa papa olmumai aajoki, ‘Etaa kaye: te nkurare ai natuturoko kewan te nkop e Kanaan, ninye kinukarierie nanu.’ Metaa ore naa taata nchooki nanu mashomo atasayia ntae, pee alo anukaa papa, pee aitoki ashukunye.”

⁶Newaliki Farao Yosef ajoki, “Shomo, tunukai papaai lino anaa apa enikinosie olmumai.”

⁷Metaa eshomo Yosef anukaa papaai lenye, neiriamariyie ninye isinkan pooki le Farao, o lpayiani lo lmarei lenye pooki tenebo ilpayiani pooki le nkop e Misiri.

⁸Tenebo enkaji pooki e menye o enenye o lalashera lenyena o lmarei pooki le papaai lenye, nkera enye ake etung'uayioki o ntare o nkishu te nkop e Goshen.

⁹Metaa eshomo tenebo ninye ingarrin oo mbartan o lakedok loo mbartan; metaa olorora kitok apa oleng.

¹⁰Ore pee ebau olkurroto oidong'ishoreki te wueji neji Atad natii oloosaen le Yordan, neishir teine olkiyioi sapuk le nkishirita o sina; neitobiraki Yosef enkishirata e papaai lenye too nkolong'i naapishana.

¹¹Ore pee edol Ilkanaani aa ninche iloopeny ina kop enkishirata to lkurroto ooidong'ishoreki le Atad, nejo ninche, “Ore ena kishirata naa eno sina kitok too Lmisiri.” Metaa eishooki apa ine wueji enkarna aajo Abel-Misraim; naa dukuya e Yordan etii.

¹²Ina apa eitaasa ilayiok le Yakobo menye anaa enaitanapa ninche;

¹³mu etanapa apa ilayiok lenyena ninye aaya enkop e Kanaan, nenukaa ninye te nkapune natii enkurma e Makpela, natii oloosaen le Mamre, nainyiang'ua apa Abraham tenebo o enkurma e Efron lo Lhiti, metaa ewueji enye oo nkuraren.

¹⁴Ore pee eidip atunukai papaai lenye, neshuko Yosef alo Misiri tenebo o ilalashera lenyena o lelo pooki oiriamariyie ninye pee epuo aanukaa papaai lenye.

¹⁵Ore peyie edol ilalashera le Yosef aajo etua papaai lenye nejo ninche, “Ebaiki taa neibayu iyiook Yosef neitalak iyiook enapa lap nikintaasa iyiook ninye.”

¹⁶Metaa eirriwaitie ninche olkilikuai aairriwaki Yosef nejoki, “Eishorua apa papaai lino ena kitanapata eton eitu eye nejo,

¹⁷‘Entiaki Yosef, tapalaki, aatasayia enkitarruorroto oo lalashera linono o eng'oki enye, amu kintaasa ninche iyie entorroni.’ Ore naa taata, kisai iyie, tapalaki inkitadiaat oo sinkan le Nkai e papaai lino.” Neishir Yosef pee eirorie ilalashera lenyena ninye.

¹⁸Nepuonu ilalashera lenyena nebatata te dukuya ninye nejoki, “Ng'ura, aikira iyiook isinkan linono.”

¹⁹Kake etiaaka Yosef ninche, “Emiureishoyu, katii nanu ewueji e Nkai?

²⁰Ore te intae, naa entorroni apa kiyiewuakiki; kake eitaa ninye Enkai esidai, pee etum aitopuaa iltung'ana kumok anaa enatiu ena olong.

²¹Metaa emiureishoyu; kaisho intae eretoto tenebo o nkera inyi.” Neijia eikuna aitisipaki ninche neitagol ninche.

²²Metaa etotona Yosef te Misiri, ninye tenebo o lmarei le papaai lenye; nebik Yosef ilarin iip o tomon.

²³Einepua Yosef adol eishoi o layioni lenye Efraim e uni, etodua sii inkera e Makir olayioni le Manase naatoikioki olmarei le Yosef.

²⁴Nejoki Yosef ilalashera lenyena, “Etaa kaye, kake kelotu Enkai amayian intae, nelotu aitayu intae aitung'uaa ena kop arik intae enkop nainosakinye Abraham olmumai, o Isaak o Yakobo.”

²⁵Nenya Yosef olmumai too layiok le Israel nejoki, “Kemayian intae Enkai, naa entanap iloik lainei entung'uai ena kop.”

²⁶Metaa eirure Yosef, aa oloo larin iip o tomon te moruao; neitobir ninche osesen lenye pee meng'uoyu, nepiki osesen lenye osanduku te Misiri.