Read MAASAI REVISED PROTESTANT Enkiterunoto 6 Bible Online

Enkiterunoto 6 - MAASAI REVISED PROTESTANT bible

Enkiterunoto 6

¹Ore peyie eiteru iltung'ana aaponari ti oriong enkop, netoikioki ninche intoyie,

²nedol ilayiok le Nkai ilayiok le Nkai intoyie oo ltung'ana ajo aisidain, neyaki ate inkituaak anaa enagelu tenena, anaa enayieu.

³Nejo Olaitoriani: “Meitoki enkiyang'et ai amany tung'ani ntarasi, amu ore ninye naa keye. Keaku inkolong'i enyena ilarin iip nabo o tikitam.”

⁴Etii sii apa intiamasin sapuki enkop te nena olong'i, ore peyie epuonu ilayiok le Nkai aajing'aki aayiolou intoyie oo ltung'ana, neiki ninche inkera. Naa kulo apa iltung'ana magil liapa naa yiolot oleng.

⁵Nedol Olaitoriani enkarruoisho e tung'ani ajo etaa sapuk te nkop oleng, naa ore emusunoto o endamunoto enye pooki e atua oltau naa entorroni ake eponaa.

⁶Neinosu Olaitoriani ajo kainyoo pee eitobira oltung'ani te nkop, netum osina sapuk.

⁷Nejo Olaitoriani: “Kajutu tioriong enkop oltung'ani laitobira, tung'ani tenebo o ng'uesi o pooki toki naiserpepiari o motonyi o loing'ang'e, amu aanyaaka ainosu ajo kainyoo apa peyie aitobirua ninche.”

⁸Kake enoto Noa omom too nkonyek o Laitoriani.

⁹Kuna ninche iishoritin e Noa. Ore apa Noa naa oltung'ani oitashe too sipat, nemeeta entioto to lporror lenye: eiriamariyie Noa Enkai.

¹⁰Eeta sii apa Noa ilayiok okuni, Shem o Ham o Yafet.

¹¹Etarruoyie apa enkop oleng too nkonyek e Nkai, neiputa ninye o larrabal.

¹²Nedol Enkai enkop ajo etarruoyie oleng. Amu ore iseseni pooki neitarruoitie inkoitoi enye te nkop.

¹³Nejoki Enkai Noa, “Atumuta to ltau ajo kaiting'ie pooki sesen, amu eiputa enkop olarrabal te nkaraki ninche, idol ajo kaidakie nanu ninche o enkop”.

¹⁴“Intaiki kewan esafina to lchani le gofer, nipik ilgilat atua esafina, nimur atua o oriong te nkoronko.

¹⁵Naa inji ayieu ninkunu. Ore enkadori e safina naa intemat e nkaina iip uni, ore elalai naa intemat e nkaina onom, ore enkilepata eiteru te kop naa intemat e nkaina tomoni uni.

¹⁶Ntushura sii esafina, ning'uaa erishata e ntemata nabo e nkaina, pee eyau ewang'an. Nipik sii kutuk aji enchoto e safina. Nipik atua iorot oo nkajijik e abori o nempolos, o neshumata.

¹⁷Amu kayau oloirrag loo nkare shumata enkop, peyie eishu iseseni pooki ooata enkiyang'et e nkishui, tiabori keper, ore pooki toki natii enkop naa keye.

¹⁸Kake kaitasheyie olning'o lo sotua lai o iyie naa aijing iyie esafina, iyie o layiok linono o enkitok ino o nkituaak oo layiok linono tenebo o iyie.

¹⁹O pooki toki naishu naata osesen, iyau maare e pooki pukunoto atua esafina. Niramat ninche peyie meye; naa ore pooki naa oloing'oni ake o elipong.

²⁰Enoo motonyi te risioroto oo mpukunot enye enoo ng'uesi te risioroto oo mpukunot enye, enoo naaiserpepiari te risioroto e mpukunoto enye. Kejing maare anaa impukunot enye enitii, peyie iramat meye.

²¹Ore sii, kayieu niya atua esafina indaiki oo mpukunot pooki tushuma. Naa keaku endaa ino o ninche.”

²²Neas Noa nena; etaasa nena pooki naaitanapa Enkai ninye.