Read MAASAI REVISED PROTESTANT Enkiterunoto 8 Bible Online

Enkiterunoto 8 - MAASAI REVISED PROTESTANT bible

Enkiterunoto 8

¹Kake etadamua Enkai Noa o ng'uesi pooki, o nkishu pooki naaboitare ninye te safina. Neisho Enkai osiwuo meima shumata enkop, neng'oroo enkare,

²neiken sii inkonyek oo nkariak e nguton o lusien e keper. Neguarr enchan e keper.

³Neiteru enkare te nkop ang'oru. Ore te nkiting'oto enkolong e iip o onom, neiteru enkare ang'oroo te nkop.

⁴Ore to lapa liopishana, te nkolong e tomon o naapishana o lapa, nedou esafina airrag te nchumata o ldoinyo le Ararat.

⁵Neng'oru inkariak o metabaiki olapa le tomon. Ore peyie ebau enkiting'oto o lapa le tomon, te nkolong e dukuya olapa, nelioyu inchumat oo ldoinyo.

⁶Ore peyie eishunye inkolong'i artam, nebol Noa elusie eina safina naitobirua apa.

⁷Neirriwaa Noa olkurruk, neloolo to loing'ang'e ometoito inkariak te nkop.

⁸Neitoki airriwaa enturkuluo meing'urai tenaa keishunye inkariak ti oriong enkop.

⁹Kake eitu etum eneroro, nerrinyokino ninye atua esafina, amu eton etii inkariak oriong enkop pooki. Neitorioo Noa enkaina enye aibung ninye neyau ninye atua esafina ine netii.

¹⁰Neitoki aanyu kulie olong'i naapishana, neitoki aigil airriwaa enturkuluo aitupuku te safina.

¹¹Nerrinyunye enturkuluo teipa eeta embeneyioi nashal te nkutuk enye naitayio to lchani lo loirien. Neyiolou ina kata Noa ajo eishunye enkare te nkop.

¹²Neitoki Noa aanyu kulie olong'i naapishana, neirriwaa enturkuluo kake eitu eigil arrinyokino ninye.

¹³Ore to lari le iip ile o obo, to lapa le dukuya enkolong e dukuya o lapa, eishunye inkariak tioriong enkop, neiwuang'ie Noa enkikenet e Safina, nedol ajo etoyio oriong enkop.

¹⁴Ore to lapa li are te nkolong e tikitam o naapishana o lapa, netoyio apa enkop.

¹⁵Neirorie Enkai Noa ajoki,

¹⁶“Tupuku te safina, iyie o enkitok ino o layiok linono o nkituaak oo layiok linono, mpang'a shomo,

¹⁷toshoru tenebo iyie pooki toki naishu natii tenebo iyie e pooki sesen, imotonyi o ng'uesi o pooki toki naiserpepiari te nkop, peyie etum aatoisho aatubul aaiputa enkop.”

¹⁸Neipang Noa alo o layiok lenyena, o enkitok enye o nkituaak oo layiok lenyena.

¹⁹Ore pooki ng'ues o pooki toki naiserpepiari o pooki motonyi o pooki toki nalo tioriong enkop nepuku pooki anaa impukunot enye aaing'uaa esafina nepuo.

²⁰Ina peyie eshetaki Noa Olaitoriani ewueji olasar, neya pooki ng'ues nemeeta entioto, o pooki motonyi, nemeeta entioto, neitaki Enkai olasar opejori te nchumata olperere lo lasar.

²¹Ore peyie eing'uaya Olaitoriani esong'ouna narropil, nejo Olaitoriani to ltau lenye; “Maitoki aikata adek enkop te nkaraki oltung'ani, amu ore endamunoto oltau lo ltung'ani eiteru te keraisho naa intorrok, nemaitoki aekata aidakie pooki toki naishu anaa enataasa.

²²Ore eton eetae enkop, meishunye aekata enkata eunore o enkata enkikesare oo ndaiki o enkirobi o enkirowuaj o ladalu o loirujuruj o endama o enkewarie.”