Read MAASAI REVISED PROTESTANT Enkiterunoto 9 Bible Online

Enkiterunoto 9 - MAASAI REVISED PROTESTANT bible

Enkiterunoto 9

¹Nemayian Enkai Noa o layiok lenyena, nejoki ninche: “Entoisho entubul entoponari, emputa enkop.

²Keureyu intae pooki ng'ues natii enkop o pooki motonyi o loing'ang'e o pooki toki naiserpepiari te nkop, o pooki sinkirri le naiposha, keaku inkaik inyi etii.

³Ore pooki toki naishu nalo keaku endaa te intae, ore anaa enaishoo intae inkaitubulu naanyori, aishoo intae pooki toki.

⁴Minyanya ake inkiri naata enkishui enye, aa inchere osarge lenye.

⁵Amu ore osarge le nkishui naa kaitalaku, kaitalaku nanu te pooki ng'ues o te tung'ani, ore pooki ng'ae oar metua likae tung'ani naitalaku te nkishui enye.

⁶Ore oloba anaa oloibukoo osarge lo ltung'ani, naa oltung'ani oibukoo osarge lenye, amu eitayio Enkai oltung'ani te nkitanyaanyukoto enye makewan.

⁷Ore intae, entubul entoponari entaa kumok emputa enkop.”

⁸Nejoki Enkai Noa o te nebo ilayiok lenyena ooboitare:

⁹“Ing'ura ajo, kaitasheyie osotua lo lning'o o iyie o tenebo o ishoritin nikisuju,

¹⁰o pooki toki naishu nikiboitare o imotonyi o inkishu o pooki ng'ues enkop nikiboitare o pooki ake ninye natupukuo tiatua esafina.

¹¹Naa kaitasheyie osotua lai o ntae, aa inchere maitoki aekata amut iseseni pooki to loirrag le nkare, nemeitoki aekata enkop amuta te nkare.”

¹²Nejo Enkai: “Ele ninye olmonekie lo sotua lo lning'o laitayu te rishata ai o ntae, o pooki toki naishu natii tenebo intae o too lporori oosuju.

¹³Atipika olokirrai lai atua enkatampoi naa keaku olmonekie lo sotua lai o enkop.

¹⁴Tenayau inkatampo te shumata enkop, nedoli olokirrai too nkatampo,

¹⁵Naa kadamu nanu osotua lo lning'o lai otii erishata ai o intae, o pooki toki naishu e pooki sesen, nemeitoki aekata nkariak aaku oloirrag sapuk omut iseseni pooki.

¹⁶Ore etii olokirrai atua inkatampo, naa kaing'or ninye nadamu osotua lai lo lning'o ntarasi otii erishata Enkai o pooki toki naishu natii oriong enkop.”

¹⁷Nejoki Enkai Noa: “Ele ninye olmonekie lo sotua laitasheyie te rishata ai o pooki sesen otii oriong enkop.”

¹⁸Metaa ore ilayiok le Noa ootupukutuo te safina naa Shem o Ham o Yafet. Naa Ham apa menye le Kanaan.

¹⁹Ore kulo pokira okuni naa ilayiok le Noa, naa ninche ooiputa enkop pooki.

²⁰Noa apa olaturoni le dukuya le nkop, etuuno ninye enkurma oo sabibu.

²¹Neok Noa enaisho oo sabibu nemera oleng neirrag to lng'obor lenye meishopo.

²²Nedol Ham laa ninye menye le Kanaan emasipaisho[2] e menye. Neliki ilalashera lenyena aare te boo.

²³Ina peyie eyau Shem o Yafet olkila eiteleikino iloilila lenye, nepuo te siadi, neitoip emasipaisho e Papaai lenye; ore inkomomi enye neing'orie dikae, neitu ninche edol emasipaisho e papaai lenye.

²⁴Ore peyie einyototo Noa te merai e naisho, neyiolou enaitaasa olayioni lenye oti ninye,

²⁵nejo ninye, “Metedeki Kanaan, keaku ninye orrindik loo rrindiki too ilalashera lenyena.”

²⁶Nejo ake sii: “Metamayiana Olaitoriani Enkai ai Shem, naa inchoo Kanaan metaa orrindik lenye.

²⁷Meitubula Enkai Yafet naa inchoo metotona to lng'obor le Shem, neaku Kanaan osinka lenye.”

²⁸Ore peyie eishunye oloirrag le nkare, neitoki Noa abik ilarin iip uni o onom.

²⁹Ore inkolong'i pooki e Noa naa ilarin iip naaudo o onom neye ninye.