Read MAASAI REVISED PROTESTANT 2 Samuel 1 Bible Online

2 Samuel 1 - MAASAI REVISED PROTESTANT bible

2 Samuel 1

¹Ore eidipa Saul atua, neidipa Daudi atushukunye te mutata oo Lmaleki, neton Daudi inkolong'i are te Siklag;

²ore te nkolong e uni, nelotu oltung'ani oing'uaa ilng'oborri le Saul, epolosa inkilani enyena netii enterit endukuya enye. Ore ake pee elotu enetii Daudi, neirrugo abaiki enkop nesai ninye.

³Nejoki Daudi ninye, “Kaji iyie ing'uaa?” Nejoki, “Kaisikua nanu aing'uaa ilng'oborri le Israel.”

⁴Nejoki Daudi ninye, “Kaji eikunari mbaa? Tolikioki nanu.” Newalu ninye, nejo “Eisika iltung'ana aaing'uaa olarrabal, ore sii ilkumok loo ltung'ana neirragaa etuata, ore Saul o olayioni lenye Yonatan etuata sii ninche.”

⁵Nejoki Daudi ilo barnoti otiaka ninye, “Kainyoo nikintayiolo iyie inchere etua Saul o Yonatan olayioni lenye?”

⁶Nejoki ilo barnoti apa otiaka ninye, “Aishiaakinore ake duoo atii enchumata oldoinyo le Gilboa; netii Saul airishakino empere enye, nadol, etinyikakita ngarrin o lakedok loo mbartan emir ninye.

⁷Ore ake pee eing'or siadi enye, naadol nanu, naaipot. Nairukisho nanu ajo, ‘Nele nanu.’

⁸Naajoki ninye, ‘Ira iyie alo?’ Nawaliki, ‘Kara nanu Olmaleki.’

⁹Naajoki ninye nanu, ‘Intasho te mbata nanu tasesekuanaki; amu aanoto nanu osina, neton ake eishu enkishui ai tiatua nanu.’

¹⁰Neaku aitasho nanu te mbata ninye, nasesekuan ninye, amu aitisipa ajo meidim anyaaki atopuaa eidipa atabatatayu; naya ilo marisian apa le nkitoo otii endukuya enye o lkataar apa otii enkaina enye, nayawua ninche ene netii olkitok lai.”

¹¹Neibung Daudi inkilani enyena, nepolos, neiko sii neijia lelo tung'ana pooki apa ootii te nebo ninye;

¹²neishir ninche neitayu ilkiyio nepukoo o metaa teipa te nkaraki Saul o Yonatan olayioni lenye o te nkaraki iltung'ana lo Laitoriani o te nkaraki enkaji e Israel, te nkaraki etabatatate ninche to lalem.

¹³Nejoki Daudi ilo barnoti apa otiaaka ninye, “Kaji iyie ing'uaa?” Newaliki, “Kara nanu olayioni leilo omoni lo Lmaleki.”

¹⁴Nejoki Daudi ninye, “Kainyoo iyie pee eitu iureyu idumu enkaina ino ainyal ilo otubukoko Olaitoriani eilata aput?”

¹⁵Neipotu Daudi obo loo lbarnot nejoki, “Shomo, taara ninye metua.” Neosh oltung'ani Olmaleki metua.

¹⁶Nejoki Daudi ninye, “Meeu osarge lino shumata endukuya ino; amu enkutuk ino kewan nikinchakenoko iyie, ejo, Atasesekuana nanu ilo otubukoko Olaitoriani eilata aput.”

¹⁷Nerany Daudi ele sinkolio le nkishirata, aishiraki Saul o Yonatan olayioni lenye.

¹⁸Nejo ninye keiteng'eni iltung'ana le Yuda; ng'ura kesira te mbuku e Yashar. Nejo:

¹⁹Etua enkitoo ino, iyie Israel, etasesekuanaki te shumata iwuejitin inono neeika! Kaji eikunakinote embatatata lelo magil!

²⁰Milikioo ena te Gas, emintubulaa ena too nkoitoi naalala e nkanasa e Askelon; meng'idayu ake intoyie oo Filistia, mewuasayu ake intoyie e lelo lememurata.

²¹Intae ildoinyo le Gilboa, inchoo metaa metii empaso aashu enchan shumata intae aashu enkaitubului nabulu te nkop! Amu teine eidurukieki elong'o e ilo magilani, elong'o e Saul, eitu eelieki eilata.

²²To sarge le lelo oosesekuani, te ilata e lelo magil, eitu eshuko enkawuo e Yonatan, neitu eshukunye olalem le Saul erok.

²³Saul o Yonatan oonyorri naa shaati! Ore te nkishui o te keeya merisha ninche; neneneng ninche aalang ilkurragoso, negol ninche aalang ilng'atunyo.

²⁴Intae intoyie oo Siraeli enchiraki Saul, oishopo intae too nkilani naanyokioo, neikodo inkilani inyi te saabu.

²⁵Kaji eikunakinote embatatata lelo magil, te mpolos o larrabal! Eirrag Yonatan etasesekuanaki te nchumata oo wuejitin inono neeika

²⁶Aisinanuo te nkaraki iye olalashe lai Yonatan; aikishipakino apa iyie nanu oleng; ore apa enyorrata ino te nanu naa enking'asia, kegiroo enyorrata oo nkituaak.

²⁷Kaji eikunakinote embatatata lelo magil, ore imasaa o larrabal nerruoyo!