Read MAASAI REVISED PROTESTANT 2 Samuel 10 Bible Online

2 Samuel 10 - MAASAI REVISED PROTESTANT bible

2 Samuel 10

¹Ore te siadi ena neye olaiguanani loo Lamoni neitoreishoyo Hanan olayioni lenye te rishata enye.

²Nejo Daudi, “Kaitodol nanu esupatisho Hanan olayioni le Nashash, anaa apa enaaitaasa papaai lenye nanu te supatisho.” Neaku eirriwayie Daudi isinkan lenyena pee eitigir ninye tialo papaai lenye. Nepuonu isinkan le Daudi atua enkop oo Lamoni.

³Kake etiaakita lelo kituaak loo Lamoni Hanan olkitok lenye, “Ijo iyie ore te nkaraki nikirriwaka iyie Daudi iltung'ana likintagol naa keyanyitita papaai lino? Keitu ninye eirriu Daudi isinkan lenyena enitii iyie pee eing'or enkanasa, neikitalan ninye, nenang'aa ninye?”

⁴Neaku ewa Hanan isinkan le Daudi, nebarn ake enchoto o lmunyei lo ltung'ani nedung inkilani enye too mpolosi enye neisho ninche meshomo.

⁵Ore ake pee elikini Daudi, neirriwaa iltung'ana metanang'are ninche, amu etukurrutua apa lelo tung'ana oleng. Nejo olaiguanani, “Entotoni te Yeriko o metaba anaa nebulu ilmunyo linyi, pee intokiki aashukunye.”

⁶Ore ake pee edol lelo tung'ana le Amoni aajo etaa ilmang'ati te Daudi, neirriwaa lelo tung'ana le Amoni ilkiliku aaisho esiaai Isiria le Beterehob, o Isiria le Soba, isikarini inkalifuni tikitam oopuo too nkejek o laiguanani le Maaka te nebo iltung'ana enkalifu o ltung'ana le Tob, iltung'ana inkalifuni tomon o are.

⁷Ore ake pee ening Daudi ina, neirriwaa Yoab o lorora pooki lo ltung'ana magil.

⁸Nepuonu Ilamoni aaipang'u neluaa to larrabal te kishomi; ore lelo Siria le Soba o le Rehob o ltung'ana le Tob o Maaka netii ninche maate enkop naisiasha.

⁹Ore pee edol Yoab inchere eirragieki olarrabal aarare ninye te dukuya o te siadi, negelu ninye embata oo ltung'ana gelunot le Israel, neitobiraki ninche metaarare Isiria;

¹⁰ore ilkulikae pooki loo ltung'ana lenyena nepik ninye atua enkitoria e Abishai olalashe lenye, neitobiraki ninche metaarare Ilamoni.

¹¹Nejo Yoab, “Tenaa kegol oleng Isiria te nanu, naa eikiretu iyie nanu; kake tenaa kegol oleng Ilamoni te iyie naa kaalotu nanu aretu iyie.

¹²Intagoluoyu, naa mataa lewa te nkaraki iltung'ana lang, o too nkanas e Nkai ang; naa inchoo metaasa Olaitoriani ina nadol aa sidai te ninye.”

¹³Neaku etupunyakita Yoab o lelo tung'ana apa ootii te nebo ninye olarrabal aarare Isiria; neisik aailanyisho ninche te dukuya ninye.

¹⁴Ore pee edol Ilamoni aajo eilanyishote Isiria, neiko sii ninche neijia aailanyisho te dukuya Abishai, nejing atua enkanasa. Kaae neshukunye Yoab aing'uaa olarrabal loo Lamoni, nelotu Yerusalem.

¹⁵Kake ore ake pee edol Isiria aajo etimira ninche Israel, neiturrurro maate te nebo.

¹⁶Neirriwaa Hadadesa olkilikuai, neyau aitupuku lelo Siria apa ootii teidia alo Frati; nepuonu ninche Helam, te nebo Shobak olkitok le njore e Hadadesa te dukuya ninche.

¹⁷Ore ake pee elikini Daudi, neiturrur ninye Israeli pooki te nebo, nelang Yordan, nepuonu Helam. Neitobira Isiria maate aarare Daudi, neitayu olarrabal te nebo ninye.

¹⁸Neisik Isiria aailanyisho te dukuya Israel, near Daudi metuata too ltung'ana le Siria iip naapishana loo ngarrin, o lakedok loo mbartan inkalifuni artam, nepik olbae Shobak ilo kitok le njore enye, neaku etua ninye teine.

¹⁹Ore pee edol lelo aiguanak pooki apa laa isinkan le Hadadesa ninche etimira Israel neitayu ninche osotua te nebo Israel, neaku isinkan te ninche. Neaku etureita Isiria eitoki aaretu Ilamoni.