Read MAASAI REVISED PROTESTANT 2 Samuel 12 Bible Online

2 Samuel 12 - MAASAI REVISED PROTESTANT bible

2 Samuel 12

¹Neirriwaa Olaitoriani Natan enetii Daudi. Nelotu Natan enetii Daudi nejoki ninye, “Etii apa iltung'ana oaare enkang naje, naa karsis obo naa aisinani olikae.

²Ore ilo tung'ani karsis neeta nkerra kumok o nkishu;

³kake ore ilo tung'ani aisinani nemeeta toki meteleku ake enkiti supen e ker, apa nainyiang'ua ninye. Neoroo ninye, nebulu ninye te nebo ninye o te nebo nkera enyena; naa keng'arie apa ninye endaa enye, neokisho te nkikompe enye, neirrag to lgoo lenye, netiu apa ninye anaa entito te ninye.

⁴Nelotu apa olomoni enetii ilo tung'ani karsis, nemeyieu apa ninye neya too nkerrai enyena aashu too nchoo aitoki pee eitobiraki ilo otudung'uo enkop oewuo enetii ninye, kake ewa ninye olkuoo le ilo aisinani, neitobiraki ilo tung'ani apa oewuo enetii ninye.”

⁵Neyupuyup oleng engoro e Daudi te nkaraki ilo tung'ani; nejoki ninye Natan, “Ore anaa enaishu Olaitoriani, ore ilo tung'ani otaasa ena keishiaakino neye;

⁶nelak ilo kuoo katitin ong'uan, te nkaraki ena bae, o te nkaraki nemeeta olng'ur.”

⁷Nejoki Natan Daudi, “Iyie ilo tung'ani. Inji ejo Olaitoriani, Enkai e Israel, ‘Aatubukoko iyie eilata aput aitaa olaiguanani te shumata Israel naatokordua iyie aitayu te nkaina e Saul;

⁸naaisho nanu iyie enkaji o lkitok lino, o nkituaak o lkitok lino to lgoo lino, naaisho iyie enkaji e Israel o ene Yuda; naa tenaa aikiti ena, naaponiki nanu iyie inkumok oleng.

⁹Kainyoo iyie pee itemenayie ororei lo Laitoriani, pee ias ina suuji too nkonyek enyena? Itasesekuana iyie Uria ilo Hiti to lalem, niya enkitok enye metaa enkitok ino, nitara ninye to lalem loo Lamori.

¹⁰Ore naa taata meiwuang'a aekata olalem te nkaji ino amu kitemena nanu, niya enkitok e Uria ilo Hiti metaa enkitok ino.

¹¹Inji ejo Olaitoriani, Kadumu nanu entorroni nikiarare iyie tiatua enkaji ino makewan; naya nanu inkituaak inono te dukuya inkonyek inono, naisho nanu ninche olelatia ino, neirrag ninye te nebo inkituaak inono dama ena olong.

¹²Amu itaasa iyie too nkisudorot kake kaas nanu ena te dukuya Israel pooki, naas nanu dama.’ ”

¹³Nejoki Daudi Natan, “Ataasa nanu eng'oki to Laitoriani.” Nejoki Natan Daudi, “Eiwuang'ie sii ninye Olaitoriani eng'oki ino; miye iyie.

¹⁴Ore eyia, te nkaraki ore tena yasata nintorioko iyie amor Olaitoriani, keye ina kerai nikitoikioki iyie.” Nelo Natan enkaji enye.

¹⁵Neosh Olaitoriani ina kerai apa natoikio enkitok e Uria Daudi, nemuoyu ninye.

¹⁶Nesai Daudi Enkai te nkaraki ina kerai; nepukoo Daudi, nelo atua neirrag enkewarie te nkop.

¹⁷Ore ilpayiani le nkaji enye neitashe te mbata ninye, pee edumu ninye aaitung'uaa enkop; kake medumunye ninye, nemenya ninye endaa te nebo ninche.

¹⁸Ore te nkolong e naapishana neye ina kerai. Neureyu isinkan le Daudi eliki ninye inchere etua enkerai; amu etejo ninche, “Ng'ura ajo ore apa eton eishu enkerai, nikirorie iyiook ninye, neitu ninye ening iyiook; kaji naa kinko ti nikijoki ninye inchere etua enkerai? Keidim ninye aitaasa kewan ae torrono.”

¹⁹Kake ore pee edol Daudi inchere keing'oming'omakino isinkan lenyena, nemuso Daudi ajo etua enkerai; nejoki Daudi isinkan lenyena, “Ketua enkerai?” Nejo ninche, “Etua ninye.”

²⁰Kaae nedumunye Daudi te nkop, neitukuo, neel kewan te ilata, neibelekeny inkilani enyena nelo ninye atua enkaji o Laitoriani, neserem; neitoki ninye alo enkaji enye kewan; ore pee eikilikuanu endaa, neirragieki endaa te dukuya ninye, nenya ninye.

²¹Nejoki isinkan lenyena, “Kainyoo ena bae nitaasa iyie? Itupukoyie ninchiraki eton eishu; kake ore ake pee eye enkerai nidumunye ninya endaa.”

²²Nejo ninye, “Ore apa eton eishu enkerai, napukoo naishir; amu atejo nanu, ‘Kaing'ae oyiolo tenaa kaaing'urrie nanu Olaitoriani, pee epok enkerai?’

²³Kake ore taata etua; kainyoo naa pee apukoo nanu? Kaidim anyaaki atushuku ninye? Kalo nanu enetii ninye, kake meshukunye ninye enatii nanu.”

²⁴Neilejilej Daudi enkitok enye, Bet-sheba, nelo enetii ninye, neirrag te nebo ninye, neiu ninye olayioni, nejo enkarna enye Solomon. Naa kenyor apa ninye Olaitoriani.

²⁵Naa kenyor apa Olaitoriani ninye neirriwaa olkilikuai te Natan ilo oiboni, neaku etejo ninye enkarna enye Yedidia, te nkaraki kenyor Olaitoriani ninye.

²⁶Nearare Yoab Raba loo Lamoni, neya ina ang e nkitoo.

²⁷Neirriwaa Yoab ilkiliku enetii Daudi, nejo, “Ataarare nanu Raba, ore sii, aawa nanu ina anasa oo nkariak.

²⁸Ore naa taata, inturrurro tenebo ilkulikae tung'ana, nintayuyu ilng'oborri aaipirakinore enkanasa, niyaya ninye, pee maya ake nanu ina anasa, neaku te nkarna ai eipoti.”

²⁹Neaku eiturrurro Daudi iltung'ana pooki tenebo nepuo Raba, nearare ninye neya ninye.

³⁰Neya ninye olmarisian le nkitoo lo laiguanani lenye te lukunya enye, ore apa enkiroishi enye naa entalanta e saabu, netii atua ninye osoit ogol e nkinyang'a; nepiki ninye endukuya e Daudi. Neya ninye nena yarunot e ina anasa intokiting kumok oleng.

³¹Neyau ninye lelo tung'ana apa ootii atua enkanasa, nepik ninche enkisiaayiare too sooi[2], o sururuni o ntoluo, neisho ninche meteekenyata te mpejoto oo lmatofali naa inji eikuna ninye too nkanas pooki oo Lamoni. Kaae neitoki Daudi o ltung'ana pooki aashuko Yerusalem.