Read MAASAI REVISED PROTESTANT 2 Samuel 14 Bible Online

2 Samuel 14 - MAASAI REVISED PROTESTANT bible

2 Samuel 14

¹Ore apa Yoab olayioni le Seruiya nemusu ajo Absalom edamu oltau lo laiguanani.

²Neirriwaa Yoab olkilikuai meshomo Tekoa, meyau teine enkitok ng'en, nejoki ninye, “Intaakunoyu ira enkaishirani, nipika ilkilani lo lkiyioi; nimiel kewan te ilata, kake taasa anaa enkitok naishirita too nkolong'i kumok te nkaraki o lotua.

³Nilo enetii olaiguanani, niro aiko inji te ninye.” Neaku etipika Yoab irorei enkutuk enye.

⁴Ore pee elotu ina kitok e Tekoa enetii olaiguanani, nebatata te nkomom enye o metabaiki enkop, nesai, nejo, “Taretuoki, Olaiguanani.”

⁵Nejoki olaiguanani ninye, “Kainyoo enyamali ino?” Newal ninye ajo, “Kara nanu enkoliai; etua olpayian lai.

⁶Neeta esinka ino ilayiok oaare, neitarrikino ninche maate ti ong'ata; nemetii apa oltung'ani orish ninche, neosh obo olikae near ninye metua.

⁷Ore taata netudumakine olmarei pooki esinka ino, nejo ninche, ‘Inchoru ilo tung'ani otara olalashe lenye, pee kitum iyiook aataar ninye metua te nkaraki olalashe lenye apa otasesekuana’; neaku keinyal sii ninye olajung'oni. Neiko neijia aar enkukuo ai natung'uayioki, nemeing'ueiki olpayian lai enkarna aashu olpisiai ti oriong enkop.”

⁸Nejoki olaiguanani ina kitok, “Shomo enkaji ino, naa kaishoru nanu inkitanapat tialo iyie.”

⁹Nejoki ina kitok e Tekoa olaiguanani, “Inchoo eaku shumata nanu etii enkitarruoroto, Olaitoriani lai olaiguanani, o shumata enkaji e papa lai; inchoo olaiguanani o lorika lenye le nkitoo eaku meeta entioto.”

¹⁰Nejo olaiguanani, “Ti nikijoki oltung'ani ae toki, iyau ninye enatii nanu, nimikingil aekata ninye aibung.”

¹¹Nejo ninye, “Aatoomono inchoo olaiguanani eipot Olaitoriani Enkai ino, paa ore ilo oitalaku elap to sarge nemeitoki aekata asesekuanisho, ore olayioni lai nemeari metua.” Nejo ninye, “Anaa enaishu Olaitoriani, medoiki ninye olpapita obo lo layioni lino enkop.”

¹²Neitoki ina kitok ajo, “Aatasayia inchoo esinka ino eiro ororei to lkitok lai olaiguanani.” Nejo ninye, “Iroro.”

¹³Nejo ina kitok, “Kainyoo naa iyie pee intobira embae naaijo ena aarare iltung'ana le Nkai? Amu ore te nkishorunoto ena walata neen olaiguanani kewan, teina nemeyau olaiguanani ilo lenye oararo nerrinyunye ang.

¹⁴Meeta nchere mikiye pooki, kitiu iyiook anaa enkare naisuaakaki enkop, nemeitoki asotunoyu; kake meitayu Enkai enkishui e ilo oing'oru nkoitoi pee mepal ilo lenye oararo metaa oloiturrayioki.

¹⁵Aewuo nanu ajo ena to lkitok lai olaiguanani amu aaitaa nanu iltung'ana kuret; nedamu apa esinka ino, ajo, ‘Kairorie nanu olaiguanani; keidimayu pee eas olaiguanani eomonunoto e sinka enye.

¹⁶Amu kening olaiguanani, nekordu esinka enye aitung'uaa enkaina o ltung'ani laaidim ainyala nanu o layioni lai te nebo aitung'uaa enjung'ore e Nkai.’

¹⁷Nedamu esinka ino ajo, ‘Ore ororei lo lkitok lai olaiguanani naa kaayeng'iyeng'ie nanu’; amu ore olkitok lai olaiguanani netiu anaa olmalaika le Nkai te nerish esidai o entorrono. Metaa Olaitoriani Enkai ino te nebo o iyie!”

¹⁸Neitoki olaiguanani awaliki ina kitok nejo, “Mikisudorie nanu pooki toki naba anaa enaaikilikuan iyie.” Nejo ina kitok, “Inchoo olkitok lai olaiguanani eiro.”

¹⁹Nejo olaiguanani, “Ketii enkaina e Yoab te nebo iyie te kuna pooki?” Newal ina kitok nejo, “Kesipa ore anaa eninchu iyie, olkitok lai olaiguanani, meidim oltung'ani aibelekenya enkaina e tatene aashu enkaina e kedianye te pooki bae natejo olkitok lai olaiguanani. Osinka lino Yoab laaiguanaka nanu; ninye otipika kulo rorei pooki enkutuk e sinka ino.

²⁰Etaasa osinka lino Yoab ena pee etum aibelekenya kuna baa. Kake ore olkitok lai neeta eng'eno anaa olmalaika le Nkai ayiolou imbaa pooki naatii enkop.”

²¹Nejoki olaiguanani Yoab, “Atonyorrayie taata, aishoru ena; shomo tushuku ilo barnoti Absalom.”

²²Nebatata Yoab te nkomom enye abaiki enkop, nesai, nemayian olaiguanani, nejo Yoab, “Ore taata etayiolo osinka lino inchere anoto omom too nkonyek inono, olkitok lai olaiguanani, teina naishorua olaiguanani eomonunoto osinka lenye.”

²³Neaku etudumunye Yoab nelo Geshur, nelo ariku Absalom Yerusalem.

²⁴Nejo olaiguanani, “Inchoo ninye eton openy tiatua enkaji enye makewan; melotu ninye enatii nanu.” Neaku etotona Absalom openy te enkaji enye makewan, neitu elotu enetii Olaiguanani.

²⁵Ore apa tiatua Israel pooki nemetii oltung'ani orrepi te nkishaa enye anaa Absalom; ore ebaiki endap e nkeju enye o metabaiki endukuya enye nemeetae eleyiata te ninye.

²⁶Naa te nedung ninye ilpapit le ndukuya enye (amu kedung apa te nkiting'oto e pooki ari; te neiroshiu oleng te ninye, nedung) neipim ninye ilpapit le ndukuya enye, naa shekeli iip are te ntemata o laiguanani.

²⁷Netoikioki apa Absalom ilayiok okuni o entito nabo naji Tamar; naa enkitok sidai apa ninye.

²⁸Neaku etobiko Absalom ilarin oaare oolulung'a te Yerusalem, eitu elotu enetii olaiguanani.

²⁹Neirriwaki Absalom ilkiliku Yoab pee eirriwaa ninye enetii olaiguanani; kake etanya elotu Yoab enetii ninye. Neirriwaa eniare, kake eitu elotu Yoab.

³⁰Nejoki Absalom isinkan lenyena, “Eng'ura aajo ore enkurma e Yoab netashare enaai, neeta enkano teine; enchom entipik enkima.” Neaku eshomo aapej enkurma.

³¹Nedumunye Yoab nelo enetii Absalom te nkaji enye, nejoki ninye, “Kainyoo pee etapejo isinkan linono enkurma ai?”

³²Newaliki Absalom Yoab nejo, Ng'ura aajo aairriwaka iyie olomoni, Wou ene, pee aatum airriwaki olaiguanani, pee aikilikuan ajoki; Kainyoo nanu pee aewuo aing'uaa Geshur? Keikash te nanu te neton atii ine. “Ore naa taata inchooki nanu alo enetii olaiguanani; naa te naata enkitarruoroto, inchoo ninye maatar nanu matua.”

³³Kaae nelo Yoab enetii olaiguanani, neliki ninye; neipotu ninye Absalom. Neaku eewuo ninye enetii olaiguanani, neirrug kewan te nkomom enye o metabaiki enkop te dukuya olaiguanani; neng'utut olaiguanani Absalom.