Read MAASAI REVISED PROTESTANT 2 Samuel 16 Bible Online

2 Samuel 16 - MAASAI REVISED PROTESTANT bible

2 Samuel 16

¹Ore ake pee egiroo Daudi enchumata o ldoinyo penyo, netumore ninye Siba osinka le Mofiboshet, o sirkon are naairotoki, enapita imukateni iip are o rridat iip loo sabibu ooitoyioki o rridat iip loo lng'anayio le nkolong o lbene lo lchoni le naisho oo sabibu.

²Nejoki olaiguanani Siba, “Kainyoo iyie pee iyaua kuna?” Newal Siba ajo, “Ore kulo sirkon naa ile nkaji o laiguanani pee eked alotie, ore imukateni o lng'anayio naa inoo lbarnot naanya, ore enaisho oo sabibu naa ene lelo ooiterre to lpurkel pee eok.”

³Nejo olaiguanani, “Paa koree olayioni lo lkitok lino?” Nejoki Siba olaiguanani, “Ng'ura, etotona te Yerusalem; amu etejo ninye, ‘Taata aaisho nanu enkaji e Israel aashukoki enkitoria e papa lai.’ ”

⁴Neitoki olaiguanani ajoki Siba, “Ore nena apa pooki naara ine Mefiboshet naa ininono taata.” Nejo Siba, “Kaasai nanu; inchooki nanu manoto omom too nkonyek inono, olkitok lai olaiguanani.”

⁵Ore pee elotu Olaiguanani Daudi Bahurim, neipang'u teine oltung'ani lo lmarei le nkaji e Saul, oji enkarna enye Shimei, olayioni le Gera; naa ore elotu neidikidik adekisho.

⁶Nenang Daudi too soito; nenang sii isinkan pooki lo laiguanani Daudi, o ltung'ana pooki o ltung'ana pooki kituaak ootii enkaina enye e tatene o ene kedianye.

⁷Nejo Shimei ina kata edekisho, “Shomo, shomo, iyie oltung'ani lo sarge, iyie oltung'ani le pesho!

⁸Eitalakua Olaitoriani te iyie osarge pooki le nkaji e Saul, laa te wueji enye intoreishe; neishooyie Olaitoriani enkitoria apik atua enkaina o layioni Absalom. Toduaa ajo etii emutata ino shumata ino; amu ira oltung'ani lo sarge.”

⁹Neitoki Abishai olayioni le Seruiya ajoki olaiguanani, “Kainyoo pee edek ele dia otua olkitok lai olaiguanani? Inchooki nanu mashomo adung'u endukuya enye.”

¹⁰Kake etejo olaiguanani, “Kaa nanu aabaikinore iyie, olayioni le Seruiya? Te nedekisho ninye te nkaraki natiaaka ninye Olaitoriani, ‘Tediaa Daudi,’ kaing'ae naa ojo, ‘Kainyoo pee itaasa iyie ena?’ ”

¹¹Nejoki Daudi Abishai o sinkan lenyena pooki, “Ng'ura, olayioni lai kewan oing'oru enkishui ai; kebaa elusoo ele tung'ani le Benchamen! Tung'uai ninye, naa inchoo ninye edekisho; amu Olaitoriani oishoo ninye.

¹²Eidimayu pee eing'or Olaitoriani osina lai, naa kaalaaki nanu Olaitoriani too supati tele deket lena olong.”

¹³Neaku eshomo Daudi o ltung'ana lenyena te nkoitoi, ina kata eloito Shimei te murte o ldoinyo eipirakinore ninye, nedekisho eloito, nenang ninye too soito neisuaaki enterit.

¹⁴Ore olaiguanani, o ltung'ana pooki apa ootii te nebo ninye, nebau enaurate Yordan; neyeng'iyeng'a ninye teine.

¹⁵Ore apa Absalom o ltung'ana pooki, ilewa le Israel nepuonu Yerusalem o Ahitofel te nebo ninye.

¹⁶Ore ake pee elotu Hushai, lo losho le Akito ilo shore le Daudi, enetii Absalom, nejoki Hushai Absalom, “Tobikoi olaiguanani! Tobikoi olaiguanani!”

¹⁷Nejoki Absalom Hushai, “Kena enkanyit ino to lchore lino? Kainyoo pee eitu ilo te nebo olchore lino?”

¹⁸Nejoki Hushai Absalom, “A'a; amu ore ilo otegelua Olaitoriani o kulo tung'ana o lewa pooki le Israel, olenye aaku nanu, naa te nebo ninye nanu abik.

¹⁹Ore ake sii, kaing'ae nanu aisiaai? Aime ilo ayioni lenye? Ore apa anaa enaisiaayia papaai lino, kaaisiaai sii nanu iyie.”

²⁰Nejoki Absalom Ahitofel, “Inchoru enkikoo ino; kaa iyiook kias?”

²¹Nejoki Ahitofel Absalom, “Shomo iyie atua enetii inkapiak e papaai lino, apa naatung'uayie ninye meing'ura enkaji; pee ening Israel pooki inchere intaa kewan olmang'atinta te papaai lino, ore inkaik e lelo pooki ootii te nebo o iyie neitagoli.”

²²Neaku etuunokito ninche Absalom olng'obor te nchumata enkaji; nelo Absalom atua enetii inkapiak e papaai lenye edolita Israel pooki.

²³Ore apa te nena olong'i eutaroto naishoru Ahitofel neikununo ake duoo anaa ororei le Nkai eikilikuanishoreki; keyanyiti apa oleng enkikoo e Ahitofel, Daudi o Absalom, pokira are.