Read MAASAI REVISED PROTESTANT 2 Samuel 19 Bible Online

2 Samuel 19 - MAASAI REVISED PROTESTANT bible

2 Samuel 19

¹Netiaakaki apa Yoab, “Ng'ura, eishirita olaiguanani neisinanuo te nkaraki Absalom.”

²Neaku eibelekenyaki enkishuroto e njore ina olong metaa olkiyioi too ltung'ana pooki; amu etoning'o iltung'ana ina olong, “Eisinanuo olaiguanani te nkaraki olayioni lenye.”

³Nepurrokino iltung'ana ina olong anaa enapurrokino iltung'ana atua ootukurrutua ekueta to larrabal.

⁴Neimulumul olaiguanani enkomom enye, neishir olaiguanani to ltoilo sapuk, “Oi olayioni lai Absalom, Oi Absalom, olayioni lai, olayioni lai.”

⁵Nelotu Yoab atua aji enetii olaiguanani, nejo, “Imulumula iyie taata te nkurruna inkomomi oo sinkan linono pooki, laa ninche ooitajeutuo ena olong enkishui ino o enkishui oo layiok linono o ntoyie inono o enkishui oo nkituaak inono o nkapiak inono,

⁶te nkaraki ninyor iyie lelo likimba iyie nimba lelo likinyor iyie. Amu imbalunye iyie taata inchere, ore ilarikok le njore o sinkan naa pesho te iyie; amu ore taata kamuso nanu ajo, tenaa naaji keishu Absalom nikituata iyiook pooki taata, anaata ishipa iyie.

⁷Ore naa taata tudumunye, shomo auluo irorie te supatisho isinkan linono; amu kanya nanu olmumai to Laitoriani, ti nimilo iyie, meton ninye oltung'ani hoo obo te nebo o iyie ena kewarie; naa keaku ena torrono oleng te iyie alang entorroni apa naewuo shumata iyie ebaiki kitisho ino o metabaiki taata.”

⁸Nedumunye olaiguanani, netonie olorika lenye te kishomi. Nelikini iltung'ana pooki aajoki, “Ng'ura, etonita olaiguanani te kishomi”; nepuonu iltung'ana pooki dukuya olaiguanani. Ore apa Israel neisika pooki tung'ani alo enkang enye.

⁹Ore iltung'ana pooki neing'oling'ola tiatua iloshon pooki loo Siraeli ejo, “Etokordua iyiook olaiguanani aitung'uaa enkaina oo lmang'ati lang, neitajeuo iyiook aitung'uaa enkaina oo Lfilisti; ore taata neisika alo te nkop aing'uaa Absalom.

¹⁰Kake ore Absalom, o laa ninye kitubukokito eilata aaput meitoria iyiook, netua to larrabal. Ore naa taata kainyoo pee mijojo intae ae tialo enchukunoto o laiguanani?”

¹¹Neirriwaa olaiguanani Daudi olkilikuai lenye enetii Sadok o Abiata lelo apolosak nejo, “Entiaaki ilpayiani le Yuda, ‘Kainyoo pee iakuku ile bayie te nchukokinoto o laiguanani enkaji enye, eidipa ororei le Israel pooki aeu enetii olaiguanani?

¹²Irara intae iltung'ana laainei, irara intae oloito lai o sesen lai; kainyoo pee iakuku ile siadi te nchukunoto o laiguanani?’

¹³Naa tiaaki Amasa, ‘Aimira iyie oltoilo lai o sesen lai? Inchoo eiko neijia Enkai te nanu, neitulusoo sii, ti nimira iyie olkitok le njore ai ebaiki taata te rishata e Yoab.’ ”

¹⁴Neibelekeny ninye oltau loo ltung'ana le Yuda netiu anaa oltung'ani obo; neaku eirriwaitie ninche ororei enetii olaiguanani ejo, “Tushukunye, o sinkan linono pooki.”

¹⁵Neaku etushukunye olaiguanani alotu Yordan; nelotu Yuda Gilgal anang'are olaiguanani neriku olaiguanani aaitalang'u Yordan.

¹⁶Ore Shimei olayioni le Gera, ilo lo losho le Benchamen, oing'uaa Bahurim, neisarisaru adou te nebo iltung'ana le Yuda pee enang'are olaiguanani Daudi;

¹⁷ore te nebo ninye netii iltung'ana enkalifu ooing'uaa Benchamen. Ore Siba osinka le nkaji e Saul, te nebo ilayiok lenyena tomon o imiet o sinkan lenyena tikitam, nekuet aadoyio aapuo Yordan dukuya olaiguanani,

¹⁸nelang ninche te lang'ata aariku enkaji o laiguanani, neas ninche ina nayieu ninye. Ore Shimei olayioni le Gera nebatata te dukuya olaiguanani, etaa kejo ninye pee elang Yordan,

¹⁹nejoki olaiguanani, “Mincho olkitok lai aaibung nanu te ntorroni aashu edamu eneikuna osinka lino pee eas entorrono ina olong apa naing'uaa olkitok lai olaiguanani Yerusalem; mincho olaiguanani enap too ndamunot enyena.

²⁰Amu keyiolo osinka lino inchere ataasa nanu eng'oki; metaa aewuo nanu ena olong, ole dukuya te nkaji pooki e Yosef otadowuo alotu anang'are olkitok lai olaiguanani.”

²¹Newaliki Abishai olayioni le Seruiya ajoki, “Aimeari Shimei metua tena, te nkaraki netediaa ninye ilo otubukoko Olaitoriani eilata?”

²²Kake etejo Daudi, “Kaa nanu aporoki intae, intae ilayiok le Seruiya, inchere itiuu intae ena olong anaa ilmang'ati te nanu? Keari pooki ng'ae metua te Israel ena olong? Amu aimayiolo nanu inchere ara nanu ena olong olaiguanani le Israel?”

²³Nejoki olaiguanani Shimei, “Miye iyie.” Neisho olaiguanani ninye olmumai lenye.

²⁴Ore Mefiboshet olayioni le Saul nedou alotu anang'are olaiguanani; neitu ninye eituku inkejek enyena, aashu eitobir olmunyei lenye, aashu eituku inkilani enyena, ebaiki enkolong apa nashomo olaiguanani o metabaiki enkolong naewuo ninye ashukunye te seriani.

²⁵Ore pee elotu ninye aing'uaa Yerusalem anang'are olaiguanani, nejoki olaiguanani ninye, “Kainyoo pee eitu ilo te nebo nanu Mefiboshet?”

²⁶Newal ninye ajo, “Olkitok lai, olaiguanani, aateleja apa nanu osinka lai; amu etiaaka osinka lino ninye, ‘Irotokoki nanu osikiria, pee atum atakedo nalo te nebo olaiguanani.’ Amu olmaima osinka lino.

²⁷Etakaldayie ninye osinka lino to lkitok lai olaiguanani. Kake ore olkitok lai olaiguanani netiu anaa olmalaika le Nkai; taasa naa ina nidol aa sidai te iyie.

²⁸Amu ore enkaji pooki e papa lai netaa ninche iltung'ana ooishiaakino keeya te dukuya olkitok lai olaiguanani; kake itipika apa iyie osinka lino atua lelo oodaa te misa ino. Kainyoo naa ai sipata naata nanu, naa, pee aishiraki olaiguanani?”

²⁹Nejoki olaiguanani ninye, “Kainyoo pee iro oleng mbaa inono? Atudung'o nanu; ore iyie o Siba naa iorioro enkop.”

³⁰Nejoki Mefiboshet olaiguanani, “Oi inchoo ninye eya pooki, etaa keewuo olkitok lai olaiguanani ang te seriani.”

³¹Ore apa Barsilai le Giliad netadowuo alotu aing'uaa Rogelim; nelo ninye te nebo olaiguanani Yordan, pee eitarioo ninye aitalang Yordan.

³²Ore apa Barsilai naa oltung'ani otamorua oleng, ilarin intomoni isiet; te moruao neishoo apa ninye olaiguanani endaa eton etonita te Mahanaim; amu oltung'ani apa karsis ninye.

³³Nejoki olaiguanani Barsilai, “Wou talang'u te nebo nanu, naa kaagolie nanu iyie te nebo nanu te Yerusalem.”

³⁴Kake etiaaka Barsilai olaiguanani, “Kailarin aja nanu eton aishu, metaa kailep nanu alo te nebo olaiguanani Yerusalem?

³⁵Kara nanu ena olong oloo larin intomoni isiet; kaidim nanu atayiolo ajo kainyoo esidai naa kainyoo neme sidai? Keidim osinka lino aishamishama ina nanya ninye aashu enaok ninye? Keton nanu aidim ainining'o oltoilo loo lewa ooranyisho o nkituaak naaranyisho? Kainyoo naa pee eaku osinka lino olola oponari to lkitok lai olaiguanani?

³⁶Kelo osinka lino enkiti wueji te nkoitoi te lido kekun Yordan te nebo olaiguanani. Kainyoo pee aalaaki nanu olaiguanani to lerrinyore oba nji?

³⁷Aatasayia inchoo osinka lino eshuko, pee atum nanu atua tiatua enkanasa ai makewan, te netaaniki enkurare e papa lai o ene yieyio ai. Kake nele osinka lino Kimham; inchoo ninye elo te nebo olkitok lai olaiguanani; nintaas ninye enaba anaa enidol aa sidai te iyie.”

³⁸Newaliki olaiguanani ajoki, “Kelo Kimham te nebo nanu, naa kaitaas nanu ninye enaba enaa enidol aa sidai te iyie; ore nena pooki niyieu iyie te nanu naaitaas nanu iyie.”

³⁹Nepuo iltung'ana pooki aalang Yordan, nelo olaiguanani alang; neng'utut olaiguanani Barsilai nemayian ninye, neshuko ninye alo enkang enye kewan.

⁴⁰Nelo olaiguanani dukuya o meshomo Gilgal, nelo Kimham te nebo ninye; ore iltung'ana pooki le Yuda o lpisiai sii loo ltung'ana loo Siraeli, neriku olaiguanani te nkoitoi enye.

⁴¹Nepuonu iltung'ana pooki loo Siraeli enetii olaiguanani, nejoki olaiguanani, “Kainyoo pee kitupurroitie iyie ilalashera lang iltung'ana le Yuda, neyau olaiguanani o enkaji enye aaitalang'u Yordan, o ltung'ana pooki le Daudi te nebo ninye?”

⁴²Newaliki iltung'ana pooki le Yuda lelo tung'ana loo Siraeli ejo, “Te nkaraki naa olo lgilata onyikita iyiook. Kainyoo naa pee igororo tena bae? Aikitadaate iyiook pooki te nkinyang'a olaiguanani? Anaa tenaa keishoo ninye iyiook ae kishooroto?”

⁴³Newaliki iltung'ana loo Siraeli iltung'ana le Yuda nejo, “Kiata iyiook irubat tomon to laiguanani, ore sii te Daudi nikiata iyiook inkumok aitulusoo intae. Kainyoo naa pee itemena intae iyiook? Aimikira iyiook ile dukuya ooiroro pee eshukuni olaiguanani?” Kake ore apa irorei loo ltung'ana le Yuda naa kepe, alang irorei loo ltung'ana loo Siraeli.