Read MAASAI REVISED PROTESTANT 2 Samuel 2 Bible Online

2 Samuel 2 - MAASAI REVISED PROTESTANT bible

2 Samuel 2

¹Ore te siadi ena neikilikuanishore Daudi Olaitoriani, “Kailep nanu alo atua ae nabo oo nkang'itie e Yuda?” Nejoki Olaitoriani ninye, “Ilepa shomo.” Nejo Daudi, “Kaa anasa nabo ailep alo?” Nejo Olaitoriani, “Shomo Hebron.”

²Neaku eilepa Daudi nelo ine, te nebo sii inkituaak enyena pokira are, Ahinoam e Yesreel o Abigail ina oliai apa e Nabal le Karmel.

³Neyau Daudi ailepunye lelo tung'ana lenyena apa ootii te nebo ninye, oltung'ani ake o enkaji enye; nebik ninche too nkang'itie e Hebron.

⁴Nepuonu iltungana le Yuda, nebukoki ninche Daudi eilata aaput teine aaitaa olaiguanani le nkaji e Yuda. Ore ake pee eliki ninche Daudi aajoki, “Iltung'ana le Yabesh Gilead apa ootunukaitie Saul,”

⁵neirriwaki Daudi ilkiliku lelo tung'ana le Yabesh-gilead, nejoki ninche, “Entaa intae iloomayiana to Laitoriani, te nkaraki nintodolutua intae ena anyit te Saul, olkitok linyi, ninukaa ninye!

⁶Meitodua intae Olaitoriani enyorrata nauno o enkisiligata! Naa kaitaas nanu intae esidai te nkaraki nitaasa ena bae.

⁷Ore naa enchoo metagolo inkaik inyi, nipijuju; amu etua Saul olkitok linyi, naatubukokito nanu enkaji e Yuda eilata aaput aaitaa olaiguanani te shumata ninche.”

⁸Ore apa Abna olayioni le Ner, olkitok le njore e Saul, neya Ishboshet olayioni le Saul, neyau ninye Mahanaim,

⁹neitaa Abna ninye olaiguanani te shumata Gilead o Ashuri o Yesreel o Efraim o Benchamen o Israel pooki.

¹⁰Ore apa Ishboshet, ilo ayioni le Saul, naa ilarin artam ina kata pee eiteru aitore Israel, neitore ninye ilarin oaare. Kake etusujaitie enkaji e Yuda Daudi.

¹¹Ore enkata apa nara Daudi olaiguanani te Hebron te shumata enkaji e Yuda naa ilarin oopishana o lapaitin ile.

¹²Ore Abna olayioni le Ner o sinkan le Ishboshet olayioni le Saul, neipang aapuo te Mahanaim nepuo Gibeon.

¹³Ore Yoab olayioni le Seruiya o sinkan le Daudi, neipang aapuo nenang'are ninche te nchorro e Gibeon; netoni ninche, obo te nchoto nabo e nchorro o likae te nkae shoto e nchorro.

¹⁴Nejoki Abna Yoab, “Inchoo ilbarnot edumunye aarany te dukuya iyiook.” Nejo Yoab, “Inchoo edumunye ninche.”

¹⁵Kaae nedumunye ninche nepuo te siana enye, tomon oaare ile Benchamen o Ishboshet ilo ayioni le Saul, o tomon oaare loo sinkan le Daudi.

¹⁶Neibung ake oltung'ani ilo oarare endukuya nerrumoki olalem lenye eluboto e ilo oarare; neaku etabatatate te nebo. Neaku etejoki apa ine wueji Helkat-hasurim, naa Gibeon etii.

¹⁷Nerrishu olarrabal ina olong, nemiri Abna o ltung'ana loo Siraeli te dukuya isinkan le Daudi.

¹⁸Netii apa ine ilayiok pokira okuni le Seruiya, Yoab, Abishai o Asahel. Naa keneneng apa Asahel too nkejek anaa enkolii e ong'ata;

¹⁹nemir Asahel Abna, ore eloito neitu ibelekenya aing'or enkaina e tatene aashu enkaina e kedianye esujaa Abna.

²⁰Nenang Abna silig nejo, “Kaiyie Asahel?” Newalu ninye, nejo “Ee nanu.”

²¹Nejoki Abna ninye, “Shomo enkaina ino e tatene aashu ene kedianye, imbung'a obo loo lbarnot, pee iya nena naataarua ninye.” Kake meyieu Asahel neibelekenya te sujata enye.

²²Neitoki Abna aigil ajoki Asahel, “Shomo mikintoki asuj, kainyoo pee aar nanu iyie tua? Kaji naa aiko te nashumaki enkomom ai olalashe lino Yoab?”

²³Kake etanya ninye elo aapaash neaku etaremo Abna ninye enkoshoke to lmurrat le mpere enye, neaku eipang'ua empere te nkoriong enye, nebatata ninye teine, neye teine apa netii. Ore lelo apa pooki ooetuo ine wueji netabatatare Asahel neye, neitashe aaitirring'a.

²⁴Kake etimira Yoab o Abishai Abna; ore edoyio enkolong nepuonu ninche oldoinyo le Ama, laa ninye otii dukuya Gia te nkoitoi nalo olpurkel le Gibeon.

²⁵Neiturrurro tenebo iltung'ana le Benchamen te siadi Abna, neaku olwuampa obo, neitashe te ntopij o ldoinyo.

²⁶Neipot Abna Yoab, nejoki, “Amaa, keaku kedaa olalem intarasi? Aimiyiolo ajo keduaru enkiting'oto? Kebaa kenya enkata pee imbok iltung'ana linono metapala emirata oo lalashera lenye?”

²⁷Nejo Yoab, “Anaa enaishu Enkai, te neme iroro, esipa anaata etapala iltung'ana esujata oo lalashera lenye tadekenya.”

²⁸Neaku etoosho Yoab emowuo; neitashe iltung'ana pooki, neitu eitoki aasujaa Israel, aashu eitoki aara.

²⁹Ore Abna o ltung'ana lenyena nepuo ina kewarie pooki nepuo aaim atua Araba; nelang ninche olkeju le Yordan, nepuo endama pooki o meetu Mahanaim.

³⁰Neshukunye Yoab te mirata e Abna; ore ake pee eidip aiturrurro iltung'ana pooki te nebo, nemetii isinkan le Daudi iltung'ana tomon ooudo metii Asahel.

³¹Kake etaara isinkan le Daudi iltung'ana iip uni o ntomoni ile metuata too ltung'ana le Abna lo losho le Benchamen.

³²Neya Yoab o ltung'ana lenyena osesen le Asahel, nenukaa te nkurare e papaai lenye, apa natii Betlehem. Nelo Yoab o ltung'ana lenyena enkewarie pooki, neilepaki ninche enkolong te Hebron.