Read MAASAI REVISED PROTESTANT 2 Samuel 20 Bible Online

2 Samuel 20 - MAASAI REVISED PROTESTANT bible

2 Samuel 20

¹Ore apa, netumi oltung'ani lemeeta tipat, oji enkarna enye Sheba, olayioni le Bikiri, lo losho le Benchamen. Neosh ninye emowuo nejo, “Mikiata iyiook erubata te Daudi nimikiata iyiook enjung'ore to layioni le Yese; shomo pooki tung'ani olng'obor lino, iyie Israel!”

²Neaku etung'uaitie iltung'ana pooki loo Siraeli Daudi, nesuj Sheba olayioni le Bikiri; kake etusuja iltung'ana le Yuda olaiguanani lenye aakurraki ebaiki Yordan o metabaiki Yerusalem.

³Nelotu Daudi enkaji enye te Yerusalem; neya olaiguanani inkapiak tomon apa naatung'uayie meing'ura enkaji, nepik ninche atua enkaji narripitoi, neitoti ninche, kake eitu elo atua enetii ninche. Neaku eikenoyioki ninche o metabaiki enkolong e keeya enye, etoni anaa nkolia.

⁴Nejoki olaiguanani Amasa, “Impoto iltung'ana le Yuda te nebo meetu enatii tiatua inkolong'i uni, nitii iyie ene makewan.”

⁵Neaku eshomo Amasa aipot Yuda; kake eimutie ninye aitogiroo enkata apa natudung'okoki apa nategelakaki ninye.

⁶Nejoki Daudi Abishai, “Ore taata keitaas iyiook Sheba olayioni le Bikiri entorrono alang Absalom; iwa isinkan lo lkitok lino tusujai ninye, meisho ake kewan inkanas naasheta isunta too soito nepik iyiook enyamali.”

⁷Neipang aapuo aasujaa Abishai, Yoab o lelo Sheriti o lelo Peleti, o lelo tung'ana pooki magil; neipang ninche aapuo aaing'uaa Yerusalem aasujaa Sheba olayioni le Bikiri.

⁸Ore etii ninche osoit sapuk otii Gibeon, nelotu Amasa anang'are ninche. Neishopito apa Yoab olkila lo ltung'ani le njore, ore ti oriong ninye netii enkeene e mpolos te nebo olalem tiatua enchashur eteenaki aakurraki te mpolos enye; ore eloito ninye dukuya nedoyio.

⁹Nejoki Yoab Amasa, “Iserian iyie, olalashe lai?” Neibung Yoab Amasa olmunyei lenye te nkaina enye e tatene pee eng'utut ninye.

¹⁰Kake eitu edol Amasa olalem otii enkaina e Yoab; neaku ninye etaremie Yoab ninye enkoshoke, nebuloki imonyit enyena enkop, neye ninye eitu eigilieki ai oshoto. Ore Yoab o Abishai olalashe lenye nesujaa Sheba olayioni le Bikiri.

¹¹Ore obo loo ltung'ana le Yoab, neitashe te mbata e Amasa nejo, “Ore olonyor Yoab anaa ole nkalo e Daudi, inchoo ninye esujaa Yoab.”

¹²Ore Amasa neirrag akurro tiatua o sarge lenye te mpolos enkoitoi. Ore pooki ng'ae ogiroo, nedol ninye, neitashe; ore pee edol ilo tung'ani ajo eitasheito iltung'ana pooki, nenap ninye Amasa aitung'uaa enkoitoi apik ong'ata, nenang'aki enkila shumata ninye.

¹³Ore ake pee eyae aaitung'uaa enkoitoi, nepuo iltung'ana pooki aasuj Yoab esujaa olayioni le Bikiri.

¹⁴Neim Sheba atua iloshon pooki loo Isiraeli o meshomo Abel e Bet-maka, ore lelo Bikiri pooki neiturrurro, nesujaa ninye atua.

¹⁵Ore lelo tung'ana pooki apa ootii te nebo Yoab nepuonu aang'adu ninye tiatua Abel e Bet-maka; neitayu ninche olkiu te mbata e nkang, neitashe ninye aipirakinore esuntai; neoshito apa ninche esuntai pee euroo.

¹⁶Neipotisho enkitok ang'eni tiatua enkanasa ejo, “Entoning! Entoning! Entiaaki Yoab, ‘Wou ene, pee aatum nanu airorie iyie.’ ”

¹⁷Nelotu ninye ataaniki ninye; nejo ina kitok, “Ira iyie Yoab?” Newaliki ninye, “Kara nanu.” Neitoki ajoki ninye, “Toning'o irorei le sinka ino.” Newaliki ninye, “Kaning'ito nanu.”

¹⁸Neitoki ninye ajo, “Ore apa naa keji, ‘Inchoo ninche eikilikuanu enkikoo te Abel’; neidip ninche olomoni.

¹⁹Kara nanu nabo e nekua nemeetayie olomang'ati neisiligayu too Siraeli, amaa ing'oru iyie aidaikie enkanasa naa ninye ng'otonye tiatua Israel; kainyoo pee iijoo iyie ina jung'ore o Laitoriani?”

²⁰Newal Yoab, “Kikoino maatalama ena inchere kaijoo nanu aashu aidaikie!

²¹Mesipa ina. Kake oltung'ani le nkop oo ldoinyo e Efraim, oji Sheba olayioni le Bikiri, oilepie enkaina enye aarare olaiguanani Daudi; enchoru ninye ake, naa kalo nanu aing'uaa enkanasa.” Nejoki ina kitok Yoab, “Ng'ura, aikinang'akini iyie endukuya enye aaitadooki te suntai.”

²²Nelo ina kitok enetii iltung'ana pooki te ng'eno enye. Nedung'u ninche endukuya e Sheba olayioni le Bikiri nenang'u auluo enetii Yoab. Neosh ninye emowuo, neidapasha ninche aaing'uaa enkanasa, oltung'ani ake nelo enkang enye. Nerrinyo Yoab alo Yerusalem enetii olaiguanani.

²³Naa Yoab apa olkitok le njore pooki e Israel; ore Benaia olayioni le Yehoida naa ninye olkitok loo Lkereti o Lpelesi;

²⁴naa Adoram oitasheiki esiaai oo nkaik; naa Yehoshafat olayioni le Ahilud apa olaigeroni;

²⁵naa Shefa olasirani; naa Sadok o Abiata apa ilapolosak;

²⁶ore apa Ira ilo Yairiti naa olapolosani sii ninye le Daudi.