Read MAASAI REVISED PROTESTANT 2 Samuel 21 Bible Online

2 Samuel 21 - MAASAI REVISED PROTESTANT bible

2 Samuel 21

¹Netii apa olameyu too nkolong'i e Daudi tiatua ilarin okuni, to lari ake o to lari, neing'oru Daudi enkomom o Laitoriani. Nejo Olaitoriani, “Ketii entorroni o sarge shumata Saul o shumata enkaji enye, te nkaraki nataara Ilgibioni metuata.”

²Neaku eipoto olaiguanani Ilgibioni. Ore apa Ilgibioni neme iloo ltung'ana le Israel, kake olpisiai loo Lamori; hoo neinosa iltung'ana le Israel olmumai pee eleku ninche, etonyuaa Saul ear ninche metuata teina nyuata enye te nkaraki iltung'ana le Israel o Yuda.

³Nejoki Daudi lelo Gibioni, “Kaa nanu aitaas intae? Naa kaji nanu aikunu enkipooto, pee itumutumu intae aatamayian enjung'ore o Laitoriani?”

⁴Nejoki ilgibioni ninye, “Mme embae e nkosholai aashu saabu erishata ang o Saul aashu enkaji enye; neme enaang pee kiar oltung'ani metua te Israel.” Nejo ninye, “Ijojo intae pee aitaas aa nanu intae?”

⁵Nejoki ninche olaiguanani, “Ore ilo tung'ani apa otumuta iyiook neitobir pee eidaikie iyiook, metaa mikitum iyiook ewueji tiatua enkop pooki oo Siraeli.

⁶Inchoo meishori ilayiok lenyena oopishana pee kisiong iyiook ninche te dukuya Olaitoriani te Gibeon to ldoinyo lo Laitoriani.” Nejo olaiguanani, “Kaishoru nanu ninche.”

⁷Kake etelekua olaiguanani Mefiboshet, olayioni lo layioni le Saul, Yonatan, te nkaraki olmumai lo Laitoriani apa otii erishata ninche, o erishata e Daudi o Yonatan olayioni le Saul.

⁸Neya olaiguanani ilayiok oaare le Rispa entito e Aia apa naa ninye etoikio Saul, Armon o Mefiboshet; o layiok imiet le Merab entito e Saul laa ninche etoikio Adriel olayioni le Barsilai ilo Meholati;

⁹neishooyo ninche apik atua inkaik oo Lgibioni; neilili ninche teilo doinyo te dukuya Olaitoriani, ore ninche pokira oopishana neidaaya te nebo. Neari ninche metuata too nkolong'i e dukuya e nkikesare, te nkiterunoto e nkikesare e shairi.

¹⁰Neitoki Rispa entito e Aia aya ilkuniyiani neisalaashaki te ndapidapoi ebaiki enkiterunoto e nkikesare o metaba anaa neshaiki enchan ninche eing'uaa shumata; neitu ninye eisho imotonyi o loing'ang'e epuonu aadoiki ninche te ndama, aashu ing'uesi e ong'ata te nkewarie.

¹¹Ore ake pee elikini Daudi enataasa Rispa entito e Aia ina apiani e Saul,

¹²nelo Daudi aitayu iloik le Saul o loik lo layioni lenye Yonatan tiatua iltung'ana le Yabesh-gilead, apa ootupurroitie ninche to lkurroto otumoreki te Betshean, teine apa neililiyie Ilfilisti ninche, teina olong apa nataara Ilfilisti Saul metua te Gilboa;

¹³neyau ninye ailepunye teine iloik le Saul o loik lo layioni lenye Yonatan; neiturrur ninche iloik le lelo apa ooililioki.

¹⁴Nenukaa ninche iloik le Saul o layioni lenye Yonatan te nkop e Benchamen te Sela, tiatua enkurare e Kish papaai lenye; neas ninche nena pooki naaitanapishe olaiguanani. Ore te siadi ina nening Enkai eomonokinoto te nkaraki enkop.

¹⁵Neitoki apa Ilfilisti aata olarrabal o Israel, nedoyio Daudi alo te nebo isinkan lenyena nearare ninche Ilfilisti; neilepunye Daudi.

¹⁶Ore Ishbi-benob, obo apa le ishoi e lelo tung'ana sapuki laa shekeli iip o suyai enkirroishi e mpere enye, oenita olalem ng'ejuk, neing'oru pee ear Daudi metua.

¹⁷Kake eewuo Abishai olayioni le Seruiya aretu, nerasaki ilo Filisti near ninye metua. Neitirrishaki iltung'ana le Daudi ninye aajoki, “Mintoki aekata iyie aipang alo te nebo iyiook olarrabal, pee miar ake olkilang'ilang'et le Israel.”

¹⁸Ore te siadi ena neitoki atii olarrabal apa o Lfilisti te Gob; neari metua Sibekai ol Husati Saf, laa ninye apa obo le ishoi e lelo tung'ana sapuki.

¹⁹Neetae ake sii apa olarrabal o Lfilisti te Gob; neari Elhanan olayioni le Yaareoregim, le Betlehem near metua Goliat le Giti oba enchata e mpere enye anaa embokishi o lashetani.

²⁰Neetae sii apa olarrabal te Gas, teine apa netii oltung'ani sapuk oodo oata ilkimojik ile te pooki aina, o lkimojik ile te pooki keju, tikitam o oong'uan esiana e pooki; naa ole ishoi sii apa ninye e lelo tung'ana sapuki.

²¹Ore ake pee edek ninye Israel near ninye metua Yonatan olayioni le Shimei, ilo alashe le Daudi.

²²Ore kulo oong'uan naa ile ishoi e lelo tung'ana apa sapuki ootii Gas; near Daudi te nkaina enye o te nkaina oo sinkan lenyena metuata.