Read MAASAI REVISED PROTESTANT 2 Samuel 23 Bible Online

2 Samuel 23 - MAASAI REVISED PROTESTANT bible

2 Samuel 23

¹Ore taata, kulo ilomon oobayie le Daudi: Irorei le Daudi, olayioni le Yese, irorei le ilo tung'ani oilepieki aaya shumata, ilo obukokino eilata te Nkai e Yakobo, ilo oranyu isinkolioitin oomelok le Israel:

²“Eirorita Enkiyang'et o Laitoriani te nanu, etii ororei lenye olng'ejep lai.

³Eiroro Enkai e Israel, aatiaka endapidapoi e Israel: Te neitore oltung'ani te sipata iltung'ana, neitore te uriata e Nkai,

⁴neitawang'aki ninche anaa ewang'an e nkakenya, anaa enkolong nawang'u tadekenya metii inkatampo, anaa enchan naitubulu inkujit te nkop.

⁵Ee, aimeitashe enkaji ai aiko neijia te Nkai? Amu eitobira ninye te nebo nanu osotua loo ntarasi, keishiaakino too ntokitin pooki netagolieki. Amu aimeidimie ninye metubula eretoto ai pooki o eyieunoto ai?

⁶Kake ore iltung'ana lemeeta Enkai, netiu pooki anaa ilkiku ootanang'ayioki; amu meidimi aawaita te nkaina;

⁷kake ore ilo tung'ani oibung ninche neeta esekenkei o enchata e mpere, nemuti ninche tukul te nkima.”

⁸Kuna inkarn oo ltung'ana magil apa oata Daudi to larrabal: Yosheb-bashebet Oltakenoni; kitok apa ninye te lelo okuni, eilepie ninye empere enye aarare iltung'ana iip isiet ootasesekuana ninye te nkata nabo.

⁹Ore oliare te ninye tiatua iltung'ana okuni magil naa Eliesa olayioni le Dodo olayioni le Ahohi. Etii apa ninye te nebo Daudi ina kata pee eiturrurro Ilfilisti to larrabal, neshuko iltung'ana le Israel.

¹⁰Nedumunye ninye near Ilfilisti o meteekunye enkaina enye, neibung'are enkaina enye o lalem lenye; neyau Olaitoriani enkisulata kitok ina olong; nerrinyunye iltung'ana aasujaa ninye pee epur lelo ootasesekuanaki.

¹¹Ore olosujita ninye naa Shama, olayioni le Agee Olharari. Eiturrurrote Ilfilisti te nebo te Lehi, teine wueji apa nebore endaa nauno; neisik iltung'ana aailany Ilfilisti.

¹²Kake etune ninye aitashe te mpolos e ine, neng'oroo ine, nesesekuan Ilfilisti; neyau Olaitoriani enkisulata kitok.

¹³Ore okuni loo ltung'ana tomoni uni gelunot nedoyio aapuo, nepuonu enetii Daudi etinyikua enkata e nkikesare te nkapune e Adulam, ina kata apa etii oltim loo Lfilisti oerata le Refaim.

¹⁴Netii apa Daudi ina kata atua enkisudoroto; ore oltim loo Lfilisti netii Betlehem.

¹⁵Nejo Daudi te yieunoto, “Oi naaji aaisho nanu oltung'ani enkare naok naing'uaa olchorro le Betlehem otii embata e kishomi!”

¹⁶Neim lelo tung'ana okuni magil atua ilng'oborri loo Lfilisti; neoku enkare te ilo shorro le Betlehem apa otii embata e kishomi, neyaki Daudi. Kake eitu eok; eibukoyie ninye te dukuya Olaitoriani,

¹⁷nejo, “Metalakuana te nanu, Olaitoriani, tenaa kaas nanu ena. Kaok nanu osarge loo ltung'ana ooshomo te mbatisho e nkishui enye?” Neaku eitu eok ninye. Kuna baa etaasa lelo tung'ana okuni magil.

¹⁸Ore apa Abishai, olalashe le Yoab, olayioni le Seruiya, naa ninye olarikoni le tomoni uni. Neilepie ninye enkaina enye aarare iltung'ana iip uni nesesekuan ninche, neisulie enkarna te lelo okuni.

¹⁹Ninye apa eyioloi oleng te lelo tomoni uni, neaku olarikoni lenye; kake eitu eaku te lelo okuni.

²⁰Ore apa Benaia olayioni le Yohoida naa oltung'ani opi oleng le Kabseel, olaasani loo nkiasin sapuki; etara intiamasin are e Moab. Eshomo sii apa adoyio near olng'atuny tiatua engumoto ina kata apa etadowuo empaso e nkirobi.

²¹Nesesekuan olmisiri, oltung'ani oikishian. Keeta apa ilo Misiri empere te nkaina enye; kake eshomo Benaia enetii ninye te ng'udi enye, newuapaa empere te nkaina o Lmisiri, nesesekuan ninye te mpere enye kewan.

²²Kuna baa etaasa Benaia olayioni le Yehoida, netum enkarna tiatua lelo tung'ana okuni magil.

²³Keyioloi apa oleng tiatua lelo tomoni uni, kake eitu elusoo te pokira okuni. Nepik apa Daudi ninye meitasheiki ilarripok lenyena.

²⁴Ore apa Asahel olalashe le Yoab naa obo le lelo tomoni uni; Elhanan olayioni le Dodo le Betlehem,

²⁵Shama le Harod, Elika le Harod,

²⁶Heles o Lpalti, Ira olayioni le Ikesh le Tekoa,

²⁷Abiesa le Anatot o Mebunai Olhushati,

²⁸Salmon Olhohi o Maharai le Netofa,

²⁹o Heleb olayioni le Baana le Netofa, Itai olayioni le Ribai le Gibea loo Lbenchamen,

³⁰Benaia le Piraton, Hidai loo nong'ot e Gaash,

³¹Abilabon le Lbati, Asmafet le Bahurim,

³²Eliaba le Shaalbon, olayioni le Yashen, Yonatan,

³³Shama Olharari, Ahiam olayioni le Sharar Olharari;

³⁴Elifelet olayioni le Ahasbai le Maaka, Eliam olayioni le Ahitofel le Gilo,

³⁵Hesro le Karmel, Paarai Olabi,

³⁶Igal olayioni le Natan le Soba, Bani Olgadi,

³⁷Selek Olamori; Naharai le Be-erot, olanapani loo masaa o larrabal le Yoab olayioni le Seruiya,

³⁸Ira ilo Tiriti; Gareb ilo Tiriti; Uria ilo Hiti:

³⁹tomoni uni o opishana pooki.