Read MAASAI REVISED PROTESTANT 2 Samuel 5 Bible Online

2 Samuel 5 - MAASAI REVISED PROTESTANT bible

2 Samuel 5

¹Nepuonu iloshon pooki loo Siraeli enetii Daudi te Hebron, nejo, “Ng'ura ajo kira iyiook iloik linono o nkiri o sesen lino.

²Ore too nkolong'i naatulusoitie apa aa Saul olaiguanani te shumata iyiook, iyie apa otorikoyie aipang'ie niriku aitijing'u Israel; nikijoki Olaitoriani iyie, ‘Iaku iyie olchekut loo ltung'ana laainei, Israel, naa iaku kitok te shumata Israel.’ ”

³Neaku eetuo ilpayiani pooki loo Siraeli enetii olaiguanani te Hebron; neitobir olaiguanani Daudi olning'o te nebo ninche te Hebron te dukuya o Laitoriani, nebukoki ninche Daudi eilata aaput aaitaa olaiguanani te shumata Israel.

⁴Naa oloo larin tomoni uni apa Daudi pee eiteru aitoreisho, neitoreisho ilarin artam.

⁵Ore te Hebron neitore ninye Yuda ilarin oopishana o lapaitin ile; ore te Yerusalem neitore Israel pooki o Yuda ilarin tomoni uni o okuni.

⁶Nelo olaiguanani o ltung'ana lenyena Yerusalem aarare Ilyebusi, lelo oomanya ina kop, apa ootiaakita Daudi, “Milotu iyie ajing'u atua ene, kake aikimbooyo ninye ilmodook o lmaiman” - ejo, “Meidim aekata Daudi aeu atua ine.”

⁷Ore eyia eibung'a Daudi eng'ape e Sion, aa taa, enkanasa e Daudi.

⁸Nejo Daudi teina olong, “Ore pooki ng'ae olo aar Ilyebusi, inchoo eilep to lbaata le nkare pee erasaki lelo modook o lmaiman, apa ooiba oltau le Daudi.” Neaku etejoki, “Ore olmodooni o lmaima melotu atua aji.”

⁹Nebik Daudi tiatua ilo sempewuet nejo ninye enkanasa e Daudi. Neshet Daudi ina anasa aitamanaa ebaiki Milo neito atua.

¹⁰Neaku Daudi kitok oleng oleng, amu ore Olaitoriani, Enkai oo lororani, etii apa te nebo ninye.

¹¹Ore Hiram olaiguanani le Tiro neirriwaa ilkiliku enetii Daudi, neirriwaa sii iltarakua o laguetak loo nkeek o laguetak loo soito laa ninche ooteshetakita Daudi enkaji.

¹²Neyiolou Daudi inchere eitasheyie Olaitoriani ninye aitaa olaiguanani le Israel o nchere eilepunye ninye enkitoo enye te nkaraki iltung'ana lenyena Israeli.

¹³Neya Daudi inkapiak kumok o nkituaak te Yerusalem, eidipa aeu eing'uaa Hebron; neikini Daudi ilayiok kumok o ntoyie.

¹⁴Naa kuna inkarn e lelo ootoikioki ninye te Yerusalem: Shamua o Shobab o Natan o Solomon

¹⁵o Ibar o Elishua o Nefeg o Yafia

¹⁶o Elishama o Eliada o Elifelet.

¹⁷Ore ake pee ening Ilfilisti inchere etubukokoki Daudi eilata aaitaa olaiguanani te Israel, neilepu Ilfilisti pooki eing'oru Daudi; kake etoning'o Daudi ina nelo aisudori to sempewuet.

¹⁸Neaku eetuo apa Ilfilisti neidapashakino oerata le Rafadim.

¹⁹Neikilikuanishore Daudi Olaitoriani, ejo, “Amaa, kalo nanu aarare Ilfilisti? Inchoru iyie ninche apik atua enkaina ai?” Nejoki Olaitoriani Daudi, “Ilepa shomo; amu kesipa kaishoru nanu Ilfilisti apik atua enkaina ino.”

²⁰Nelotu Daudi Baal-Perasim, nemir Daudi ninche teine; nejo ninye, “Etigila Olaitoriani ilmang'ati laainei te dukuya nanu, anaa oloirrag le enkare teneosh enkuaas.” Neaku ore enkarna e ine wueji naa keji Baal-Perasim.

²¹Neing'uaa Ilfilisti nkitanyaanyukot oo nkaitin enye teine, nenap Daudi o ltung'ana lenyena ninche aaya.

²²Neitoki ake Ilfilisti aaigil aailepu aapuonu, neidapashakino oerata le Refaim.

²³Ore ake pee eikilikuanishore Daudi Olaitoriani, nejo ninye, “Milep alo; shomo tamanai iimu te siadi, nilotu enetii ninche te nkishiaakinoto oo lkeek adoru ooji Balsam.

²⁴Ore ake pee ining oltoilo le lototo te nchumata oo lkeek, ina kata tonyuaa amu etaa keipang Olaitoriani alo te dukuya ino aar enjore oo Lfilisti.”

²⁵Neas Daudi anaa enaitanapa Olaitoriani ninye, near Ilfilisti eiteru te Geba o metabaiki Gesa.