Read MAASAI REVISED PROTESTANT 2 Samuel 7 Bible Online

2 Samuel 7 - MAASAI REVISED PROTESTANT bible

2 Samuel 7

¹Ore apa ebikito olaiguanani te nkaji enye, neishoo ninye Olaitoriani enkiyeng'iyeng too lmang'ati lenyena pooki oomanita.

²Nejoki olaiguanani Natan ilo oiboni, “Ng'ura taata, abikito nanu te nkaji oo ltarakua, kake ore osanduku le Nkai netonita tiatua olng'obor.”

³Nejoki Natan olaiguanani, “Shomo, taasa ina pooki natii atua oltau lino; amu ketii Olaitoriani te nebo o iyie.”

⁴Kake ore ina kewarie ake nelotu ororei lo Laitoriani enetii Natan ajoki,

⁵“Shomo tiaaki osinka lai Daudi, ‘Nji ejo Olaitoriani: Amaa, aikishetaki iyie enkaji nabikie tiatua?

⁶Eitu aekata nanu aton tiatua enkaji ebaiki enkolong apa nailepunye iltung'ana loo Siraeli aitung'uaa Misiri o metabaiki ena olong, kake to lng'obor oshi aloolo aitaa emanyisho ai.

⁷Ore tiatua iwuejitin pooki nashomo nanu te nebo iltung'ana pooki le Israel, eitu nanu airo ororei te likae hoo obo loo larishak loo Israeli laa ninche aitanapa meirrita iltung'ana laainei Israeli, ajoki; Kainyoo pee eitu kishetakiki nanu enkaji oo ltarakua?’

⁸Ore naa nji tiaaki osinka lai Daudi, ‘Nji ejo Olaitoriani loo lororani, aawa apa nanu iyie aitung'uaa enkirritare, aitung'uaa esujata oo nkerra, pee itum ataa olkitok te shumata iltung'ana laainei Israel;

⁹natii nanu te nebo o iyie te pooki wueji nishomo, naar ilmang'ati linono pooki aiwuang'ie te dukuya ino; naa kaaitobiraki nanu iyie enkarna kitok, anaa enkarna e lelo kituaak le nkop.

¹⁰Naa kagelu nanu ewueji te nkaraki iltung'ana laainei Israel, naun nanu ninche, pee etum aatobik te wueji enye maate, nemeitokini ae kata aaitanyamal; nemeitoki iltung'ana lo larrabal aaisilisil ninche, anaa apa,

¹¹ebaiki ina kata apa nagelu ilarishak apik shumata iltung'ana laainei Israel; naa kaaisho nanu iyie enkiyeng'iyeng too lmang'ati linono pooki. Ore ake eibalunye Olaitoriani te iyie inchere, eikintaa iyie Olaitoriani enkaji.

¹²Ore te neiputayu inkolong'i inono nirrag iyie te nebo loo papaai lino, nadamu nanu eishoi ino te siadi iyie, ilo olotu aing'uaa osesen lino, naitubulaa nanu enkitoo enye.

¹³Keshet ninye enkaji te nkaraki enkarna ai, naa kaitasheyie nanu olorika le nkitoo enye intarasi.

¹⁴Naaku nanu papaai lenye, neaku ninye olayioni lai. Te neas ninye entorroni, naitame nanu ninye te ng'udi e tung'ani o too oshot e nkerai e tung'ani;

¹⁵kake maiwuang'ie nanu enyorrata ai nauno aitung'uaa ninye, anaa apa enaiwuang'ie te Saul, ilo apa laiwuang'ie nanu te dukuya iyie.

¹⁶Ore enkaji ino o enkitoria naa keitisipi te dukuya nanu; ore olorika lino le nkitoo keitasheyieki intarasi.’ ”

¹⁷Ore te risioroto e kulo rorei, o te risioroto ena duaata pooki, neirorie Natan Daudi.

¹⁸Nelo olaiguanani Daudi atua neton te dukuya Olaitoriani, nejo, Kara nanu ng'ae, Ee Olaitoriani Enkai, naa kainyoo enkaji ai, metaa eikiyawua nanu eneba nji?

¹⁹Ore ake eyia naa entoki kiti apa ena too nkonyek inono, Olaitoriani Enkai; iroro sii iyie te nkaraki enkaji o sinka lino te nkata sapuk nalotu, nikintoduaa nanu iishoritin naapuonu, Olaitoriani Enkai!

²⁰Naa kainyoo ae nikijoki Daudi iyie? Amu iyiolo iyie osinka lino, Olaitoriani Enkai!

²¹Te nkaraki enkisiligata ino, naa te risioroto oltau lino, itaasa iyie ena e nkitoo aidimie osinka lino metayiolo ina.

²²Metaa ira iyie kitok, Ee Olaitoriani Enkai; amu metii likae oikununo anaa iyie, nemetii ae Ai neme iyie ake, te risioroto e nena pooki nikitoning'o too nkiyiaa ang.

²³Kalo likae orere ti oriong e nkop oikununo anaa iltung'ana linono Israel, laa ninche eshomo Enkai akordu aitaa iltung'ana lenyena, aitobiraki kewan enkarna, neas te nkaraki ninche intokitin kituaak naaitureisho, te yararoto te dukuya iltung'ana lenyena iloreren o nkaitin enye?

²⁴Nintasheyie te nkaraki kewan ino iltung'ana linono Israel metaa iltung'ana linono intarasi; ore iyie, Olaitoriani, niaku Enkai enye.

²⁵“Ore taata, Ee Olaitoriani Enkai, intisipa intarasi ilo rorei liroro iyie oipirta osinka lino neipirta enkaji enye, nias anaa eniroro;

²⁶naa kerupi enkarna ino intarasi, eji, ‘Olaitoriani loo lororani ninye Enkai oo Siraeli,’ ore enkaji o sinka lino Daudi neitubulari te dukuya iyie.

²⁷Amu iyie, ee Olaitoriani loo lororani, Enkai e Israel, naitayio ena bolunoto aitodol osinka lino, ijo, ‘Kaashetaki iyie enkaji;’ neaku etagolo osinka lino oshoke pee kiomon iyie ena omono.

²⁸Ore taata, iyie Olaitoriani Enkai, iyie Enkai, nesipa irorei linono, nisiligie ena toki sidai osinka lino;

²⁹ore naa taata tishipayu iyie pee imayian enkaji osinka lino, pee etum ashomo dukuya intarasi te dukuya iyie; amu ore iyie, ee Olaitoriani Enkai, niroro, naa te mayianata ino emayiani enkaji o sinka lino intarasi.”