Read MAASAI REVISED PROTESTANT 2 Samuel 8 Bible Online

2 Samuel 8 - MAASAI REVISED PROTESTANT bible

2 Samuel 8

¹Ore te siadi ena nemir Daudi Ilfilisti neitoreu ninche, neya Daudi Metegama aitung'uaa enkaina oo Lfilisti.

²Nemir ninye Moab, netem ninche to lgosoi, aisho ninche meirraga te nkop; ore ilkererin oaare netemi pee eari metuata, ore olkereri obo olulung'a nepali. Neaku Ilmoabu isinkan le Daudi neyaki kodi.

³Neitoki sii Daudi amir Hadadesa olayioni le Rehob, olaiguanani le Soba, eloito arrinyu enkitoo enye to lkeju le Frati.

⁴Neya Daudi aitung'uaa ninye enkalifu o iip naapishana o sikarini ooked imbartan oo sikarini inkalifuni tikitam oopuo too nkejek nedung Daudi irrisheta mbartan pooki oo ngarrin, kake etelekua inaaidip ingarrin iip oo mbartan.

⁵Ore ake pee epuonu Isiria le Dameski aaretu Hadadesa ilo aiguanani le Soba, near Daudi metuata iltung'ana inkalifuni tikitam oaare loo Siria.

⁶Nepik Daudi iltimito atua Aram e Dameski; neaku Isiria isinkan le Daudi neyaki kodi. Neisho Olaitoriani Daudi metimirisho te pooki wueji neba anaa eneshomo.

⁷Neya Daudi ilong'oi e saabu apa naanapita isinkan le Hadadesa, neyau ninche Yerusalem.

⁸Ore ebaiki Beta ometabaiki Berotai, inkanas e Hadadesa, neya olaiguanani Daudi isuyan kumok.

⁹Ore ake pee ening Toi olaiguanani le Hamat inchere etimira Daudi enjore pooki e Hadadesa,

¹⁰neirriwaa Toi olayioni lenye Yoram enetii olaiguanani Daudi, o pee eisho ninye enchunet te nkaraki nataarare Hadadesa nemir ninye; amu kesesh apa eeta Hadadesa olarrabal o Toi. Neyau Yoram te nebo ninye intokitin e nkosholai, o saabu o no suyai.

¹¹Ore sii kuna neitisiny olaiguanani Daudi to Laitoriani, te nebo ina osholai o saabu apa naaitisinya naaing'uaa iloreren pooki apa ootimira ninye,

¹²ebaiki Edom o Moab o Ilamoni o Filistia o Amaleki o naaing'uaa iyarunot e Hadadesa olayioni le Rehob, olaiguanani le Soba.

¹³Neishur enkarna e Daudi. Ore pee eshukunye ninye, nesesekuan Iltung'ana inkalifuni tomon o isiet tiatua Oerata le Munyan.

¹⁴Nepik ninye iltimito Edom; ore ile Edom pooki neaku isinkan le Daudi. Neisho Olaitoriani Daudi metimirisho te pooki wueji neba anaa eneshomo.

¹⁵Neaku eitoria apa Daudi Israel pooki; neisiaaisho Daudi te sipata o te risioroto too ltung'ana lenyena pooki.

¹⁶Naa Yoab olayioni le Seruiya apa oitore enjore, naa Yehoshafat olayioni le Ahilud apa olaigeroni.

¹⁷Naa Sadok apa olayioni le Ahitab o Ahimelek olayioni le Abiata ninche ilapolosak; naa Seraia apa olasirani;

¹⁸naa Benaia olayioni le Yehoida apa otii shumata lelo Kereti o lelo le Peleti ore ilayiok le Daudi naa ilapolosak.