Read MAASAI REVISED PROTESTANT 2 Samuel 9 Bible Online

2 Samuel 9 - MAASAI REVISED PROTESTANT bible

2 Samuel 9

¹Nejo Daudi, “Keton etii oltung'ani obo otelekua te nkaji e Saul, pee atum nanu aitoduaa ninye esupatisho te nkaraki Yonatan?”

²Netii apa osinka le nkaji e Saul oji Siba, neipotu ninche ninye enetii Daudi; nejoki olaiguanani ninye, “Ira iyie Siba?” Nejo ninye, “Ore osinka lino naa ninye ilo.”

³Nejo olaiguanani, “Aimeton etii likae obo le nkaji e Saul, pee atum nanu aitoduaa ninye esupatisho e Nkai?” Nejoki Siba olaiguanani, “Eton etii olayioni le Yonatan; olmaima ninye tarrushi inkejek enyena.”

⁴Nejoki olaiguanani ninye, “Koree ninye?” Nejoki Siba olaiguanani, “Etii atua enkaji e Makir olayioni le Amiel te Lo-Debar.”

⁵Kaae neirriwaa olaiguanani meyauni ninye aaitung'uaa enkaji e Makir ole Amiel, te Lo-debar.

⁶Nelotu Mefiboshet, olayioni le Yonatan ole Saul enetii Daudi, nebatata te nkomom enye neserem. Nejo Daudi, “Mefiboshet!” Newal ninye, “Nele osinka lino.”

⁷Nejoki Daudi ninye, “Miureisho; amu kaaitodol nanu esupatisho te nkaraki papaai lino Yonatan, naa kaashukoki iyie enkop pooki e Saul papaai lino; nidaa iyie te misa ai anaake.”

⁸Neserem ninye, nejo, “Kainyoo ninye osinka lino, metaa ing'or iyie oldia otua anaa nanu?”

⁹Neipotu olaiguanani Siba, ilo sinka le Saul, nejoki ninye, “Ore nena pooki apa naara ine Saul o ne nkaji enye pooki aishoo nanu olayioni lo lkitok lino.

¹⁰Ore iyie o layiok linono o sinkan linono niturokiki ninye enkurma niyauu atua nena nintayuyu, pee etum olayioni lo lkitok lino endaa nanya; kake ore Mefiboshet olayioni lo lkitok lino nedaa anaake te misa ai.” Neeta apa Siba ilayiok tomon o imiet o sinkan tikitam.

¹¹Nejoki Siba olaiguanani, “Ore te risioroto e nena pooki, naaitanap olkitok lai olaiguanani osinka lenye, neaku ina eas osinka lino.” Neaku etadee Mefiboshet te misa e Daudi, anaa obo loo layiok lo laiguanani.

¹²Neeta apa mefiboshet olayioni oti oji enkarna Mika. Ore pooki ootobiko te nkaji e Siba neaku isinkan le Mefiboshet.

¹³Neaku etobiko Mefiboshet te Yerusalem; amu kedaa apa ninye anaake te misa o laiguanani. Naa olmaima apa too nkejek enyena pokira are.