Read MAASAI REVISED PROTESTANT 1 Ilaiguanak 11 Bible Online

1 Ilaiguanak 11 - MAASAI REVISED PROTESTANT bible

1 Ilaiguanak 11

¹Etonyorra apa Olaiguanani Solomon inkituaak kumok oo loreren: entito e Farao, o enoo Lmoabu o enoo le Amon o enoo le Edom, o enoo le Sidon, o nkituaak oo Lhiti, nena e lelo oreren apa ootiaaka Olaitoriani iltung'ana loo Siraeli,

²“Emiyamama ake o ninche amu kesipa kepuo ninche aaibelekeny iltauja linyi nisujaa inkaitin enye.” Neibung apa Solomon kuna kituaak te nyorrata.

³Keeta apa ninye inkituaak iip naapishana, o nkapiak iip uni, ore nena kituaak enyena neibelekenya oltau lenye.

⁴Ore anaa nemoruau Solomon eibelekenya inkituaak enyena oltau lenye metusujai inkaitin enye; neitu eibung'are oltau lenye oleng Olaitoriani Enkai enye, anaa enatiu apa oltau le Daudi papaai lenye.

⁵Amu etusujayie Solomon Ashtoret ina ai ng'oruoi e Sidon, nesujaa Milkom ilo minong loo le Amoni.

⁶Neaku etaasa apa Solomon entorroni too nkonyek o Laitoriani, neitu ninye, eunokino asujaa Olaitoriani anaa apa enataasa Daudi papaai lenye.

⁷Neitoki Solomon ashetu ewueji neika e Kermosh ilo minong le Moab o ene Molek ilo minong le Amon, to ldoinyo te nkalo e nkilepunoto e nkolong e Yerusalem.

⁸Neiko ninye neijia te nena kituaak enyena pooki oo loreren naapej enkorropil nepolosaki inkaitin enye.

⁹Negorokino apa Olaitoriani Solomon te nkaraki naibelekenye oltau lenye aing'uaa Olaitoriani, Enkai e Israel, naipang'aka ninye katitin are.

¹⁰Neitanapa ninye tialo ena bae pee melo arubare kulie aitin; kake eitu ninye eibung ina naitanapa Olaitoriani.

¹¹Ore te nkaraki ina nejoki Olaitoriani Solomon, “Ore amu ena itadamua, neitu imbung olning'o lai lo sotua o nkiguanat aainei naaitanapa nanu iyie esipa, kadung'oo nanu enkitoria ino aiwuang'ie te iyie naisho osinka lino.

¹²Kake ore te nkaraki Daudi papaai lino, maas nanu ena too nkolong'i e nkishui ino, kake kalo nanu adung'oo enkitoria te nkaina o layioni lino.

¹³Ore ake eyia, madung'oo nanu enkitoria pooki; kake kaisho nanu olosho obo olayioni lino, te nkaraki Daudi osinka lai o te nkaraki Yerusalem naa ninye ategelua.”

¹⁴Nedumu Olaitoriani olmang'atinta metigilunore Solomon, oji Hadad le Edom. Ole nkaji enkitoo apa ninye te Edom.

¹⁵Amu ore apa etii Daudi Edom, ore Yoab olarikoni le njore neilep alo anukaa ilootuata.

¹⁶Near Hadad metuata ilewa pooki le Edom. (Amu etobiko apa Yoab o ltung'ana pooki loo Siraeli te Edom ilapaitin ile, ometaba anaa neishie pooki lee te Edom.)

¹⁷Kake eisikaka Hadad Misiri tenebo kulikae tung'ana le Edom loo sinkan le menye, neton apa aa enkerai kiti Hadad.

¹⁸Nedumunye ninche te Midian nepuonu Paran, neshoru kulikae te Paran nepuonu Misiri, enetii Farao olaiguanani le Misiri, laa ninye oishoo Enkaji, neikenaki ninye eorikinoto endaa, neisho ninye enkop.

¹⁹Netum Hadad omom oleng too nkonyek e Farao, neaku eishoo meyama enkanashe e nkitok enye, enkanashe e Tafenes ina kitok o laiguanani.

²⁰Ore ina anashe e Tafenes neiki ninye olayioni oji Genubat, laa te nkaji e Farao eoru Tafenes ninye ilki, netii apa Genubat enkaji e Farao aboitare ilayiok le Farao.

²¹Kake ore ake pee ening Hadad ajo etua Daudi, netua sii Yoab olarikoni le njore, nejoki Hadad Farao, “Nchooki nanu mashomo enkop ang.”

²²Kake etiaaka Farao ninye, “Kainyoo nikitong'orikia te nanu, eji metaa ing'oru arrinyo enkop inyi?” Nejoki Hadad ninye, “Nchooki ake duoo mashomo.”

²³Neitoki Enkai adumu likae mang'atinta oji Rason olayioni le Eliada apa oisika aing'uaa olkitok lenye Hadadesa olaiguanani le Soba.

²⁴Neiturrurroki ninye kewan iltung'ana neaku olarikoni loo larruok, ina kata apa eidipa Daudi atasesekuanisho; nepuo ninche Dameski nebik teine, neitaa ninche ninye olaiguanani le Dameski.

²⁵Olmang'atinta apa le Israel ninye too nkolong'i pooki e Solomon, neas ntorrok anaa apa enataasa Hadad. Neaku olmang'atinta le Israel, neitore Siria.

²⁶Ore apa Yeroboam olayioni le Nebat le Efraim te Sereda naa osinka le Solomon, oji enkarna e ng'otonye Seruyia, naa enkoliai. Neinyototokino sii ninye agilunore olaiguanani.

²⁷Naa te nkaraki ena apa pee etudumakine olaiguanani. Etesheta apa Solomon Milo, neram esuntai apa natigile te nkanasa e Daudi papaai lenye.

²⁸Oltung'ani apa ogol oleng Yeroboam, naa ore ake pee edol Solomon ajo kaarriyia ilo barnoti, neisho meitasheiki esiaai pooki oo nkaik e nkaji e Yosef.

²⁹Ore nabo olong neipang Yeroboam te Yerusalem, netumore oloiboni le Nkai oji Ahija le Shilo. Neishopito apa Ahija olkila ng'ejuk; netumo lelo pokira aa ninche ake te nkisiashata.

³⁰Neitoki Ahija aibung oladuoo kila ng'ejuk oishopito nepolos aitaa ndung'ot tomon aare.

³¹Nejoki ninye Yeroboam, “Iwa iyie ndung'ot tomon, amu inji ejo Olaitoriani, Enkai oo Siraeli, ‘Etaa kajo pee adung'oo enkitoria te nkaina e Solomon, naa kaaisho iyie iloshon tomon,

³²(kake ketum ninye olosho obo te nkaraki osinka lai Daudi o te nkaraki Yerusalem, ina anasa naa ninye ategelua too loshon loo Siraeli.)

³³Ore te nkaraki naatung'uayie nanu Solomon, nelo aserem Ashterot ina ai ng'oruoi oo le Sidon, o Kemosh ina ai e Moab o Milkom ina ai oo Lamori, neitu eas esidai too nkonyek aainei, neitu eibung inkikoot aainei, o nkiguanat aainei, anaa apa enataasa Daudi papaai lenye.

³⁴Ore ake eyia maya nanu enkitoo pooki aitung'uaa enkaina enye; kake kaitaa nanu ninye olarikoni too nkolong'i pooki enkishui enye te nkaraki Daudi osinka lai, laa ninye ategelua, neibung'a ninye inkitanapat aainei o nkiguanat aainei;

³⁵kake kaya nanu enkitoria aitung'uaa enkaina o layioni lenye naaisho nanu iyie iloshon tomon.

³⁶Kake ore olayioni le Solomon kaisho nanu olosho obo, pee etum Daudi osinka lai ataa keeta oltaa te dukuya nanu anaake te Yerusalem, teina anasa nategelua nanu apik enkarna ai.

³⁷Naa kaaya nanu iyie, nilo aitore nena pooki naang'uar oltau lino, nilo aaku olaiguanani te Israel.

³⁸Naa tenining iyie nena pooki naaitanapa nanu iyie, nilo too nkoitoi aainei, niaas isupati too nkonyek aainei, aibung inkikoot aainei, anaa apa enataasa Daudi osinka lai, naaku nanu tenebo iyie, nashetu nanu enkaji ino aitubul, anaa apa enateshetaka Daudi, naaisho nanu iyie Israel.

³⁹Naa ore te nkaraki ena kaitame nanu eishoi e Daudi, kake mme ntarasi.’ ”

⁴⁰Neing'oru taa Solomon pee ear Yeroboam metua: kake etudumunye Yeroboam, neisikaki Misiri, nelo enetii Shishak olaiguanani le Misiri, neton ninye te Misiri ometabau keeya e Solomon.

⁴¹Ore apa teina kata nkiaasin pooki e Solomon o nena pooki naataasa o eng'eno enye nagut, neigeroki te mbuku oo nkiasin e Solomon.

⁴²Ore apa enkata naitoria Solomon Yerusalem o Israel pooki naa ilarin artam.

⁴³Neirura Solomon aye tenebo loo menye, nenukari te nkanasa e Daudi papaai lenye, neitoreisho Rehoboam olayioni lenye te rishata enye.