Read MAASAI REVISED PROTESTANT 1 Ilaiguanak 14 Bible Online

1 Ilaiguanak 14 - MAASAI REVISED PROTESTANT bible

1 Ilaiguanak 14

¹Ore apa teina kata nemuoyu olayioni oji Abija, olayioni le Yeroboam.

²Nejoki Yeroboam enkitok enye, “Tudumunye nimbelekenya, pee meyiolouni ake ajo ira enkitok e Yeroboam, nilo Shilo; ng'ura etii oloiboni oji Ahija ine laa ninye apa oibonuo tialo nanu nchere kaaku olaiguanani le kulo tung'ana.

³Toshoroi imukateni tomon o embata oo mukateni naamelook o esiang'au e naisho, nilo enetii ninye; pee kiliki ninye enatiu enkerai.”

⁴Neas enkitok e Yeroboam ina, nedumunye ninye nelo Shilo, nelo enkaji e Ahija. Nemeekure apa edolisho Ahija amu eiliilaitie inkonyek enyena te nkaraki emoruao.

⁵Nejoki Olaitoriani Ahija, “Ekilotu enkitok e Yeroboam aikilikuanishore te nkaraki olayioni lenye; amu kemuoi ninye. Ena o ena tiaaki ninye.” Ore ake pee ebau neitaakuno kaae kitok.

⁶Kake ore ake pee ening Ahija oltoilo loo roruat enyena, ejing'u aimu kutukaji, nejoki “Tijing'u ena kitok e Yeroboam, kainyoo pee intaakuno eira likae tung'ani? Amu aaitanapaki ilomon ooiroishi te nkaraki iyie.

⁷Shomo tiaaki Yeroboam ‘Nji ejo Olaitoriani Enkai oo Siraeli, ore amu aailepie iyie tiatua iltung'ana pooki, naaitaa iyie olarikoni te shumata iltung'ana laainei Isiraeli,

⁸natudung'oyie enkitoria aitung'uaa enkaji e Daudi, naaisho iyie; neitu ake sii itiu anaa osinka lai Daudi, apa oibung inkitanapat aainei naasuj ninye nanu to ltau lenye pooki, aas ake nena sidain too nkonyek aainei,

⁹kake ore iyie itaasa ntorrok aitalang nena pooki apa naatii dukuya iyie, nishomo dukuya aitobiraki kewan kulie aitin, o nkitanyaanyukot naasholuno, nikintagor nanu, nikincho nanu oriong. Ore naa

¹⁰kayau nanu entorroni shumata enkaji e Yeroboam, naiwuang'ie te Yeroboam pooki lee, aa oloena o lolakuno tiatua Israel pooki, namut nanu enkaji e Yeroboam tukul, anaa enapejoo oltung'ani olchala neishie.

¹¹Ore pooki ng'ae lo lmarei le Yeroboam oye tena anasa nenya ildien. Ore pooki ng'ae oye ti ong'ata nenya motonyi o loing'ang'e; amu Olaitoriani oiroro ena.’

¹²“Tudumunye naa taata shomo enkaji ino. Naa tenebaiki inkejek inono enkanasa, neye ina kerai.

¹³Naa keishiraki Isiraeli pooki ninye, nenukaa ninye; amu ore ilo laa ninye eeta Yeroboam naa kenukari te nkurare, amu atua ninye ake enotieki entoki naitiship Olaitoriani, Enkai oo Siraeli, tiatua enkaji e Yeroboam.

¹⁴Ore ake sii kedumu Olaitoriani te nkaraki kewan enye olaiguanani olotu shumata Isiraeli, laa ninye olo aiwuang'ie enkaji e Yeroboam.

¹⁵Naa keosh Olaitoriani Israel neitotiu anaa oseyiai oikirikira tiatua enkare, neitayu Isiraeli aiwuang'ie tena kop sidai apa naishoo loo menye, neidapashaki ninche teidia alo Frati, te nkaraki naitobira ninche Asherim enye neitagor Olaitoriani.

¹⁶Naa kepalaa ninye Isiraeli te nkaraki ina ng'oki e Yeroboam, apa naataasa neitaas sii iltung'ana loo Siraeli.”

¹⁷Nerrinyo enkitok e Yeroboam alo Tirsa. Ore ake pee ebau embata e nkaji enye, neye enkerai.

¹⁸Nenukaa Isiraeli pooki ninye neishiraki te risioroto o rorei lo Laitoriani, apa oiroro aimunye osinka lenye Ahija oloiboni le Nkai.

¹⁹Ore kulie kiaasin e Yeroboam, ilarrabali, o enkitoria enye, eigeroki ninche te mbuku oo ntepen oo laiguanak loo Siraeli.

²⁰Ore enkata apa naitoreishe Yeroboam, naa ilarin tikitam oaare, neirura aye anaa loo menye neitoreisho olayioni lenye Nadab te rishata enye.

²¹Eitoria apa Rehoboam olayioni le Solomon Yuda. Ore apa pee eiteru Rehoboam aitoreisho naa oloo larin artam oobo. Eitoreishe ninye ilarin tomon oopishana te Yerusalem, teina anasa naa ninye etegelua Olaitoriani tiatua iloshon pooki loo Siraeli, pee etum atipika enkarna enye ine. Naa keji apa enkarna e ng'otonye Naama e Amon.

²²Neas apa iltung'ana le Yuda embae torrono too nkonyek o Laitoriani, neitagor ninche ninye nepik olom te nkaraki nena ng'ok enye naataasa.

²³Amu eteshetakitia sii ninche ate iwuejitin neeika, o ng'apeta o Asherim, te pooki wueji neika o tiabori pooki shani onyori

²⁴neetae sii apa ilewa le nkisiaayiare e seremare enkiborra oo nkonyek teinakop. Etaasa ninche te risioroto e nena pooki olminong te lelo oreren apa ootaarayie Olaitoriani te dukuya iltung'ana loo Siraeli.

²⁵Ore to lari le imiet le nkitoria e Rehoboam neilepu Shishak olaiguanani le Misiri alotu agilunore Yerusalem.

²⁶Neya ninye ilchumat te nkaji o Laitoriani o lchumat te nkaji o laiguanani, neya ninye pooki toki. Neya sii nena long'oi pooki e saabu apa naaitobira Solomon;

²⁷neitobir olaiguanani Rehoboam ilong'oi o suyai apik erishata e nena, neisho ninche lelo kituaak le rripore, apa oorripito kutukaji e nkaji o laiguanani.

²⁸Ore pooki kata nalo olaiguanani enkaji o Laitoriani, nenapu olarriponi nena long'oi ayau enkaji e rripore.

²⁹Ore nkulie kiaasin e Rehoboam o pooki apa naataasa ninye, neigeroki tiatua embuku oo ntepen oo laiguanak le Yuda.

³⁰Neeta apa Rehoboam o Yeroboam olarrabal anaake.

³¹Neirura Rehoboam, neye anaa loo menye nenukari too nkuraren oo loo menye te nkanasa e Daudi. Ore apa enkarna e ng'otonye naa keji Naama e Amon, neitoreisho Abijam olayioni lenye te rishata enye.