Read MAASAI REVISED PROTESTANT 1 Ilaiguanak 16 Bible Online

1 Ilaiguanak 16 - MAASAI REVISED PROTESTANT bible

1 Ilaiguanak 16

¹Nelotu ororei lo Laitoriani aimu Yehu olayioni le Hanani te nkaraki Baasha, ejo,

²“Ore anaa naadumu ailepie iyie aitung'uaa nkulupuok, naaitaa iyie olarikoni loo ltung'ana laainei Isiraeli, nimbung'a iyie orrekie le Yeroboam, nitorikoko iltung'ana laainei Isiraeli metaasa ing'ok. Kintagoro nanu te nkaraki ing'ok enye.

³Kaiwuang'ie nanu katukul Baasha o enkaji enye aishie, naitaa enkaji ino anaa enkaji e Yeroboam olayioni le Nabat.

⁴Ore pooki ng'ae to lmarei le Baasha oye tiatua enkanasa, nenya ildiein. Ore pooki ng'ae oye ti ong'ota nenya ilmotonyi o loing'ang'e.”

⁵Ore apa inkiaasin e Baasha, o naataasa, o enkidimata enye, neigeroki tiatua embuku oo ntepen oo laiguanak loo Siraeli.

⁶Neirura Baasha neye anaa loo menye nenukari te Tirsa; neitoreisho Ela olayioni lenye te rishata enye.

⁷Neitoki ororei lo Laitoriani alotu eimu Yehu oloiboni le Nkai, olayioni le Hanani enetii Baasha o enkaji enye apa eipirta ilo rorei, te nkaraki entorroni pooki apa nataasa too nkonyek o Laitoriani, neitagor ninye teina siaai oo nkaik enyena, neiko anaa apa Yeroboam, nenyaaka sii aidaikie.

⁸Ore to lari le tikitam o ile lo laiguanani Asa le Yuda, neitore Ela olayioni le Baasha Isiraeli te Tirsa. Neitoreisho ilarin oaare.

⁹Kake etarresho Simri, ilo kitok lo lpisiaai loo ngarrin oo mbartan ninye. Ore apa etii ninye Tirsa, eokisho nemera te nkaji e Arsa, laa ninye apa oitasheiki enkaji te Tirsa,

¹⁰nejing'u Simri neosh ninye anang'ie enkop, near metua to lari le tikitam oopishana le nkitoria e Asa olaiguanani le Yuda, neitoreisho ninye te rishata enye.

¹¹Ore ake pee eiteru Simri aitoreisho, ore ake enatonie to lorika lenye le nkitoo, near enkaji e Baasha pooki metuata. Eitu ninye eing'uaa olee obo lo lmarei lenye anaa ilchoreta lenyena.

¹²Neidaikie Simri anaa enkaji e Baasha pooki, te risioroto o rorei lo Laitoriani apa oiroro tialo Baasha aimunye Yehu oloiboni le Nkai,

¹³te nkaraki ing'ok pooki e Baasha o ng'ok e Ela olayioni lenye apa naataasa ninche. Eitagoro ninche Olaitoriani Enkai oo Siraeli too nkitanyaanyukot enye.

¹⁴Ore apa nkulie kiaasin e Ela o nena pooki naataasa ninye, neigeroki tiatua mbukui oo ntepen oo laiguanak loo Siraeli.

¹⁵Ore to lari le tikitam oopishana le nkitoria e Asa olaiguanani le Yuda neitoreisho Simri nkolong'i naapishana te Tirsa. Netii apa iltimito ootuuno ilng'oborri egilunore Gibeton oo Filistia,

¹⁶ore lelo timito ootii ilng'oborri nening eji, “Etarresho Simri olaiguanani near metua.” Ore te nkaraki ina neitaa Isiraeli pooki Omri ilo kitok le njore, metaa olaiguanani le Israel ina olong oo lng'oborri.

¹⁷Neaku eilepa Omri aing'uaa Gibeton o Siraeli pooki tenebo ninye. Nepuo aang'adu Tirsa.

¹⁸Ore ake pee edol Simri nchere eibung'aki enkanasa, nelo ninye olgilata liatua le nkaji o laiguanani, nepejoo inaa aji o laiguanani etii atua, neye ninye.

¹⁹Etua te nkaraki e nena ng'ok enyena naataasa, neas ntorrok te dukuya Olaitoriani, neibung olkerreti le Yeroboam. O te nkaraki sii ing'ok naataasa erikoki Isiraeli ing'ok.

²⁰Ore apa nkulie kiaasin e Simri, o ina natarreshishe, neigeroki tiatua mbukui oo ntepen oo laiguanak loo Siraeli.

²¹Etoorote apa iltung'ana loo Siraeli katitin are: etusujaitie olpisiaai loo ltung'ana Tibni olayioni le Ginat aaitaa olaiguanani. Nesujaa olikae pisiai Omri.

²²Kake ore lelo tung'ana ootusujaitie Omri, nemir lelo ootusuja Tibni olayioni le Ginat. Neaku etua Tibni neaku Omri ninye olaiguanani.

²³Ore to lari le tomoni uni okuni le nkitoria e Asa olaiguanani le Yuda, neiteru Omri aitore Israel, neitoreisho ilarin tomon oaare. Too larin ile eitoria Tirsa.

²⁴Einyiang'ua apa ninye endoinyo e Samaria te Shemer neinosie ntalantani are e nkosholai, neitobir apa ninye ina doinyo ashet, nejo enkarna eina anasa natesheta Samaria, eipotie enkarna e Shemer, olopeny ina doinyio.

²⁵Neas Omri ntorrok too nkonyek o Laitoriani, neas ntorrok aitulus te lelo pooki ooiturukutuo te dukuya ninye.

²⁶Amu eibung'a ninye olkerreti le Yeroboam olayioni le Nebat. Ore too ng'ok naatorikoko ninye Israeli metaasa, neitagor Olaitoriani Enkai oo Siraeli, te nkaraki nkitanyaanyukot enye.

²⁷Ore apa nkulie kiaasin naataasa Omri, o ina kidimata naitodolua, neigeroki tiatua embuku oo ntepen oo laiguanak loo Siraeli.

²⁸Neirura Omri neye anaa loo menye. Nenukari te Samaria. Neitoreisho Ahab olayioni lenye te rishata enye.

²⁹Ore to lari le tomoni uni o isiet le nkitoria e Asa olaiguanani le Yuda, neiteru Ahab olayioni le Omri aitore Isiraeli te Samaria. Neitoreisho ilarin tikitam oong'uan.

³⁰Neas Ahab olayioni le Omri ntorrok te dukuya Olaitoriani aitulus te lelo apa ooiturukutuo te dukuya ninye.

³¹Ore edol anaa entoki nalelek te ninye teneibung olkerreti le Yeroboam olayioni le Nebat, neyau ninye Yesebel entito e Etabal olaiguanani le Sidon aitaa enkitok enye. Nelo ninye aisiaai Baal neserem ninye.

³²Neshetaki ninye Baal olperere lo lasar tiatua enkaji e Baal apa natesheta te Samaria.

³³Neitobir Ahab ashera. Etaasa Ahab mbaa kumok naaitagor Olaitoriani, Enkai oo Siraeli aitulus too laiguanak pooki loo Siraeli apa ootii te dukuya ninye.

³⁴Ore too nkolong'i enyena neshet Hiel le Betel Yeriko. Etipika ninye olkitamanyunoto ainosie Abiram olkikau lenye, nepik nchomito ainosie Segub olayioni lenye oti, te risioroto o rorei lo Laitoriani, apa oiroro aimunye Yoshua olayioni le Nuni.