Read MAASAI REVISED PROTESTANT 1 Ilaiguanak 2 Bible Online

1 Ilaiguanak 2 - MAASAI REVISED PROTESTANT bible

1 Ilaiguanak 2

¹Ore ake pee eaku keye Daudi, neitanap Solomon olayioni lenye; nejoki

²“Etataana enkata ai pee alo aye. Ntagoluoyu niaku olee,

³nimbung inkitanapat o Laitoriani Enkai ino, aim inkoitoi enyena, nimbung inkiguanat enyena, o nkitanapat enyena, o nkikoot enyena, o shakenisho enye, anaa enaigero too nkitanapat e Musa, pee itum atudupayu te pooki nias o te pooki wueji niim;

⁴pee etum Olaitoriani aitabai ina apa nairoro tialo nanu ajo, ‘Teneing'or ilayiok linono inkoitoi enye, aapuo te dukuya nanu too sipat, too ltauja lenye pooki o te nkishui enye, melai aikata te iyie oltung'ani otonie olorika le nkitoo too Siraeli’.

⁵“Ore ake sii, iyiolo enaaitaasa nanu Yoab olayioni le Seruyia, ina naitaasa ilkituaak oaare le njore oo Siraeli, Abna olayioni le Neer o Amasa olayioni le Yeser, oo tasesekuana ninye. Eitalakua ninye te nkata e seriani, elap o sarge apa oibukoyioki to larrabal, nepik osarge lemeeta entioto enkeene e mpolos natii empolos ai, nepik inamuka naatii inkejek aainei.

⁶Entaasisho naa nabo kata te risioroto e ng'eno inyi, kake emincho ina lukunya enye naibor edoiki enemeneng'a te seriani.

⁷Kake ntoduaa esupatisho lelo ayiok le Barsilai le Gilead, nincho ninche eaku tenebo lelo oodaa te Misa ino; amu teina supatisho aatang'amutua ninche nanu apa pee aisik ailany Absalom olalashe lino.

⁸Netii sii tenebo iyie Shimei olayioni le Gera, le Benchamen oing'ua Bahurin, laa ninye apa laatediaa to ldeket torrono teina olong apa nashomo Mahanaim; kake ore ake pee aalotu anang'are nanu to lkeju le Yordan, nainosaki nanu ninye olmumai to Laitoriani, ajoki, ‘Maar nanu iyie tua to lalem.’

⁹Ore naa taata, eminkenaa ninye aajo meeta entioto, naa ore amu ira iyie oltung'ani ng'en; iyiolo iyie enilo aitaas, niyau iyie ninye etua.”

¹⁰Neye Daudi, nenukari ninye te nkanasa e Daudi.

¹¹Ore apa enkata naitoreishe Daudi te Israel naa ilarin artam, eitoreisho ilarin tomoni uni oo kuni te Yerusalem o larin oopishana te Hebron.

¹²Neaku etotona Solomon to lorika le nkitoo le Daudi papaai lenye ore enkitoo enye neitashe auno.

¹³Neitoki Adonija olayioni le Hagit alotu enetii Batsheba ng'otonye Solomon. Nejoki ninye, “Ai te seriani iewuo iyie?” Nejo ninye “Te seriani.”

¹⁴Neitoki ajo, “Kaata embae naaliki iyie.” Nejoki ninye, “Tolimu.”

¹⁵Nejo ninye, “Iyiolo iyie ajo enaai apa enkitoria, naa nanu apa eisiligita Israel pooki pee aitore ninche; kake eibelekenye enkitoria neaku eno lalashe lai, amu enenye apake eing'uaa enetii Olaitoriani.

¹⁶Ore naa taata kaata embae nabo naomonu te iyie, nimikianyaki iyie nanu.” Nejoki Batsheba ninye, “Tolimu.”

¹⁷Nejo ninye, “Aatoomono nkilikuana olaiguanani Solomon, amu mikianyaki ninye, pee aaisho nanu Abishag e Shunam maitaa enkitok ai.”

¹⁸Nejo Batsheba, “Eisidai, kairorie olaiguanani te rishata ino.”

¹⁹Neaku eshomo Batsheba enetii olaiguanani Solomon, pee eirorie ninye te rishata e Adonija. Nedumunye olaiguanani anang'are ninye, neirrugokino ninye, neitoki aton to lorika lenye le nkitoo, neitoki aipotu olorika meyakini ng'otonye, neton ninye te nkaina enye e tatene.

²⁰Neitoki ninye ajo, “Kaata enkiti omonunoto nabo naaomon iyie, mikianyaki iyie nanu.” Nejoki olaiguanani ninye, “Tolimu eomonunoto ino yieyio lai, amu maanyaki nanu iyie.”

²¹Nejo ninye, “Nchoo Abishag e Shunam meishori Adonija olalashe lino meyama.” Nejoki olaiguanani Solomon ng'otonye, “Paa kainyoo peyie aa Abishag e Shunam iomonu meishori Adonija?

²²Toomonoki sii ninye enkitoria amu olalashe lai botor ninye, ore Abiatar olapolosani o Yoab olayioni le Seruyia naa ninye eng'orito.”

²³Neitoki olaiguanani Solomon anya olmumai to Laitoriani ejo, “Maaitaasa Enkai ena naaitulus tenemeinosieki ele rorei enkishui e Adonija!

²⁴Ore naa taata anaa enaishu Olaitoriani, laa ninye laaitasheyie nanu aitagol, naaitoton nanu to lorika le Daudi papaai lai, laa ninye laaitaa nanu olmarei, anaa apa enaisiligishore, keari Adonija metua ena olong.”

²⁵Neaku eirriwayie olaiguanani Solomon Benaia olayioni le Yehoida; neosh ninye Adonija anang'ie enkop, neye ninye.

²⁶Ore tialo Abiatar olapolosani, nejo olaiguanani, “Shomo Anatot, enkop inyi amu keeya nikiririkino iyie. Kake maar nanu iyie tua tena kata, amu itanapa apa osanduku lo Laitoriani Enkai te dukuya Daudi papaai lai, o te nkaraki sii nitang'arie apa papa isinaitin lenyena pooki.”

²⁷Neaku etaarayie Solomon Abiatar pee meitoki aaku olapolosani lo Laitoriani, neitabaya ororei lo Laitoriani apa oiroro ninye eipirta enkaji e Eli te Shilo.

²⁸Ore ake pee ebaiki ilomon Yoab, amu etijing'a apa Yoab Adonija enkoriong, hoo neitu ejing Absalom, neisikaki Yoab olng'obor lo Laitoriani nelo aibung imowuarak o lperere lo lasar.

²⁹Ore ake pee elikini olaiguanani Solomon, nchere, “Eisika Yoab alo atua olng'obor lo Laitoriani, naa ng'ura, etii ninye embata olperere lo lasar.” Neirriwaa Solomon Benaia olayioni le Yehoida, ejo, “Shomo toosho ninye tanang'ie enkop.”

³⁰Nelo Benaia atua ilo ng'obor lo Laitoriani nejoki ninye, “Eitanapishe olaiguanani ajo, ‘Tupuku’ ” kake etejo ninye, “A'a tene nanu aye.” Neitoki Benaia ayaki olaiguanani olomoni ajoki, “Nji ejo Yoab naa ena einosa olmumai ajo.”

³¹Newaliki olaiguanani ninye ajoki, “Taasa anaa enatejo ninye toosho ninye tanang'ie enkop, nilo anukaa; pee eiwuang'ieki te nanu o te nkaji e papaai lai entorroni o sarge lemeeta entioto oibukoyie Yoab.

³²Neyau Olaitoriani arrinyu inkiaasin enyena e nkibukoroto o sarge shumata endukuya enye makewan, amu ore apa meyiolo papa Daudi, etarasaka ninye nesesekuan to lalem iltung'ana oaare supati naa ile tipat aalang ninye, Abna olayioni le Neer, ilo kitok le njore oo Siraeli o Amasa olayioni le Yeter, olkitok le njore e Yuda.

³³Neaku kerrinyunye isargeta lenye aapuonu shumata endukuya e Yoab o shumata oo lukuny e ishoi enye, intarasi, kake ore tialo Daudi, o eishoi enye o enkaji enye o lorika lenye le nkitoo, naa keaku eseriani naing'uaa Olaitoriani enenye ntarasi moitie.”

³⁴Nedumunye Benaia olayioni le Yehoida alo neosh Yoab anang'ie enkop, near ninye metua, nenukari ninye tiatua enkaji enye makewan tiong'ota.

³⁵Nepik olaiguanani Benaia olayioni le Yehoida aitaa olkitok le njore te rishata e Yoab, nepik olaiguanani Sadok metaa olapolosani te rishata e Abiatar.

³⁶Neitoki olaiguanani airriwaa olkilikuai aipotu Shimei nejoki, ninye, “Teshetaki kewan enkaji te Yerusalem, nibik teine, nimilo iyie teine aidurraki dikae.

³⁷Amu ore kenya enkolong nilo, alang enong'oto e Kebron, tayiolo ntisipa nchere meeta nchere miye. Ore osarge lino nelotu shumata e ndukuya ino makewan.”

³⁸Nejoki Shemei olaiguanani, “Ore ina nitejo iyie naa eisidai, ore anaa enatejo olkitok lai olaiguanani, ina elo osinka lino aas.” Neaku etobiko Shimei te Yerusalem inkolong'i kumok.

³⁹Ore etulusoitie ilarin okuni, neisik irrindiki oaare le Shimei aapuo enetii Akish olayioni le Maaka, olaiguanani le Gaat. Ore pee elikini Shimei aajoki, “Etii irrindiki linono Gaat.”

⁴⁰Nedumunye Shimei neirot osikiria nelo Gaat enetii Akish, aing'oru irrindiki lenyena; nelo Shimei arrinyu irrindiki lenyena te Gaat.

⁴¹Ore ake pee elikini Solomon aajoki eshomo Shimei te Yerusalem nelo Gaat neitoki arrinyunye,

⁴²neirriwaa olaiguanani olkilikuai aipotu Shimei, nejoki ninye “Keitu apa nanu aainosie iyie olmumai to Laitoriani, naairorie oleng aikok ajoki, ‘Tayiolo ntisipa nchere ore kenya enkolong nilo ake ninye dikae wueji, niye iyie?’ Nikijoki iyie nanu, ‘Ore enitejo naa eisidai; kairuk nanu.’

⁴³Kainyoo naa peyie eitu iyie imbung olmumai to Laitoriani o ina kitanapata naaitanapa nanu iyie?”

⁴⁴Neitoki ake sii olaiguanani ajoki Shimei, “Iyiolo iyie to ltau lino ina torroni apa nintaasa Daudi papa lai; neaku kerrinyu Olaitoriani entorroni ino shumata endukuya ino.

⁴⁵Kake kemayian Olaitoriani olaiguanani Solomon, ore olorika le nkitoo le Daudi neitasheyieki te dukuya Olaitoriani ntarasi.”

⁴⁶Neitoki olaiguanani aitanap Benaia olayioni le Yehoida; neipang ninye alo aosh Shimei anang'ie enkop, neye ninye. Neaku eitasheyieki apa enkitoo te nkitoria e Solomon.