Read MAASAI REVISED PROTESTANT 1 Ilaiguanak 20 Bible Online

1 Ilaiguanak 20 - MAASAI REVISED PROTESTANT bible

1 Ilaiguanak 20

¹Eiturrurro apa olaiguanani Benhadad iltung'ana lenyena tenebo. Netii ilaiguanak tomoni uni oaare tenebo ninye, neeta mbartan o ngarrin oo mbartan. Nelo ninye aman Samaria neitayunye olarrabal.

²Neirriwaa ninye ilkiliku enkanasa e Ahab olaiguanani loo Siraeli, nejoki ninye, “Nji ejo Benhadad.

³‘Ore enkosholai ino o saabu ino naa naainei. Inaainei nkituaak inono o nkera inono.’ ”

⁴Newal olaiguanani loo Siraeli ajo, “Ore anaa enitejo olkitok lai, lo aiguanani, ara nanu olino, o nena pooki naata nanu.”

⁵Neitoki ilkiliku aapuonu ejo “Nji ejo Benhadad ‘Aairriwaka nanu iyie ilkiliku ajo; Iyakaki nanu enkosholai ino, o saabu ino, o nkituaak inono o nkera inono.

⁶Ore ake eyia kaairriwaki nanu isinkan laainei taisere tena saa, naa kepuonu aajur enkaji ino o nkajijik oo sinkan linono, neya pooki toki naitiship ninche.’ ”

⁷Neitoki olaiguanani loo Siraeli aiturrur ilpayiani pooki leina kop, nejoki, “Entisipu taata nidolidolo aajo enyamali eing'oru ele tung'ani. Amu aairriwaka ninye nanu olkilikuai te nkaraki inkituaak aainei o nkera aainei o te nkaraki enkosholai ai o saabu, nemaata nanu entoki natomito.”

⁸Ore lelo payiani o ltung'ana pooki, nejoki ninye, “Mining iyie ninye niminyorraa.”

⁹Kaae, nejoki ninye lelo ooirriwua Benhadad, “Entiaaki olkitok lai olaiguanani, ‘Ore nena pooki e dukuya niyieu tialo osinka lino, kaas nanu, kake ore ena bae maidim nanu ataasa.’ ” Nerrinyo lelo ooirriwuaki neyaki ninye olkilikuai. Neirriwaki Benhadad ninye olkilikuai nejoki,

¹⁰“Maaitaasa nanu inkaitin ina torrono tenaa kelekuni ninye enterit te Samaria naaiput inkaik ang.”

¹¹Newal olaiguanani loo Siraeli ajo, “Entiaaki ninye, ‘Mincho ilo orretenita imasaa enyena o larrabal ewuasa anaa ilo olaku eidipa.’”

¹²Ore ake pee ening Benhadad ilo kilikuai eokisho tenebo ilaiguanak too lng'oborri, nejoki ninye ltung'ana lenyena, “Entijing irrishat inyi to larrabal.” Nejing ninche irrishat enye aarasaki ina anasa.

¹³Nelotu oloiboni le Nkai anyikaki Ahab olaiguanani loo Siraeli nejoki, “Nji ejo Olaitoriani, Itoduaa iyie ele orora kitok pooki? Kaishoru ninche apik inkaik inono ena olong; naa ilo iyie ayiolou nchere kara nanu Olaitoriani.”

¹⁴Neitoki Ahab ajo, “Aitialo ng'ae?” Nejoki ninye, “Nji ejo Olaitoriani, Tialo isinkan loo lbalusuni loo lkerenketi.” Neitoki Ahab ajo, “Kaing'ae oiteru olarrabal?” Newaliki ajo, “Iyie.”

¹⁵Neitoki ninye aipotu lelo sinkan loo lbalusuni loo lkerenketi, naa iip are ninche o tomoni uni oaare, ore te siadi ninche neitoki aipotu iltung'ana loo Siraeli, nkalifuni naapishana.

¹⁶Neipang ninche aapuo te nkipirata e nkolong, ina kata eokisho Benhadad too lng'oborri, ninye o lelo aiguanak tikitam oaare apa ootareto ninye.

¹⁷Ore lelo sinkan loo lbalusuni loo lkerenketi neituruk aapuo. Neirriu Benhadad iltung'ana, nepuo aajoki ninye, “Eilepu iltung'ana aapuonu te Samaria.”

¹⁸Nejo ninye, “Tenaa ai te seriani eetuo ninche, eyau ninche eishu, naa tenaa ai to larrabal epuonu, eyau ninche eishu.”

¹⁹Kaae, neipang kulo aapuo te nkanasa, lelo sinkan loo lbalusuni too lkerenketi, o ina jore natusujayie ninche.

²⁰Near ake oltung'ani oltung'ani oipirare; neilanyisho iltung'ana le Siria, nesujaa Isiraeli ninche, kake eilanyishe Benhadad olaiguanani le Siria te mbarta tenebo ilakedok loo mbartan.

²¹Nelo olaiguanani loo Siraeli aibung mbartan o ngarrin oo mbartan, near iltung'ana le Siria oleng.

²²Neitoki oloiboni le Nkai alotu anyikaki olaiguanani loo Siraeli, nejoki “Wou, ntagoluoyu, nidamu oleng enilo aas; amu ore telde ari, naa aikilotu olaiguanani le Siria agilunore.”

²³Nejoki isinkan lo laiguanani le Siria ninye, “Ore inkaitin oo Siraeli naa inkaitin oo ldoinyo, neaku kegol ninche aalang iyiook. Metaa maape iyiook aarare ninche te nkop naisiasha, nemeeta nchere pee eitu kimir ninche.

²⁴Naa nji nkuna, iwuang'ie ilaiguanak too wuejitin enye, nipik ilarikok le njore irrishat enye;

²⁵nimpotu enjore naikununo anaa enapa natimiraki. Aipirakinye embarta enkae barta o engarri oo mbartan enkae garri oo mbartan; nikipuo iyiook aarare ninche te nkop naisiasha nemeeta nchere pee eitu iyiook kigolu aalang ninche.” Nening ninye enatejo ninche, neas ina.

²⁶Ore teina rishata o lari neipotu Benhadad aiturrur enjore e Siria, neilep aapuo Afek, pee earare Isiraeli.

²⁷Neipotuni Iltung'ana loo Siraeli, neishori ninche imasaa o larrabal, nepuo aarare ninche. Neun iltung'ana loo Siraeli ilng'oborri te dukuya ninche netiu anaa iluaat are kutiti oo nkineji, kake eiputa iltung'ana le Siria enkop.

²⁸Nelotu oltung'ani le Nkai anyiku nejoki olaiguanani loo Siraeli, Nji; ejo Olaitoriani, Ore amu etejo iltung'ana le Siria eji, “Ore Olaitoriani naa enkai oo ldoinyo, kake mme enkai oo erat ninye,” ore te nkaraki ina, kaishoru nanu ele orora pooki apik inkaik inono, pee itum iyie atayiolo nchere kara nanu Olaitoriani.’ ”

²⁹Neun injoreitin pokira ilng'oborri aaipirakinore ate inkolong'i naapishana. Ore te nkolong e naapishana neitutumi olarrabal. Neosh iltung'ana loo Siraeli iltung'ana le Siria, isikarini nkalifuni iip nabo oopuo too nkejek te nkolong nabo.

³⁰Neisikaki ilkulikae enkanasa e Afek, neurokino esuntai iltung'ana inkalifuni tikitam e lelo ootelekutua. Neisik sii ninye Benhadad nelo ajing olgilata liatua le nkanasa.

³¹Nejoki isinkan lenyena ninye, “Kitoning'o iyiook nchere, ore ilaiguanak le nkaji e Israel, naa ilaiguanak oata olng'ur. Nchoo iyiook maishopo ilkuniyiani too mpolosi ang, nikipik inkeenta ilukuny ang, nikipuo enetii olaiguanani loo Siraeli; amu ebaiki nikipal iyie inchu.”

³²Kaae, nerrotian ninche ilkuniyiani too mpolosi enye, nepik inkeenta ilukuny enye, nepuo enetii olaiguanani loo Siraeli, nejoki, “Etejo osinka lino Benhadad, ‘Aatoomono nchooki matobiko aishu.’ ” Nejo ninye, “Keton ake eishu? Olalashe lai ninye.”

³³Neanyita apa lelo tung'ana pee etum ororei supat, netum ninche nabo kata to laiguanani, nejo ninche, “Ee olalashe lino Benhadad.” Neitoki ninye ajo, “Enchom entoriku ninye.” Nelotu Benhadad enetii Ahab, neisho ninye metijing'a engarri oo mbartan.

³⁴Nejoki Benhadad ninye, “Ore nkanasa natooruo papaai lino, kaarrinyoki nanu, nindim iyie atasheta iwuejitin neemirishoreki te Dameski, anaa apa enataasa papaai te Samaria.” Nejo Ahab, “Kaaisho nanu iyie shomo te kulo rorei.” Kaae, neitobir olning'o o ninye neisho meshomo.

³⁵Nejoki oltung'ani obo loo layiok loo loibonok olikae te nkitanapata Olaitoriani, “Tooshoki nanu, aatoomono” kake etanya ilo tung'ani eosh ninye.

³⁶Neitoki ajoki ninye, “Ore amu itanya ining oltoilo lo Laitoriani, teneaku ishomo nikilo olng'atuny aar tua.” Ore pee elo aing'uaa nenang'are olng'atuny ninye near metua.

³⁷Neitoki ilo oiboni atum likae tung'ani, nejoki, “Tooshoki nanu, aatoomono.” Neosh ilo tung'ani ninye nepik olbae.

³⁸Kaae nelo ilo oiboni le Nkai nelo aanyu olaiguanani te mbata enkoitoi, eteena too nkarash ilo bae otii olpura le nkomom.

³⁹Ore ejo olaiguanani agiroo, neishiraki ninye olaiguanani ejo, “Eshomo osinka lino empolos olarrabal, naa ng'ura, eibelekenye osikari neyau oltung'ani enatii, naajoki nanu, ‘Ng'ura ele tung'ani; naa tenelo neluaya, neinosieki enkishui ino enkishui enye, aashu ilak entalanta e nkosholai.’

⁴⁰Ore enyamalita osinka lino tene o te idie, neluaya ninye.” Nejoki olaiguanani loo Siraeli ninye, “Neijia elo atiu endung'okinoto ino enkiguana, amu iyie makewan otudung'o ina.”

⁴¹Nesiokisioki aitayu ina arasha natii olpura le nkomom, neyiolou olaiguanani loo Siraeli ajo obo loo loibonok le Nkai.

⁴²Nejoki ninye, “Nji ejo Olaitoriani, ‘Ore te nkaraki ninchoo elo too nkaik inono, ilo tung'ani apa laiteng'elaka enkidaaroto, ore te nkaraki ina, keinosieki enkishui ino enkishui enye. Neinosieki enkishui oo ltung'ana linono enkishui oo ltung'ana lenyena.’ ”

⁴³Nelo olaiguanani loo Siraeli enkaji enye te Samaria eiruto neeta osina.